المساعد الشخصي الرقمي

مشاهدة النسخة كاملة : آخر أخبار مشكلة امتياز الإسكندرية ( فى الجرائد و من الفاس بوك )

د أحمد سمير
10-12-2009, 05:59 AM
من المصرى اليوم

الأحد 11 أكتوبر 2009 - 03:28 م
إعتصام 140 طبيب إمتياز إحتجاجاً على قرار إيقاف تدريبهم و إنتدابهم بالمدارس لمواجهة «أنفلونزا الخنازير»

ناصر الشرقاوي

نظم أكثر من 140 طبيب امتياز بجامعة الإسكندرية، وقفة احتجاجية صباح اليوم الأحد، داخل المستشفى الرئيسي الجامعي احتجاجاً على قرار الجامعة بوقف تدريبهم، وانتدابهم للعمل بالمدارس لمواجهة «أنفلونزا الخنازير».

كانت الأزمة قد تفجرت منذ 3 أيام، وفوجئ طلاب الامتياز وعددهم 650 طبيبا بقرار الدكتورة رئيس جامعة الإسكندرية، بوقف تدريبهم بمستشفيات الجامعة، وتوزيعهم على المدارس لمواجهة «أنفلونزا الخنازير» بواقع طبيب لكل مدرسة، على أن يكون الإنتقال على حسابهم الخاص .

وقام الأطباء بالتوجه أمس الأول إلى مكتب عميد كلية الطب، وبعد الإجتماع معه، لم يتوصلوا إلى شيء حيث أخبرهم أن القرار صادر من رئيس الجامعة وليس له دخل به .

وأكد الأطباء لـ «المصري اليوم» أن القرار من شأنه القضاء على مستقبلهم العلمي، فإنهاء تدريبهم معناه عدم إلمامهم بالعمل وفقدانهم جزء مهم من التدريب العملي على أقسام الطب المختلفة، وعلى الجانب الأخر فإنهم ليسوا مؤهلين لمواجهة «أنفلونزا الخنازير»، وكل معرفتهم بها لا تتعدى معرفة رجل الشارع العادي، ودلل أحد الأطباء على ذلك بأنه أثناء تلقي تدريبه بمستشفى الشاطبي للأطفال استقبل المستشفى حالة طفلة مصابة بإرتفاع في درجة الحرارة وضيق في التنفس، ولم يستطيعوا اكتشاف المرض، وتم معالجتها على أنها نزلة برد عادية، حتى حضر أحد الأساتذة الكبار وشخص حالتها على أنها «أنفلونزا الخنازير».

وأشار المعتصمون إلى أن كل معرفتهم بالمرض، تتلخص في ندوة لمدة ساعة، تم فيها عرض كيفية مواجهة المرض بالطرق العادية مثل غسل اليدين وإرتداء الماسكات وغيرها، ولم يتطرق تدريبهم لطرق اكتشاف المرض والتشخيص والعلاج، وأكدوا أن قرار وقف تدريبهم وندبهم بالمدارس، يهدد حياة التلاميذ ويهدد مستقبلهم .


http://jupiter.almasryonline.com/masryportal/articlePrintableVersionJTags.jsp?itId=UG126809&pId=UG14&pType=1&languageShort=0
د أحمد سمير
10-12-2009, 06:05 AM
اليوم السابع

أطباء الإسكندرية يتظاهرون ضد لبيب

الأحد، 11 أكتوبر 2009 - 19:24

الإسكندرية ـ جاكلين منير

تجمهر اليوم عدد كبير من أطباء الامتياز بكلية الطب جامعة الإسكندرية أمام المستشفى الرئيسى الجامعى اعتراضا على حرمانهم من التدريب السنوى الخاص بهم داخل المستشفى، بسبب تواجدهم الدائم بالمدارس فى إطار الحملة التى أطلقها اللواء عادل لبيب محافظ الإسكندرية والتى ضمت أكثر من 1000 طبيب من أطباء الامتياز للتواجد داخل المدارس للكشف عن حالات الاشتباه بأنفلونزا الخنازير.

وقال عدد كبير من الأطباء إلى أن التدريب داخل المستشفى يؤهلهم للتخصص فى المستقبل، وفى الوقت نفسه أكدوا على عدم امتلاكهم الخبرة الكافية لتحديد إصابة الطلاب بأنفلونزا الخنازير، بالإضافة إلى عدم منحهم التدريب الكافى على اكتشافه، خاصة فى ظل نقص الإمكانيات الطبية بالمدارس وطالبوا ببرنامج تعويضى عن التدريب.

وشهد نفس المستشفى أيضا قيام عدد من ممرضات بالإضراب عن العمل، اعتراضا على تغيير نظام العقد معهن وزيادة مدته لـ10 سنوات بدون موافقة الممرضات، مما سيؤدى لزيادة عدد ساعات السهر التى تبدأ من الساعة الثامنة مساء وحتى الثامنة صباحا ولمدة 10 سنوات أخرى مما يؤثر سلبا على حياتهن الزوجية والأسرية.

http://www.youm7.com/News.asp?NewsID=144588&SecID=97&IssueID=0
د أحمد سمير
10-12-2009, 06:09 AM
من الفاس بوك

أحتجاب كامل حتى يوم الخميس القادم الموافق 15/10/2009


لا يعدّ إحتجابنا أو إبداء إعتراضنا علي ما وقع علينا من تجاهل للمطالب العادلة التي قدمناها و وجهة نظرنا في أمر الإنتداب ,
لا يعدّ رفضا لأداء الواجب الوطني لخدمة المجتمع ,
و لكنه إعتراض عما يحدث و حدث لنا علي مدار اليومين الماضيين , من تجاهل و فرض لرؤية أحادية للأمور
مما دعانا لإتخاذ هذه الخطوة الجادة و التي ربما قد تدفع الجهات المسئولة في إعادة النظر في قرارها بإلغاء القرار بصورة نهائية و البحث عن وسيلة أخري لمعالجة الأمور بصورة لا تضر بالصالح العام من جهة و مستقبلنا كأطباء المستقبل من جهة أخري.

--------------------------------------------------------------------------------------
بعد أعتصام اليوم الجزئي وبعد أنتظار طال لما يقرب ال5 ساعات وفي كافتيريا صغيرة جدا بالكاد أستوعبتنا
تكرم السيد الدكتور عميد الكلية بالتحدث الينا في النقاط التالية :

- العمل الذي سنقوم به هو لخدمة المجتمع وهو واجب وطني على كل فرد منا لأننا كلية قائمة على خدمة المجتمع أولا واخيرا -
- أبعاد المشكلة خطيرة ونحن خط الدفاع الأول في المنظومة و خطة الوزارة - ( التي لا نعرف عنها أي شئ حتى الأن ) لا جديد
- حاول السيد العميد أستمالة الناحية الوطنية والانسانية وكأننا بالمطالبة بحقوقنا قد تخلينا عن واجبنا الانساني والوطني
- الطالبات سيتم توزيعهن على المناطق الداخلية والمتوسطة من الاسكندرية ( لا نعرف التوزيع الجغرافي بالظبط ولكن ما نعرفه ان بعض الطالبات قد وزعن على الدخلية والعوايد و أبيس ) هل هذه مناطق داخلية ؟
- سيتم بناءا على كلام العميد صرف مقابل مادي لا يقل عن 200 جنيه !!!!!!!!!!!!!!!!!! مبلغ كبير جدا في الواقع
- الفترة غير معلومة وان كانت تعليمات المحافظ تنص على ان فترة الخطورة ستصل الى 6 أشهر . !!!!!!!!!!!!!!!!!!!!!!!!!!!!!!!!!!!!!!!!!!!!
- بناءا على استبياننا لكيفية الأستفادة من الأقسام التي ننتمي اليها أوضح سيادة العميد انه يدرس خطة تتضمن الا يمكث الطبيب في اي مكان أكثر من 10 ايام ثم يعود لتدريب الأمتياز لمة مماثلة على ان يستلم العمل في مكان أخر بعد ذلك في أدوار متناوبة !!!!!!!!!!
- فكرة توفير مواصلات على حساب المحافظة صعبة جدا بناءا على كلام المحافظ ( الله يرحم كأس العالم والأتوبيسات المجانية للهلس والتهريج ) أصل أحنا شغالين ببلاش يا جماعة
- فكرة التأمين وحماية أنفسنا : تكرم سيادته بتوضيح انه ليس من المهم أرتداء الماسكات وانه يمر عليه شخصيا أكثر من 20 حالة يوميا في العيادة ويتعامل معها طبيعيا وبلا خوف لأن الفيرس ضعيف ( كلام متناقض لما هو فعلا ضعيف طب ليه وجع الدماغ ده ان شاء الله ؟ )
- في النهاية وعند أحساسه بأن كلامه لم يؤثر فينا أنفعل سيادته وقام بأتهامنا بأننا بلا نخوة ولا وطنية - كعادة الجميع في مهاجمتنا الأن - وقام بتركنا في الكافتيريا بالبلدي كدا نخبط راسنا في الحيط لأنه مرة أخرى القرار سيادي ولا رجعة فيه ولا شروط لنا لنضعها والموضوع غير قابل للتفاوض

في النهاية يا جماعة
قررنا نحن الطلية المجتمعين في وقتها بالأتي وهو قرار بالأجماع
الأمتناع عن العمل نهائيا في المستشفيات الجامعية ( الميري - الشاطبي - الحضرة - ) مع الأمتناع عن تسلم الوظائف المزعومة أيضا وذلك حتى يوم الخميس القادم ان شاء الله لنجتمع مرة أخرى أمام الأستقبال الساعة 11 صباحا
سبب هذا القرار حتى يحس الجميع بقيمة العمل الذي نقوم به في خدمة الناس في العمل الدؤوب لنا في المستشفى وحتى لا يقال علينا ( observers )
فقط كما تكرم أحد الأستاذة بوصفنا
لو كنا فعلا ملاحظين فقط في رأيهم يبقى خلاص نخليها بقى بجد كدا علشان يحسوا بقيمتنا ويعرفوا ان الله حق و يفهموا ان المستشفى من غيرنا فعلا حتعاني .
أسف يا جماعة لو كنت طولت عليكم ولكن حبيبت أوضح ليكم الصورة كاملة

ملاحظة :
تواجد مندوبين من عدة صحف اليوم وقاموا بأخد ملاحظتنا ( المصري اليوم - الأخبار - الشروق - الوفد -....... )
كما ننوه ان اليوم في برنامج البيت بيتك سيكون هناك مداخلة ان شاء الله من أحد الزملاء علشان يوضح للرأي العام وجهة نظرنا بعيدا عن تريقة عمرو أديب الأعلامي الصغير - سيتم النظر في موضوعه بعد انتهاء الأزمة ان شاء الله -

شكرا مرة تانية يا جماعة
--------------------------------------------------------------------------------------- بعض الاضافات :
-----------
موضوع الـ 10 ايام بالتناوب اللي اتكلم عليه سيادة العميد , حظي بإستغراب دكتور اشرف !! و قال اعملها ازاي ؟! .. لان المحافظة طلبت 900 دكتور تقريبا كل يوم متواجدين .. يعني مرة تانية بالبلدي كده , اللي يروح مكان هيفضل فيه تقريبا و محدش هيلف و يرجع تاني للميري غير اول 180 تقريبا من الدفعة و دول طبعا هيشيلوا شغل الميري و الشاطبي و الحضرة كله كله كله كله
----
جداول الاسماء و التوزيعات علي المدارس نزلت بالفعل , لكن مش كاملة .. فيه ناس مش لاقيين اسماؤهم حتي الان , و قالوا ان بكرة الباقي هتنزل اسماؤهم ...... يعني الدفعة كلها هتتوزع
-------
فيه زميلات اخدوا انتدابهم في مناطق برج العرب و العامرية و الدخيلة و ابيس
يعني مفيش اي مراعاة لاي بعد !!!! و كما قالت الست سعاد حسني ربنا يسمح لها : البنت زي الولد , مهش كمالة عدد
----------
د أحمد سمير
10-12-2009, 06:15 AM
ستتم الوقفة باذن الله من الساعة 11 ظهرا الي الساعة 1 ظهرا وهدفها هي مقابلة العميد مرة اخري والنقاش معنا باسلوب حضاري والموافقة عي مطالبنا


1) ان يكون التوزيع اختياري ومقابل مادي جيد
2) ان يتم التوزيع الاختياري بعد تلقي تدريب جيد)
3)ان يتم التوزيع في اماكن قريبة من السكن او من المستشفيات التي نتدرب فيها

في حال رفض هذه المطالب

سيتوجه وفد مكون من 5 افراد(سنقوم بتحديدهم الان
لعرض هذه المطالب علي رئيسة الجامعة
وفي حالة الرفض سنتقدم بشكوي مكتوبة سنتفق علي صيغتها الان وجمع توقيعات عليها للشئون القانونية بالجامعة وسنرفض استلام العمل في المدارس في حال توقيع اي عقوبات او جزاءات لعدم استلام العمل في المدارس سنقوم برفع قضية علي عميد الكلية ورئيس الجامعة

برجاء ارسال اراؤكم في الاقتراحات دي ولو فيها اي تعديلات
أبو أيوب
10-12-2009, 09:00 AM
السلام عليكم ورحمة الله وبركاته ، ازيك يادكتور أحمد ، جزاك الله خيرا على اهتمامك بالموضوع ، لكن أنا عايز أقول ان احنا عندنا مشكلة هي ان كلمتنا مش واحدة ، وكل واحد طالع برأي لوحده ، المفروض الناس تسمع بعضها ويتفقوا كلهم على طلبات واحدة تتكتب بصيغة كويسة وتوصل للمسئولين .
على كل أنا شايف مثلا إنه غلط كبير إن احنا نقول ( ما نعرفش ) ( احنا صغيرين ) ، لا ... احنا نعرف ومش أقل من بعض النواب ومش أقل من الجناير اللي لسه مستلمين .
في طلبات كتيرة مش منطقية ، زي اللي يقولك يدربونا شهر كامل ازاي نكافح انفلونزا الخنازير!! ، وفي ناس مش عاجبها أي حاجة عايزين القرار يتلغي وخلاص ومش موافقين على أي حل تاني ، والنهارده مثلا كانوا بيغيروا التوزيعة عشان في ناس مش عاجبها الأماكن اللي راحتها طيب في ناس كمان مش هيعجبها التوزيعة الجديدة يبفى احنا عملنا ايه ، احنا عايزين اقتراحات مفيدة أهم حاجة تضمن حقوقنا وتعرفنا راسنا من رجلينا دلوقت .
من الطلبات المنطقية - باعتبار القرار أمر واقع لا يمكن تغييره -
أولا : أن لا تضيع علينا فرصة التدريب في الأقسام التي لم نتدرب فيها بعد ، حتى لو هتقل مش مشكلة ، بمعنى إن الناس اللي فاضل لها جراحة أو باطنة أو أطفال أو نسا ممكن ياخدوها في شهر واحد ، والناس اللي فاضل لها تخدير أو استقبال ممكن ياخدوها في اسبوعين والاسبشيلاية الواحدة في اسبوعين ، يحاولوا يظبطوها ان احنا نطلع شهرين مثلا مدارس ونرجع آخر شهرين نكمل امتيازنا ، لو حتى استدعى الأمر انهم يستعينوا بالناس اللي لسه مخلصة سنة ستة بدل ما يبدؤا امتيازهم في شهر 3 يبدؤا من شهر 1 في المدارس ، المهم انهم يصرفوا ما ينفعش بأي حال آخد شهادة امتياز ناقصة

ثانيا : المقابل المادي مهم جدا والكلام عليه مهم ، وال 200 جنيه في الشهر في نظري مش كفاية ، أنا واحد جالي مدرسة في المنتزه هدفع مواصلات مش أقل من 150 جنيه ده غير فطاري أو غداياوتعبي ، وفي ناس تانية هتدفع مواصلات بس 300 جنيه وممكن يكون في ناس أكتر من كدة ، غير انك رايح مناطق نائية ممكن تدفع من جيبك للناس ، أنا أعرف أماكن ما فيهاش صيدليات أظن لازم تاخد معاك شنطة فيها الأدوية الأساسية .
أنا آسف اني طولت عليك ، سأكمل في وقت لاحق ولاسلام عليكم ورحمة الله وبركاته
نور
10-12-2009, 01:24 PM
السلام عليكم ورحمة الله وبركاته

كنا سمعنا الأخبار دى فى المدينة بس بصراحة مكناش مصدقيين

يعنى بنحسبه كلام فى كلام

والى سمعناه كمان يوم واحد فى الاسبوع بس هوة الى فى المدرسة والباقى عااادى فى المستشفى

مكنتش أعرف ان الموضوع جد فعلااا

وانهرده كنا فى الباطنة محسناش باى حاجة خاااااااااالص

لإننا منعرفش الجو الطبيعى بيبقى عامل إزاى وكمان منعرفش الإمتيازمن النواب



بالنسبة للموضوع نفسه

إن شــــاء الله يقبلوا المطالب وفى حالة إن مقبلوش

اكيد إن شاء الله خيير


قال تعالى : (وعسى أن تكرهوا شيئا ويجعل الله فيه خيرا كثيرا) (http://vb.q8ia.com/%D8%A7%D9%84%D9%81%D8%AA%D8%A7%D8%A9-%D8%A7%D9%84%D9%85%D8%B3%D9%84%D9%85%D8%A9/%D9%88%D8%B9%D8%B3%D9%89-%D8%A3%D9%86-%D8%AA%D9%83%D8%B1%D9%87%D9%88%D8%A7-%D8%B4%D9%8A%D8%A6%D8%A7-%D9%88%D9%8A%D8%AC%D8%B9%D9%84-%D8%A7%D9%84%D9%84%D9%87-%D9%81%D9%8A%D9%87-%D8%AE%D9%8A%D8%B1%D8%A7-%D9%83%D8%AB%D9%8A%D8%B1%D8%A7-38297/)


وحسبنا الله ونعم الوكيـــل

وفعلا تغيروا جو المستفيات شوية وتعيشوا جو المدارس وإسترجااااع الذكريات

بالنسبة للرجال اعتقد ممكن يستحملوا انهم بعد المدرسة ممكن شوية آخر النهار يروحوا المستشفى لحد
ميجبوا آخرهم ويروحوا

شوور الموضوع هيكون متعب ولكن كأن مثلا الصبح مستشفى وبعد الظهر العيادة حياااة الدكترة العاديه يعنى

البنات معتقدش خاااالص انهم يقدروا يعملوا كده إلا قـلة منهم

بس المشكلة الشوية الى فى نص بتوع الراحة دوول هترتاحواا فييين ؟

أكييد هتحتاجوا سكن


والى عايزة اعرفه
اشمعنى طلبة المدارس الى بيخافوا عليهم
مااحنا كمان طلبة
طيب وموظفيين الحكومة
والناس الى فى المواصلات
عاادى يعنى لو طلع عندهم الفيروس
أبو أيوب
10-12-2009, 02:36 PM
أنا سمعت ان عميد الكلية الدكتور الزلباني جه النهارده على( الحياة) وقال كلام مش كويس !!
ربنا يستر .
frontal lobe
10-14-2009, 08:25 AM
طيب أنا عايزة أعرف إيه ظروف سنة سادسة اللي بيمتحنوا دلوقتي ؟؟ هينزلوا امتيازهم عادي في أول مارس و لا إيه ؟؟

أنا خايفة يقولوا إنهم هينزلوا بعد الامتحانات على طول !! دول كده مش هيكونوا اخدوا راحة بعد 3 سنين من الدح المتواصل دون انقطاع
frontal lobe
10-14-2009, 08:34 AM
هو صحيح الكلام اللى بيتقال ان احنا سنة خامسة هيوزعوا علينا وينزلونا مكانكم ولا اشاعات؟؟


جديدة دي !! مسمعتش حاجة

بس هل القصد إنه إحنا نروح المدارس ؟؟و لا نبقى في المستشفى بدل الامتياز؟؟ (: ههه


عامة لو هنروح المدارس هيبقى كويس ،، لأن كده هنرفع من شأن دكاترة الامتياز ،، بدل الكلام الغريب اللي المذيعين بيقولوه عليهم ،، و في نفس الوقت هنوضح إننا mature لدرجة إننا تأهلنا لمركز كان المرشح ليه قبلنا هم الامتياز


يس
د أحمد سمير
10-14-2009, 09:26 AM
أنا دلوقتى بكتب موضوع عن آخر أخبار مشكلتنا

إن شاء الله هخلصه و بعدين أرد عليكم
د أحمد سمير
10-14-2009, 09:49 AM
السلام عليكم ورحمة الله وبركاته ، ازيك يادكتور أحمد ، جزاك الله خيرا على اهتمامك بالموضوع
و عليكم السلام و رحمة الله و بركاته
يا أهلا بيك يا دكتور
كويس و الله أول مرة أقابل واحد من زمايلنا هنا
ما أنا لازم أهتم بالموضوع طبعا
ما أنا معاكم فى الدفعة اههههههههه
، لكن أنا عايز أقول ان احنا عندنا مشكلة هي ان كلمتنا مش واحدة ، وكل واحد طالع برأي لوحده ، المفروض الناس تسمع بعضها ويتفقوا كلهم على طلبات واحدة تتكتب بصيغة كويسة وتوصل للمسئولين .

تمام يا دكتور
دى أهم نقطة
و عمرنا ما هنعرف ناخد حقوقنا طول ما احنا كده
فيه ناس عندها حب ظهور عايزة تطلع تتكلم و خلاص
و فيه ناس أصلا موافقة على القرار
على كل أنا شايف مثلا إنه غلط كبير إن احنا نقول ( ما نعرفش ) ( احنا صغيرين ) ، لا ... احنا نعرف ومش أقل من بعض النواب ومش أقل من الجناير اللي لسه مستلمين
تمام يا دكتور
و كلنا استفلنا فى الاستقبال و الأطفال
و كنا بنشوف حالات لوحدنا و نكتبلها علاجات و نروحها
و الله أنا فيه جناير كانوا بيجيلونا كنت انا اللى بشرحلهم و أعدل عليهم
معرفش ليه الانتقاص الرهيب ده من قدرنا ؟؟؟
وفي ناس مش عاجبها أي حاجة عايزين القرار يتلغي وخلاص ومش موافقين على أي حل تاني
معاك حق برده المفروض نبقه flexible
مادام الموضوع كده كده هيتنفذ
يبقه نوافق بس نضمن حقوفنا الأول
أولا : أن لا تضيع علينا فرصة التدريب في الأقسام التي لم نتدرب فيها بعد ، حتى لو هتقل مش مشكلة ، بمعنى إن الناس اللي فاضل لها جراحة أو باطنة أو أطفال أو نسا ممكن ياخدوها في شهر واحد ، والناس اللي فاضل لها تخدير أو استقبال ممكن ياخدوها في اسبوعين والاسبشيلاية الواحدة في اسبوعين ، يحاولوا يظبطوها ان احنا نطلع شهرين مثلا مدارس ونرجع آخر شهرين نكمل امتيازنا ، لو حتى استدعى الأمر انهم يستعينوا بالناس اللي لسه مخلصة سنة ستة بدل ما يبدؤا امتيازهم في شهر 3 يبدؤا من شهر 1 في المدارس ، المهم انهم يصرفوا ما ينفعش بأي حال آخد شهادة امتياز ناقصة

عندك حق
ما احنا قلنا كده للدكتور أشرف قالنا انه محتاج 900 واحد
مش عارف ازاى و دلوزقتى بيقولوا ال 300 الاوائل مش طالعين
و هل مثلا باقى الدفعة هيفضل فى المدارس لآخر الامتياز ؟؟
ثانيا : المقابل المادي مهم جدا والكلام عليه مهم ، وال 200 جنيه في الشهر في نظري مش كفاية ، أنا واحد جالي مدرسة في المنتزه هدفع مواصلات مش أقل من 150 جنيه ده غير فطاري أو غداياوتعبي ، وفي ناس تانية هتدفع مواصلات بس 300 جنيه وممكن يكون في ناس أكتر من كدة ، غير انك رايح مناطق نائية ممكن تدفع من جيبك للناس ، أنا أعرف أماكن ما فيهاش صيدليات أظن لازم تاخد معاك شنطة فيها الأدوية الأساسية .

تمام
أنا فيه واحد صاحبى بيشتغل نفس الموضوع ده فى البرايفت فى حضانة
بياخد 50 جنيه فى اليوم
أنا آسف اني طولت عليك ، سأكمل في وقت لاحق ولاسلام عليكم ورحمة الله وبركاته
مفيش إطالة و لا حاجة يا دكتور
و أهلا بيك فى المنتدى معانا
و عليكم السلام و رحمة الله و بركاته
د أحمد سمير
10-14-2009, 09:58 AM
السلام عليكم ورحمة الله وبركاته


كنا سمعنا الأخبار دى فى المدينة بس بصراحة مكناش مصدقيين


يعنى بنحسبه كلام فى كلام


والى سمعناه كمان يوم واحد فى الاسبوع بس هوة الى فى المدرسة والباقى عااادى فى المستشفى


مكنتش أعرف ان الموضوع جد فعلااا
و عليكم السلام و رحمة الله و بركاته
لأ الموضوع جد جداااا
للأسف
وانهرده كنا فى الباطنة محسناش باى حاجة خاااااااااالص

لإننا منعرفش الجو الطبيعى بيبقى عامل إزاى وكمان منعرفش الإمتيازمن النواب
هتلاقوا ناس بتلف على العيانين تقيس الضغط
تعمل رسم قلب
تسحب تحاليل
دول الامتياز
ناس قاعدين على ترابيزة مع الحكيمات
و بيكتبوا فى التذاكر
دول النواب
بالنسبة للموضوع نفسه

إن شــــاء الله يقبلوا المطالب وفى حالة إن مقبلوش

اكيد إن شاء الله خيير


قال تعالى : (وعسى أن تكرهوا شيئا ويجعل الله فيه خيرا كثيرا) (http://vb.q8ia.com/%d8%a7%d9%84%d9%81%d8%aa%d8%a7%d8%a9-%d8%a7%d9%84%d9%85%d8%b3%d9%84%d9%85%d8%a9/%d9%88%d8%b9%d8%b3%d9%89-%d8%a3%d9%86-%d8%aa%d9%83%d8%b1%d9%87%d9%88%d8%a7-%d8%b4%d9%8a%d8%a6%d8%a7-%d9%88%d9%8a%d8%ac%d8%b9%d9%84-%d8%a7%d9%84%d9%84%d9%87-%d9%81%d9%8a%d9%87-%d8%ae%d9%8a%d8%b1%d8%a7-%d9%83%d8%ab%d9%8a%d8%b1%d8%a7-38297/)


وحسبنا الله ونعم الوكيـــل
الحمد لله على كل حال
و محدش عارف الخير فين
بالنسبة للرجال اعتقد ممكن يستحملوا انهم بعد المدرسة ممكن شوية آخر النهار يروحوا المستشفى لحد
ميجبوا آخرهم ويروحوا

شوور الموضوع هيكون متعب ولكن كأن مثلا الصبح مستشفى وبعد الظهر العيادة حياااة الدكترة العاديه يعنى

البنات معتقدش خاااالص انهم يقدروا يعملوا كده إلا قـلة منهم

بس المشكلة الشوية الى فى نص بتوع الراحة دوول هترتاحواا فييين ؟

أكييد هتحتاجوا سكن
يا سلام يا دكتورة
يعنى الولاد اللى هيتشحططوا و يروحوا فى آخر الدنيا
فى أماكن بعد العامرية و برج العرب
يطلعوا على الكلية تانى
و البنات اللى رايحين مدارس جمب بيتهم
يطلعوا يروحوا

احنا موافقناش على الكلام ده
لإن ده هيبقه إلزام لينا
أصل الامتياز ده الواحد ليه شفت مثلا
هيبقه من 2 ل 8
مينفعش يروح أى وقت كده
و يروح لما يتعب
والى عايزة اعرفه
اشمعنى طلبة المدارس الى بيخافوا عليهم
مااحنا كمان طلبة
طيب وموظفيين الحكومة
والناس الى فى المواصلات
عاادى يعنى لو طلع عندهم الفيروس

اسكتى يا دكتورة
ربنا يكرمك
بدل ما يطلع بكره قرار
يوزعونا على وسائل المواصلات
و يقولوا عايزين دكتور امتياز فى كل مشروع
و فى كل أوتوبيس

على فكرة الكليات و المدن الجامعية
كمان هنروح فيها
بس دى لل 180 الأوائل على الدفعة

جزاكم الله خيرا
د أحمد سمير
10-14-2009, 10:00 AM
أنا سمعت ان عميد الكلية الدكتور الزلباني جه النهارده على( الحياة) وقال كلام مش كويس !!
ربنا يستر .

هوا قال تقريبا نفس الكلام اللى قالوهلنا

شوف الفيديو هتلاقيه فى الموضوع الجديد
د أحمد سمير
10-14-2009, 10:02 AM
هو صحيح الكلام اللى بيتقال ان احنا سنة خامسة هيوزعوا علينا وينزلونا مكانكم ولا اشاعات؟؟

اههههههههههههه

تنزلوا مكاننا فى الامتياز يعنى و لا فى المدارس ؟؟

أعتقد إنه حد بيهزر

دى تبقه بجد مسخرة
د أحمد سمير
10-14-2009, 10:05 AM
طيب أنا عايزة أعرف إيه ظروف سنة سادسة اللي بيمتحنوا دلوقتي ؟؟ هينزلوا امتيازهم عادي في أول مارس و لا إيه ؟؟

أنا خايفة يقولوا إنهم هينزلوا بعد الامتحانات على طول !! دول كده مش هيكونوا اخدوا راحة بعد 3 سنين من الدح المتواصل دون انقطاع

و الله محدش عارف اللى هيحصل

هما بيقولوا متوقعين إن المرض هينتشر أكتر فى 11 و 12

و احتمال فعلا يكون فيه عجز و يخلوا الدفعة الجديدة تستلم بدرى
د أحمد سمير
10-14-2009, 10:16 AM
فى المستشفى اة انا سمعت ناس قالت كدة ماعرفش فبتاكد منكم واحتمال يعملوها مش بعيدة هى جات علينا يضيعولنا مستقبلنا(أل يعنى هى ناقصة كفاية ان السنة صغرت شهرين عن كل دفعة) لان حتى دكتور احمد عثمان فى المحاضرة التمهيدية كان بيقول ان هيحطولنا نبطشيات نتعلم فيها بدل مابنخلص الكلية واحنا جهلة طبيا
كمان فى المستشفى
طيب ممكن فى المدارس كانت تبقه منطقية شوية

و بعدين طيب كده هتحضروا المحاضرات و الراوندات
و تذاكروا و تمتحنوا امتى ؟؟

هما فعلا ممكن يضحوا بيكم عشان المستشفى تمشى
و أغلب الشغل اللى مطلوب من الامتياز مش محتاج علم يعنى
أغلبه مشاوير ممكن أى حد يعملها
frontal lobe
10-14-2009, 10:23 AM
اسكتى يا دكتورة
ربنا يكرمك
بدل ما يطلع بكره قرار
يوزعونا على وسائل المواصلات
و يقولوا عايزين دكتور امتياز فى كل مشروع
و فى كل أوتوبيس

على فكرة الكليات و المدن الجامعية
كمان هنروح فيها
بس دى لل 180 الأوائل على الدفعة

جزاكم الله خيرا[/center]
[/center]
[/center]
[/center]

loooooooooooooooooooool

تبقى كملت ،،


بجد كده هيبقوا دكاترة الامتياز السنة دي زي دفعة الجيش لما تصدف حرب في نفس السنة و التوقيت


ههههههههههههههه
شهداء امتياز 2009
نور
10-14-2009, 10:25 AM
و عليكم السلام و رحمة الله و بركاته
لأ الموضوع جد جداااا
للأسف

هتلاقوا ناس بتلف على العيانين تقيس الضغط
تعمل رسم قلب
تسحب تحاليل
دول الامتياز
ناس قاعدين على ترابيزة مع الحكيمات
و بيكتبوا فى التذاكر
دول النواب

الحمد لله على كل حال
و محدش عارف الخير فين

يا سلام يا دكتورة
يعنى الولاد اللى هيتشحططوا و يروحوا فى آخر الدنيا
فى أماكن بعد العامرية و برج العرب
يطلعوا على الكلية تانى
و البنات اللى رايحين مدارس جمب بيتهم
يطلعوا يروحوا
معرفش إن الموضوع كده
بصراحة مع إنى بنت بس بحس إن ده ظلم للصبيان الى جايبين تقديرات
ممكن يوفقّوا اكتر من كده يعنى ميبعدوش البنات اوى وبرده فى نفس الوقت الصبيان الى تقديراتهم عالية ميروحوش بعيد لمجرد انهم صبيان والله اعلم



احنا موافقناش على الكلام ده
لإن ده هيبقه إلزام لينا
أصل الامتياز ده الواحد ليه شفت مثلا
هيبقه من 2 ل 8
مينفعش يروح أى وقت كده
و يروح لما يتعب

كان قصدى مش شرط يكون تحت اسم الامتياز
يعنى خلاص لو مش يبقى امتياز فى المستشفيات وبقية الامتياز هيكون فى المدارس يبقى الى عايز يتعلم يروح مع نفسه

اسكتى يا دكتورة
ربنا يكرمك
بدل ما يطلع بكره قرار
يوزعونا على وسائل المواصلات
و يقولوا عايزين دكتور امتياز فى كل مشروع
و فى كل أوتوبيس

مش قصدى
بس إن شاء الله مش هيقولوا


على فكرة الكليات و المدن الجامعية
كمان هنروح فيها
بس دى لل 180 الأوائل على الدفعة

جزاكم الله خيرا


[/center]
[/center]
[/center]

جزانى وإياكم
[/CENTER]
frontal lobe
10-14-2009, 10:28 AM
هما فعلا ممكن يضحوا بيكم عشان المستشفى تمشى
و أغلب الشغل اللى مطلوب من الامتياز مش محتاج علم يعنى
أغلبه مشاوير ممكن أى حد يعملها

أمال مغلبنا معاكم ليه ؟؟ و امتيازنا و هيصة و دوشة !!

و متضايقين إنكو هتنزلوا المدارس و تبقوا المسؤولين الوحيدين ،،

و محدش يترأس عليكم لا نواب و لا جناير و لا سناير ( أنا معرفش الأسامي دي يعني إيه !! بس هي أكيد أكبر منكم )




اللي مضايقني في الموضوع : عدم الالتزام بالتوزيع السكني للدكاترة
د أحمد سمير
10-16-2009, 03:52 AM
معرفش إن الموضوع كده
بصراحة مع إنى بنت بس بحس إن ده ظلم للصبيان الى جايبين تقديرات
ممكن يوفقّوا اكتر من كده يعنى ميبعدوش البنات اوى وبرده فى نفس الوقت الصبيان الى تقديراتهم عالية ميروحوش بعيد لمجرد انهم صبيان والله اعلم
مينفعش لإن الأماكن البعيدة كتيييييييييرة
كل الولاد اللى من بعد ال 180 رايحين أماكن بعيدة
تعتبر خارج الإسكندرية
كان قصدى مش شرط يكون تحت اسم الامتياز
يعنى خلاص لو مش يبقى امتياز فى المستشفيات وبقية الامتياز هيكون فى المدارس يبقى الى عايز يتعلم يروح مع نفسه

ممكن برده
بس الحمد لله المشكلة اتحلت حل جزئى
د أحمد سمير
10-16-2009, 06:06 AM
أمال مغلبنا معاكم ليه ؟؟ و امتيازنا و هيصة و دوشة !!


هوا طبعا بتفرق حسب القسم و النواب اللى فى المكان
بس أنا اللى أقصده
إن إحنا مفيش حد عايز يعلمنا و لا ده مطلوب مننا
يعنى احنا مثلا عندنا duties ان احنا مثلا نعمل ECG لخمس حالات
و بعدين نحطه فى التذاكر
و النايب هيبقه يشوفوه
إنما إحنا ممكن لو حد عايز يتعلم يحاول يقراه لوحده
و يناقش النايب ايه اللى طلع فيه و يشوف العيان عنده ايه
و يشوف تذكرته و يشوف بياخد ايه
انما كل ده حاجة optional
و أغلب شغل العنابر كده
فقصدى إن لو أى حد حتى لو فى أولى ممكن يستغلوه فى ال dirty
و المشاوير بتاعتهم عشان الشغل يمشى
إنما احنا حتى لو اشتغلنا 90% dirty و 10 % استفادة
يبقه أحسن ما نقضى 5 شهور فى المدارس
هننسى الطب فيهم
و متضايقين إنكو هتنزلوا المدارس و تبقوا المسؤولين الوحيدين ،،

و محدش يترأس عليكم لا نواب و لا جناير و لا سناير ( أنا معرفش الأسامي دي يعني إيه !! بس هي أكيد أكبر منكم )


معاكى حق
بس دى مسئولية برده مش ميزة بس
ما هوا الواحد فى ال private
بيبقه هوا المسئول لوحده و صاحب القرار
إنما لما يكون فيه حد أكبر مننا ممكن نرجعله أكيد ده يبقه أحسن
frontal lobe
10-16-2009, 09:40 AM
إنما إحنا ممكن لو حد عايز يتعلم يحاول يقراه لوحده
و يناقش النايب ايه اللى طلع فيه و يشوف العيان عنده ايه
و يشوف تذكرته و يشوف بياخد ايه


أيوا كده أنا فهمت

كده وضحت الأمور بالنسبة لي ،، و كويس إني عرفت الفرق بين انتين في نفس سنة الامتياز ، بس واحد بيستغلها عشان خبرته تزيد و التاني بيستغل فيها للمشاوير
و منكم نستفيد

و ربنا يعينكم و يوفقكم