المساعد الشخصي الرقمي

مشاهدة النسخة كاملة : صندوق استفسارات الفرقه الاولى طب المنصورة( اسأل ونحن نجيب)

دكتور المنصورة
08-24-2009, 10:45 AM
السلام عليكم ورحمه الله وبركاته

بدايه نتقدم بخالص التهانى لزمينا طلاب الفرقه الاولى بالالتحاق بعاصمه مصر الطبيه طب المنصورة ويسعدنا ان يكون هذا الموضوع صندوقا لاى استفسار من اخواننا من الان وعلى مدار السنه الدراسيه مقديما لهم بفضل الله عز وجل المعلومات الكافيه عن نظام الدراسه فى كليتنا طب المنصورة ونكون لهم عونا باذن الله فى تجاوز هذة المرحله الانتقاليه ما بين الثانويه العامه والدراسه فى طب المنصورة والتى كنا نحن قد عنينا منها بعض الشي راجين من الله عز وجل ان يوفقنا وان يجعلنا سببا فى سرعه التأقلم بازن الله مع النظام الدراسى الجديد وتجاوز حمى البدايه باذن الله وازاله اى رهبه او خوف من الدراسه الطبيه وبالاخص فى طب المنصورة وازاله اى معلومات غير صحيحه عن الدراسه فى طب المنصورة ومدى صعوبتها والتى كنا نحن قد عنينا منها حين ذاك حتى تبين لنا الصواب

وباذن الله سيكن هذا الموضوع مقسم الى جزءين ,,,,

الجزء الاول ...

باذن الله سنقوم بتقديم فكرة سريعه عن المواد الدراسه فى السنه الاولى وكيفيه التعامل مع كل مادة بفضل الله تعالى وهذة ستكون البدايه


الجزء الثانى.....

وسيكون هذا الجزء هوا المستمر بازن الله تعالى ومبنى فى الاساس على تفاعل الاعضاء واسالتهم عن ما قد يوجهوا فى الكليه من مشاكل مررنا بها جميعا
من طرق مزاكرة وغيرها
من اختلاف لغه وبدايه التاقلم على حياة جديدة
من استفسارات حول مواضيع الكورسات وغيرها والكلام الذى كنا نسمعه حين ذاك والذى كنا قد عنينا منه فى البدايه حتى تجاوزنا اشهر بدايه الفرقه الاولى والتى لم تمحى من زاكرتنا
من نظام محضرات وسكاشن وغيرها وموضوع الحضور من عدمه

بالاضافه الى استفسارتكم على مدار السنه الدارسيه بخصص اى موضوع او اى مشكله قد تواجهكم خلال هذا السنه


سالين الله عز وجل ان يتقبل منا صالح الاعمال وان نجعله خالصه لوجهه الكريم

اخوكم دكتور المنصورة



يتبع باذن الله
NERVE
09-02-2009, 03:28 PM
بعد اذن حضرتك يا دكتور
أبدأ في الجزء الاول علي قدر استطاعتي

أول حاجه التقديرات

بيتحسب ازاي التقدير ومن كام الامتيازامتياز 85% فاكثر من مجموع الدرجات

جيد جدا من 75% الى اقل من 85% من مجموع الدرجات

جيد من 65% الى اقل من 75% من مجموع الدرجات

مقبول من 60% الى اقل من 65% من مجموع الدرجات
اما رسوب الطلاب فيقدر باحد التقديرين الاتيين
بعيد الشر عنكم يارب
ضعيف من 30% اى اقل من 60% من مجموع الدرجات

ضعيف جدا اقل من 30% من مجموع الدرجات


وطبعا أول حاجة هتيجي على بالكم ان الموضوع تافه جدا

ازاي الامتياز من 85% بس؟!

ده احنا جايبين في ثانوي 99%

لأ


في الكلية سهل جدا إنك تضيع منك درجات

انت بتمتحن امتحانات كتير وكل امتحان بتنقص فيه كذا درجة

لما بيتجمعوا في النهاية بتلاقيك ضيعت درجات كتير جدا
يعني الامتياز مش بالسهولة اللي انتوا هتتخيلوها في الاول كده ومحتاج مجهود كبير
بس انتوا قدها وقدود ان شاء الله
متخافوش مني
طيب

يعني ايه مرتبة الشرف

مرتبة الشرف يعني تقدريك في السنين من اول اولى لغاية ما اتخرجت مقلش عن جيد جدا
يعني لو جبت في سنة جيد او مقبول
كده المرتبة ضاعت
وهي اسم فخري يعني مش معنى انك معكش مرتبة الشرف ان ده هيأثر على شغلك بعدين

لا المهم تقديرك الكلي

كده تمام ؟؟؟؟؟؟؟؟
نبدأ الكلام الجد
النظري
الدفعه ممكن تتقسم السنه دي أو تكون قسم واحد (انتو وحظكم )

طيب الجدول ؟
تروح شئون الطلبه وتاخد نسخه من هناك
أو بيكون فيه أسر كتير مجهزه الجدول وبتديه للطلبه الجدد وشوف المدرج اللي هتكون فيه وأسأل علي مكانه .

خلاص انت دخلت المدرج وظبطت نفسك
مده المحاضره ساعه وده بما ان الدراسه ان شاء الله بعد رمضان
مفيش فواصل بين المحاضرات

طيب المحاضرات مهمه ؟
مش دايما
بس ياريت لو تحضر المحاضرات الفتره اللي في البدايه علشان تفهم الدنيا ماشيه أزاي
بعد كده مش فاهم من الدكتور
متضيعش وقت وأعمل حاجه تانيه
يعني ممكن أسيب المحاضره ومفيش غياب ؟؟؟؟؟
ايوه مفيش غياب في المحاضرات

خلصنا كده المحاضرات
ندخل علي السكاشن
برضه انتم وحظكم في تقسيمه السكاشن

تعرف ازاي السكشن بتاعك؟

بيتعلق في الاقسام مكتوب فيه الاسماء والسكاشن

السكشن بيبدأ أمتي ؟
غالبا بعد الدراسه باسبوعين

مدة السكاشن

الفسيولوجي والهستولوجي والبيو ساعتين كل سكشن

سكشن واحد في الاسبوع

التشريح بيبقى ساعة واحدة

3 او 4 سكاشن في الاسبوع


مين بيشرح السكاشن؟

المعيدين
فيه غياب في السكاشن؟

ايوه فيه غياب واللي حضوره بيقل عن 70% من السكاشن بيتحرم من دخول الامتحان



أماكن حضور السكاشن

مش في المدرج زي المحاضرات لكن كل سكشن في القسم بتاعه



السكاشن مهمة؟

اكيد طبعا

بتشوف فيها العملي بعينك وده بيسهل جدا فهم النظري

كمان احيانا بيتشرح في السكشن اجزاء من النظري وعشان المعيدين بيشرحوا باسلوب بعيد عن رسمية المحاضرات وبيكون فيه تفاعل اكتر من المحاضرات وممكن تسأل المعيد علي اللي مش فاهمه من غير الخوف اللي بيكون مع الدكاتره الكبار

بيكون الفهم اسهل في السكشن


العملي بيتذاكر منين؟

كل قسم بينزل كتاب عملي

وكمان اخر السنة بتنزل مذكرات مختصرة كده لعملي كل مادة


وعلي فكره هتحبوا السكاشن علشان هتلبسوا البالطو ( بس ده في الاول بس )
NERVE
09-02-2009, 03:42 PM
التشريح
(Anatomy)

في متحف التشريح(متخافوش منه بالتعود )
هاتشوف فيه العظم وهايتشرح كل حاجة فيه
وهايكون فيه جارات jars

تتعرف على كل جار وعلى الاجزاء اللي فيه (الاعصاب والاوردة والشرايين والعضلات....)
كمان بيكون فيه شرح نظري للاجزاء الصعبة من المنهج وتجميعات تسهل الحفظ شوية

بالنسبه للكتاب بيكون فيه قوايم باسامي الجارات وارقام الحاجات اللي فيها
وأخر السنه مطلوب ترسم كام جار قدام الصفحه بتاعته (عليه 5 درجات )
مش شرط الدقه المهم يكون فيه رسمه الدكتور شايفها مع كام علامه علي الحاجات المهم
والمتحف متخافوش منه بالتعود هيكون أحلي مكان تقعدوا فيه وتذاكروا بهدوء
الفسيولوجي

قسم الفسيولوجي في الدور الثالث
هيتراجع فيه على أجزاءالنظري مهمة ومتعلقة بالعملي
وهاتشوف فيهالاجهزة الطبية وبتستخدم ازاي
وهاتتعلم في مع الوقت قراءة رسم القلب و قياس الضغط والحاجات دي

الهستولوجي


في قسم الهستولوجي في الدور اللي فوق قسم التشريح
هتبدأ تتعامل مع الميكرسكوب وتشوف العينات والانسجه
وتتعلم ازاي ترسمها
وكتاب العملي لازم يترسم فيه الانسجة دي
هتحتاج قلمين الوان خشب احمر وازرق عشان ترسم بيهم لأن دي الوان الصبغات اللي بتستخدم في الصبغه تحت الميكرسكوب
الرسم هنا مهم مش زي الاناتومي
لأن فيه رسم أخر السنه في الامتحان ان شاء الله
البيو


قسم الكيمياء تحت قسم الفسيولوجي
هنا هاتعمل بايدك تجارب كتير

المفروض في الامتحان بيجيلك مادة في انبوبة اختبار وانت تتعرف المادة دي ايه
أزاي ؟
بتعمل سلسلة من التجارب لغاية ما توصلها
والكتاب معاك برضه في اخر كل سكشن تكتب فيه المعادلات والتجارب اللي اخدتها في السكشن
والدكاتره بيعملوا اسكيمه قبل الامتحان بتظبط الدنيا

خلصنا السكاشن
كل ده انت لسه معرفتش تفاصيل المواد
بس علشان متهش من النظام أعرف الحاجات اللي فوق الاول
NERVE
09-02-2009, 04:19 PM
بعد كده المواد الدراسيه
مواد سنة أولى
قلنا قبل كده على اسامي المواد لكن هانكلم باختصار شوية عن كل مادة

سنة أولى فيها أربع مواد أساسية

التشريح Anatomy
فسيولوجي Physiology
هستولوجي Histology
كيمياء حيوية Biochemistry


التشريح وعلم الاجنة


من اسمها طبعا دي المادة اللي هاتدرس فيها أعضاء الجسم المختلفة وتعرف اسم كل جزء والشريان اليي بيغذيه والوريد اللي خارج منه والاعصاب الموجودة فيه والعلاقة بينه وبين الاعضاء اللي حواليه

الماده دي كبيره وأساميها صعبه بس ده في البدايه بس
وبعد كده هتحس انها من أحسن المواد اللي ممكن تدرسها في الكليه

وعليه 250 درجة
(التقسيمه بالظبط مش فاكراها )
في سنة أولى هتدرس
الطرف العلوي Upper limb
الصدر thorax
منطقة البطن Abdomen
منطقة الحوض pelvis

ومعاهم كتاب لوحده (embryology ) علم الاجنه
وكتاب (introduction )
وسيبك من كلام بتوع المكتبات عن أي CDأو أدوات تشريح
متستعجلوش ومش بنحتاج أدوات تشريح (كلها جارات زي ما أتفقنا )
وبالنسبه لمصدر المذاكره
فيه كتب القسم
وفيه مذكرات
وهتحتاج أطلس أو CD عليه صور الجارات والشرايح والحاجات دي كلها في المكتبه اللي في الكليه أو المكتبات اللي حواليها (أ"منوا ههتحفظوها عن ظهر قلب وهتبقوا زبائن معتمدين )

الفسيولوجي
مادة مهمة جدا جدا وعليها 250 درجة
هتدرس فيها بالتفصيل اجهزة الجسم المختلفة وازاي بتشتغل وازاي بتتكامل مع بعضها

فروعهااللي هتدرسها في أولي ان شاء الله

العضلات والاعصاب & MUSCELS
Nerves
الفيزياء الحيوية Biophysics
القلب والاوعية الدموية Cardiovascular system
الجهاز التنفسي Respiratory system
AUTONOMIC NERVOUS SYSTEM
BLOOD
بس الباقي في سنه تانيه بأذن الله
وبرضه كتاب القسم والمذكرات موجوده في نفس المكتبات
الهستولوجي

(حبيبه الطلبه )
علم الانسجة والخلايا

هتدرس فيه تركيب الخلية وانواعها والاختلافات بين الانسجة المختلفة وتركيب الخلايا في كل نسيج في الجسم
المنهج مقسوم برضه على سنة اولى وتانية

عليها 150 درجة

ودي أسهل ماده هتشوفها عينيك في أولي وتانيه
متضايقوش لو كانت غريبه في الاول
باذن الله وبأقل مجهود الامتياز العالي مضمون جدا

أخر حاجه

البيو
الكيمياء الحيوية
150 درجة برضه

وهاتدرس فيها المعادلات اللي بتحصل جوه الجسم والتمثيل الغذائي وحاجات كده

وتدرس كيمياء المواد اللي بتعتمد عليها في الغذاء زي البروتين
والكربوهيدرات
والدهون
الفيتامينات
والانزيمات
DNA

وفي الكيمياء دي تنسي كيمياء الثانويه العامه
وتنسي الدرجات اللي كنت بتجيبها فيها
دي كيميا طب
ركعتين وكوبايه شاي كبيره
وتذاكرها

كده خلصنا المواد اللي عليكم
المواد الفرعيه اللي هي اللغه والحاسب معتقدش ان فيه حاسب السنه دي
بس تسألوا عليها من أول السنه
ومش مهم محاضراتها
بس ياريت لو تشوفوا حد بيحضر وتبقوا تسألوه عن أخر التطورات فيها
ومفيش مانع كل فتره تبقوا تحضروا محاضره
من باب الضمير ليس ألا
أهم حاجه انكم تبدأوا مذاكره أول بأول
ومتقعوش في نفس الغلط اللي هوه تأجيل المذاكره علشان مش فاهمين
لو مش فاهم أسأل أي حد أكبر منك علشان لو مسألتش أكيد مش هتفهم
وربنا يوفقكم يا رب ويارب أكون قدرت أقدم لكم حاجه تفيدكم

ولو فيه أي تقصير الدكاتره هنا ينبهوا عليه
dr.amany
09-23-2009, 03:36 AM
شكرا ع مجهودكم الطيب يا دكاترة
دكتور المنصورة
09-23-2009, 04:25 AM
جزاكى كل خير يا دكتورة وان شاء الله مع بدا الدراسه تلاقى زمايل كتير ليكي فى اولى وبالفعل كان فيه طلبه كتير فى اولى وكان عدد الطلبه فى المنتدى وصل 50 الف عضو بس عنوان المنتدى كان اتغير ففى ناس لسه مش تعرف العنوان الجديد وحضرتك بردك تقدرى تعرفى زميلك فى الكليه بالمنتدىواى استفسار الاخوة والاخوات اللى اكبر من حضرتك ان شاء الله يفيدوكى هنا
سعد وجيه
10-03-2009, 07:14 AM
شـكــ وبارك الله فيك ـــرا لك ... لك مني أجمل تحية .
دكتور المنصورة
10-03-2009, 12:40 PM
اهلا بيكم يا دكاترة اولى وفى انتظار استفراتكم خلاص العام الدارسى بازن الله