إلى كل طلبة الفرقة الخامسة ........ خلاصة تجربتى

[magnacarta]

بسم الله الرحمن الرحيم
إلى كل طلبة الطب وخصوصا طلبة الفرقة الخامسة وخصوصا طب الأزهر
فى هذه الصفحات سوف أكتب خلاصة تجربتى فى هذا العام ...........
سأكتب لأنى لم أجد عند بدايتى لهذه السنة ما أقرأه عنها
سأكتب لأنى وجدت الكثيرين يكتبون عن الدروس والمحاضرات ويرفقون العديد من الشرائط والفيديوهات والدروس ......
يعطونكمن الأدوات الكثير وينسون أن يعطوك قبل كل هذا أو معه أو ربما بعده خارطة طريق أو حتى مرشدا كي يعلموك كيف تجمع هذه الأطراف العديدة مع بعضها لتخرج بمعادلة تحقق لك أهدافك من السنة
لقد إنهيت امتحاناتى وأريد أن يعرف الجميع منى خلاصة تجربتى لكى لا يقع أحد فيما وقعت فيه ..........
فقط إذا طلب منى أحد أن أكتب سأكتب فقط رد واحد وإذا وجدت حاجة لموضوعى سأكتب

[any doctor and bye]

لقد اصبت الهدف
فعلا توهان شديد وجهل اشد مع تراكم المصادر بصوره لا تتصور
فقط يبقى خارطه الطريق
فى انتظارك يادكتور وانتظار تجاربك
رغم انى لست طب الازهر ولكن اكيد هستفيد
.................................................. ......................

[حفيدة عائشة]

جزاكم الله خير
فى انتظار الموضوع

[magnacarta]

بسم الله الرحمن الرحيم
أولا أشكر من رد على الموضوع
ثانيا أحب أن أوضح نقطة فأنا لم أطلب من أحد أن يرد على موضوعى فقط حبا فى أن أشعر بقيمة ما أو سعادة معينة ولكن فقط لأننى ومنذ فترة طويلة من حياتى قررت ألا أتحدث إلا عندما يكون هناك حاجة للكلام فقد قررت أن أكف عن الثرثرة وأن أتحدث فقط ليس لمن يريد أن يسمع ولكن لمن هو فى حاجة إلى أن يسمع
ثالثا هدفى من هذا الموضوع هو أن نتحدث سويا ......ففى كل الأوقات يجب أن نتبادل اّلأفكار وسوف أكون سعيد إذا وافقنى أحد فى أفكارى ولكنى سأكون أسعد إذ اختلف معى أحد ليضيف لى جديدا أو ليقيم عندى معوجا
رابعا ندخل فى الموضوع
سوف أتحدث فى كل رد عن نقطة معينة أو نقطتين وأفضل أن لا ننتقل إلى نقطة أخرى حتى نفرغ من هذه النقط وذلك حتى لا تتداخل الأمور وحتى لا يتحول الموضوع إلى كلمة فى طابور الصباح
النقطة الأولى: رفع الواقع
قدرنا منذ اخترنا هذه الكلية كمجال للدراسة أن نواجه كم مهول من المشكلات والمتناقضات الإجتماعية فمن جهة ينظر إليك بعض الناس على أنك متفوقا ومتعلما جيدا وذو مستقبل باهر فى الوقت الذى تجد نفسك فيه محاطا بكمية ضخمة من المعلومات والكتب لا تستطيع أصلا أن تحيط بها فضلا عن أن تستخدمها فى تطبيق عملى خصوصا فى مراحل الدراسة وبعد انتهاء هذه المرحلة تجد نفسك فى مواجهة واقع أليم فإذا لم تكن من أوائل دفعتك فستجد نفسك فى مستشفيات الوزارة بلا زاد إو زواد وإذ قرت ن تخوض معارك الزمالات أو المعادلات فأنت تحتاج إلى ميزانية ضخمة وفى نفس الوقت يجب عليك أن تبدأ حياتك العائلية أن تتزوج وأن يكون لك بيت وأسرة براتب مناسب ودخل يحفظ لك ماء وجهك وستجد نفسك مضطرا إلى أن تعمل فى مصتوصفات وأعمال جانبية تأخذك عن الأمور التى يجب عليك أن تكون متفرغا لها وفى نهاية المطاف ستجد نفسك بين أمرين أحلاهما مر وقد تكون كالمستجير من الرمضاء بالنار
أنا لا أقول هذا الكلام لكى أحبط الناس فأنا من أشد أعداء الإحباط واليأس ولكن أقول هذا الكلام لكى تدرك طبيعة المعركة ولكى تدرك حقيقة هامة هى أن ماتصنعه اليوم هو ماستحياه غدا هو أن التقدير الذى ستحرزه فى هذا العام ستبقى أسير له طيلة حياتك وأنه لا مجال للأوهام والأحلام والنت والقهاوى والعلاقات الغرامية والنوم والكسل والأنتخة وأنه قد آن الأوان أن تدرك أنك إذا تركت الأمور تسير بطريقة تلقائية فإنه ستسير من سيء إلى أسوء وأنه آن الأوان أن تكون أنت قائدا وموجها لحياتك آن الآوان أن نتخلى عن سياسة القطيع *خاص لطب الأزهر الله أعلم بالكليات التانية* أن الآوان أن تختار فقط لأنك مقتنع ولأن هذا هو ما يقتضيه الواقع والمصلحة لا لأن أخيك الأكبر كان يذاكر من هذا الكتاب ولا لأن دى الموضة ولا عشان كل الناس بتعمل كده ارحمونا واصحو كل سنة بتحصل نفس المهازل عشان كل سنة كل الناس بتعمل كل سنة زى بعض .....كل سنة الmcqصعب طبعا عشان كل سنة بنذاكر من نفس الكتاب اللى ماينفعش نحل منه mcq ......كل سنة نقول الغياب عليه درجات كتير حرام كل الدرجات دى تضيع عشان الغياب عشان كل سنة بنتوارث من بعض إن الحضور مالهوش لزمة سلسلة لازم تتكسر ولازم نخرج من قمقم التقليد الفظيع ده
المهم أنا حاسس إنى طولت لازم نبدأبال 3 خطوات دول:
1-لازم تكون واضح مع نفسك أنا عايز أوصل فى مجالى لحد فين دكتور نص كم ولا ربع كم بصراحة أنا شعارى فى هذا الموضوع هو قول المتنبى
إذا ما كنــــــت في أمر مروم فلا تقـــــنع بما دون النجوم
فطعم الموت في أمر حـــــقير كطعم الموت في أمر عظيم
وطبعا تفوقك كطبيب مش بس درجات ولكن فى عوامل تانية كتير ولكن منها الدرجات وبما إنك الآن فى مرحلة إحراز الدرجات فلازم يكون ده شغلك الشاغل

2-عايز أجيب كام السنة دى :بعد ماعرفت الواقع الأليم اللى احا هانواجهة بعد التخرج اختر لنفسك ما شئت وعلى فكرة أفضل الأماكن فى الجامعة طبعا ولكن هذا لا يمنع إن بره الجامعة فى أماكن كويسة برده الموضوع يا إخوانى مش موضوع يا جامعة يا بلاش لا طبعا ولكن يجب أن تكون على يقين من إن كل درجة هاتجيبها هاتبقى بلنسبة ليك أمل فى يوم من الأيام فبلاش تضلمها على نفسك من دلوقتى
وعلى فكرة الموضوع مالهوش علاقة بتقدير سنة رابعة خالص يعنى لو فاشل فى سنة رابعة *آسف على التعبير * فهذا لايمنع انك تجيب امتياز فى سنة خامسة وترتب كمان مع ملاحظة إن غالبية الطلبة كانو واقعين فى تانية وتالته وكمان درجات رابعة مش كتير زى سنة خامسة يعنى ببساطة وبحسبة عقلانية تقدر تظبط نفسك فى سنة خامسة وتظبط وضعك فى دفعتك وعلى أقل تقدير تقدر تلحق أى نيابة جامعة وبعديها هاتحس إنك مش مزنوق فى أى زمالة أو معادلة لكن كل حاجة هاتيجى بالراحة وبهدوء عشان ساعتها هاتحس إن النيابة هاتظبط حاجات كتير
طب ليه أنا قلت الكلام ده
عشان تحلم وتوسع طموحك وماتخليش الواقع أيا ما كان يكتفك
عشان تعرف حقيقة هامة إن ول الدفعة زى آخر الدفعة بالظبط الفرق لوحيد هوه التركيز والمجهود ودى مسألة هانقشها بعدين

3-لازم تتعلم من أخطائك فى سنة رابعة وتشوف ايه هى نقاط الضعف ونقاط القوة وتستعيد ذكرياتك فى كل السنين اللى فاتت وتشوف ايه اللى كان سبب فى تفوقك وايه كان سبب فى المشاكل ده عشان انك لازم تؤمن بحقيقة هامة هى انك مستحيل تغير من وضعك إذا فضلت تواجه نفس المشاكل بنفس أسلوب التفكير لازم تعرف فين الخلل
آسف جدا على التطويل لكن ده أطول فصل فى الموضوع ده لأنى مؤمن إن تظبيط الدماغ والأفكار هوه أهم خطوة فى تحقيق الأهداف أنا عارف إن الكلام فى النقط دى ممل جدا لكن ده من وجهة نظرى أهم خطوة ووضوح الحاجات دى فى ذهنك هو اللى هايديك الوقود اللى هاتمشى بيه فى الماراثون الطويل بتاع سنة خامسة "شهادة ياناس"
أنا عارف ان النهاردة مبارة مصر وأفريقيا فى نهائى مش عارف ايه ياله ربنا يعين كل حى على حاله
مستنى ردودكم وانتظرونى
فى الموضوع القادم
كيف تختار الكتب والشرائط المناسبة
كيف تبدأ المذاكرة

[حفيدة عائشة]

جزاكم الله خيرا

حقا استفدت من هذه الكلمات

متابعين

[dr moslma]

جزااااااااك الله خيرا بس فعلا محتاجة الكلام دة بس اقبل ما اخلص خامسة
الحمد لله علي حال وربنا ييسر في اللي باقي منها
ويكرمنا في ساته
بس ياريت تكملها يا دكتور لانها هتفرق كتيييييييييير مع الناس اللي لسه داخلة
خصوصا موضوع انهم ممكن يشد حيلهم ويعملوا اللي معملهوش في ال4 سنين اللي فاتوا
بس الموضوع محتااج مجهوووود وطول باااااااااااال اوووووي
بس مفيش حاجة صعبة بس الواحد يعمل اللي عليه
ربنا يوفق الجميع

[magnacarta]

بسم الله الرحمن الرحيم
بعدما وصلنا إلى هذه النقطة من تحديد هدفنا ووضوح نقاط الضعف والقوة فى أسلوب المذاكر ممكن نبتدى فى الخطوةالتانية وهى البداية
ومن هنا هايبتدى الكلام يتقسم إلى طريقين طريق الباطنة وطريق الأطفال
أولا الباطنة:
طبعا كلنا عارفين لعبة المتاهة إلى كنا بنلعبها زمان إلى هى عبارة عن هدف معين المفروض إننا نوصله ولازم نختار طريقنا ليه من وسط خمسين طريق ملعبكين وشكلهم يسد النفس الناس هنا بتفكر بطريقتين الأولى هى محاولة البدء من أى طريق لعل وعسى اننا نوصل فى الآخر ودول أحيانا بل غالبا بيتعبه جدا عشان يوصله للهدف وقد يفاجأه فى نهاية طريق ما بإنه طريق مغلق ومش هايوصله لحاجة وانه وجع قلبه أونطه التانيه هى انك تبتدى من الآخر يعنى تبتدى من الهدف وتحاول تنزل منه لنقطة البداية وهنا هاتقل احتمالات الخطء أو تكاد إنها تنعدم وبص للصورة عشان الأمور توضح أكتر
http://up4.m5zn.com/9bjndthcm6y53q1w0kvpz47xgs82rf/2009/11/15/05/enrylig65.jpg (http://www.tobikat.com)
أخرج من المقدمة دى للواقع
دلوقتى ياسيدى الفاضل انت لازم تفكر بعقلية آخر السنة وتسأل نفسك أنا هاواجه ايه
الإجابة هى انك ها تواجه الآتى:
1- امتحانات تعتمد على المهارات وتشمل الclinical , x-ray,ecg,clinical pathology
2 - امتحانات تعتمد على الحفظ والقدرة على كتابة أكبر كمية من المعلومات بأفضل أسلوب عرض فلى أقل وقت وهى متحانات ال تحريرى
3- امتحانات تعتمد على ال show وحسن تنظيم الأفكار والثقافة العامة وهى ال oral
ومن هنا هاتعرف ازاى تختار مصادر المذاكرة والشرايط
يعنى والكلام من أول هنا عرض وطلب بمعنى كل واحد يعمل اللى يريحه
عشان تعمل أعلى سكور فى التحريرى لازم تذاكر من كتاب فيه الصفات الآتية منظم مختصر سهل انك تلمه كله مش بس الشيت اسلوبه مشجع للمذاكرة وأفضل الكتب بالنسبة للصفات دى هى كتب الدكتور مجدى اسحاق يليها كتب الدكتور أسامة محمود يليها كتب الدكتور الهوارى وأنا بأكد على فكرة انك ماتتعملش مع الكتاب بالكيلو الحجم مش هو الفيصل لكن الفيصل هو الكتاب اللى اسلوبه يساعد فى مذاكرته
كتب مجدى اسحاق ممتازة من ناحية العرض والترتيب وبرمجة المخ وسهل تتلم عكس المشاع عنها كمان فيها خاصية حلوة جدا لو موضوع حجمها قلقك ان الدكتور مجدى عامل كتاب summery رائع يعنى لو ذاكرت طول السنة من الكتب دى وقبل الإمتحان بشهرين ركزت بس فى الsummery العملية هاتبقى لذيذة جدا
كتب الدكتور أسامة محمود بصراحة الراجل ده اختراع ظاهرة يجب دراستها وكتبه من أروع مايكون ومنظمة و سهلة العرض ولكن عيبها من وجهة نظرى هو انها مختصرة أوى فى المواضيع المهمة وفيها فى المقابل مواضيع تعتبر من قبيل الترف الفكرى وجايز إن الدكتور حب يجمع أكبر كمية من المواضيع فى أقل عدد من الصفحات وربما إن ده كويس بالنسبة لعين شمس لكن بالنسبة لطب الأزهر وعلى ما أعتقد القصر العينى مش مناسب إطلاقا لأنك لازم تهتم بمواضيع معينة فى كل برانش فقط
كتب الدكتور الهوارى ممتازة طبعا لكن انسى انك تحل منها mcq الأزهر أو انك تجاوب منها أسئلة الشفوى الفظيعة بالأضافة إلى ان فيه برانشات واقعة تماما وعلى رأسها rhumatology اللى حتما إنك تقراه من مصدر تانى هى بصراحة ممتازة للتحريرى فقط وده خاص بطب الأزهر أم القصر ربما تكون الأمور مختلفة
ده بالنسبة للكتب طيب بالنسبه للشرايط والدروس
الشرايط دى وهم علمى يا جماعة أنا بقول ده رغم إنى فضلت لحد شهر 7 أسمع مضيعة للوقت وتشتيت للمخ بلا طائل والحجج اللى الواحد بيقنع نفسه بيها لا تعد ولا تحصى وتشمل أنا عايز أفهم طب واتعلم ماشى ياريس أضى طول السنة إفهم واتعلم وبعدين إرجع احفظ عشان التحريرى وابقه قابلنى لو السنة كفت لاحظه يا جماعة ان الباطنة مادة انشاء زى مواضبع التعبير وده معناه إنها لازم تتقرى مرة واتنين وتلاته ويمكن اربعة عشان تثبت فى دماغك ولازم تستعمل كل الأساليب الممكنة والغيرممكنة وانت بتذاكر عشان تثبت المعلومة زى الكتابة تناقش واحد صاحبك وغيره هاناقش المواضيع دى بعدين ولازم تحل امتحانات كويس وتستعد للتحريرى ببروفات قبل ماتخش الإمتحان خلاف كده لو دخلت لجنة التحريرى مع الضغط النفسى مع اسئلة الباطنة اللى أحيانا بيبقه فيها مفاجآآآآت مش هاينفعك أى معلومة زيادة ومش هاتكتب فى ورقة الإمتحان الا المعلومة اللى ثبتت فى دماغك طول السنة والحشو والزيادات هاتبقى يعوض الله
طيب هل معنى كلامى إنك ما تفهمشى يعنى وانقضيها صم ؟
لا طبعا ولكن لازم توضح لنفسك ايه نوع الفهم المطلوب منك انك تحصله فيه ناس بتشغل بلها بالشغل العملى يعنى مثلا لو جالى عيان hepatic encephalopathy أعمله ايه واسمع الشرايط بأه ياسيدى وعيش مع الenema وطريقة عملها وتركيبها يعنى ايه lactulose ويعينى على ال neomycin ولو العيان عنده مشاكل رنال يبقى استخدم ال ميترونيدازول وتعيش وتستمتع وتفاجأ فى الإمتحان بسؤال عن الpathogenesis أو فى العملى بسؤال عن علاقة ال diuritic ب ال hepatic encephalopathy وانت طبعا عايش فى أوهام الطبيب المخضرم وديناصور الطب المنقرض
اللى أقصده باختصار إنك مطلوب منك انك تفهم فى حدود انك طالب وفى حدود ال basic اللى المفروض عليك تتعلمه مش مطلوب منك انك تعالج ده أوتشخص دى المطلوب منك فقط انك تعرف المعلومات كويس وتفهم جت منين وراحة فين وبعد ما تتخرج هاتشبع تشخيص وعلاج أنا اعرف دكاترة بيهربه من المرضى ويشيله فيشة التليفون
ده بالإضافى إن كل حاجة فى الباطنة انت درستها قبل كده بصورة أو بأخرى فى السنوات السابقة ولو مش مصدقنى هات كتاب الفسيولوجى هاتلاقى فيه ال puse بالتمام والكمال ومعه كمان ال arrythmia وغيرها كتير يعنى الموضوع مش معجزة ولا كلام جديد
ده باختصار خلاصة موضوع الشرايط بس لو انت حابكة معاك أوى ممكن تسمع حد من الناس المختصرة زى حسام أو أحمد موافى أكتر من كده ما يخشش زمتى ببصلة
وأشهد الله واشهدو وافتكرو كلامى ده كويس لما ييجى عليك شهر 8 هاتلاقى الرعب اشتغل وهاتلاقيك سعيد جدا بكل موضوع ثبته فى دماغك وكل موضوع مذاكرة حتى نص نص ها يبقى جبل وهم مايتلم
أما الدروس فينطبق عليها نفس كلام الشرايط ماعدا نقطة واحدةهى انها بتوفرلك نوع من الإلتزام والنظام فى المذاكرة لكن ده حتى ممكن تستغنى عنه لو انت فعلا شايل الهم ومقدر المسؤلية
الخلاصة يا جماعة انك تختار كتاب كويس وتذاكره كويس هو ده اللى هاينفعك
على فكرة النظرى هو الأساس هوه اللى هتحل بيه التحريرى وهو أساس فهمك للعملى وهو اللى هاينفعك للشفوى عشان كده لازم تختار كتاب كويس من وجهة نظرى يا مجدى يا أسامة وبلاش الكتب اللى أخنى عليها الدهر
وتأكيدا لكلامى لا حظ الآتى امتحان التحريرى عليه 200درجة وال mcqعليه 90درجة والشفوى 80 درجة ومالا يقل عن تلت العملى نظرى يعنى 100 درجة كمان تبقى الحسبه كلها 470 درجة على النظرى يبقى الحل يا جماعة اننا نختار كتاب كويس ونركز فيه وبلاش أى تشتيت من أى نوع
موضوع العملى والحاجات المهارية بأه يا سيدى الحاجات دى ماينفعش فيها نوم وتراكم طول السنة وبعدين تصحى وتلم فى الآخر مش هينفع وعلى فكرة الكلا ده ينطبق على السنة كلها لكن العملى أكتر بمعنى انك لازم تعرف كويس ان مستواك فى ال clinical بيتبنى يوم بعد يوم والمعرفة فى المجال ده تراكمية
لازم تدرب ايدك طول السنة وتذاكر عملى كويس وتتفرج على فيديوهات وتشوف الأساتذة فى الكلية بيشتغله ازاى وتتدرب مع زمايلك وعلى اخواتك فى البيت ده الحل الوحيد لو عايز تبقى كويس فى ال clinical
مصادر الكلينيكال بتعتمد على انك تروح درس ولا لا
نصيحتى مفيش داعى تروح دروس لان الحالات فى الحسين بأت acute ومضى عهد ال chronic ودى كانت الفكرة اللى قايمة عليها الدروس لكن ممكن تاخد مراجعة فى آخر السنة عند دكتور واحد أو اتنين وده أفضل وفى الحالة دى لازم تذاكر من مصدر محترم وعلى رأسهم الدكتور أشرف زكى وتسمع شرايطه لو حابب و بالنسبة للأزهر كتاب الدكتور أحمد مسعود ممتاز ولكن كتاب أشرف أحسن منه ولو هاتروح درس مش مشكلة زاكر من كتب الدرس أو ذاكر من كتاب العملى بتاع الدكتور مجدى اسحق
ملحوظة كتاب الدكتور مجدى ينفع فى حالتين لو انت بتروح درس أو لو انت بتذاكر من حد زى أشرف زكى وعايز تلم منه فى آخر السنة خلاف كده ماينفعش تعتمد عليه من أول السنة لو انت مابترحش درس "مش هاتفهم حاجة"
أما بالنسبة للجلدية فدىأحسن كتاب شفته فيها هو كتاب اسمه medicine is easy بتاع دكتور اسمه محمد عبد الراضى هوه كتاب مميز جدا وحجمه كده غريب طويل "فى الحجم "وعريض عامل زى الدوسيه ده كتاب مختصر وطريقة عرضه فوق الممتاز ويناسب الإمتحان الشفوى بتاع الجلدية
أما بالنسبة لل clinical pathology فده مذكرة الدكتور محمد ناصف من القصر العينى وبيتصور فى مكتبة القصر العينى وده أكتر من ممتاز ولا زم يا بطل تتدرب كويس جدا على حل التقارير
وبالنسبة لل xray , ال ecg ففيه مصادر كتير فضلهم مذكرة الدكتور علام ودى عارفينها كويس طلبة الأزهر وفيه برده مذكرة الدكتور محمد ناصف السابق الإشارة اليها
ملحوظه هامة
اختار الكتاب اللى يناسبك بناءا على العناصر السابقة وبعد كده استخير ربنا وبعد كده لو اطربقت السماء على الأرض وطلع إعلان رسمى من الأمم المتحدة ان الكتاب ده وحش وإن اللى هايذاكر منه هايسقط برده ماتسيبوش واحذر تغيير الكتاب "أول خطوة نحو الفشل"

ياريت يبقى فيه تواصل أو مناقشات والمرة الجاية هاتكلم عن الأطفال وطريقة مذاكرة الباطنة
أرجو ان كلامى يكون مفيد
والسلام عليكم

[kimobeh]

بجد انا مش عارف اقولك ايه...الف شكر

[فجر الامل]

بداية جزاك الله كل خير ولكني لاحظت أنك لم تتطرق للمنصورة

[the legand]

يا دكتور كلام حضرتك مع احترامى ليك لم يضف لى اى جديد
قد يكون لسببين اما
انا عبقرى اوى وكل الكلام دا ياما قريته وسمعته من ناس تانية وزلم يقدم اى جديد فى عالم الباطنة
او انا بقى اللى مش بفهم حاجة

يا دكتور كتب مجدى اسحاق مين واسامه مين ...دا كل دا كتب ما فتحتها قفلتها تانى
كنت متخيل يا دكتور هتقول ليا مصدر اللى هوا فى الباطنة ...مصدر يكون قمه ...مختلف فيه ابداع

بالنسبة للاطفال ...فالمناهج مختلفه اصلا بين كليات مصر ....
الباطنة هيا اللى نفسها

تقبل رايى من دون زعل...بس فعلا انا قلت الحقيقة

[magnacarta]

يا دكتور كلام حضرتك مع احترامى ليك لم يضف لى اى جديد
قد يكون لسببين اما
انا عبقرى اوى وكل الكلام دا ياما قريته وسمعته من ناس تانية وزلم يقدم اى جديد فى عالم الباطنة
او انا بقى اللى مش بفهم حاجة

يا دكتور كتب مجدى اسحاق مين واسامه مين ...دا كل دا كتب ما فتحتها قفلتها تانى
كنت متخيل يا دكتور هتقول ليا مصدر اللى هوا فى الباطنة ...مصدر يكون قمه ...مختلف فيه ابداع

بالنسبة للاطفال ...فالمناهج مختلفه اصلا بين كليات مصر ....
الباطنة هيا اللى نفسها

تقبل رايى من دون زعل...بس فعلا انا قلت الحقيقة
أخى العزيز لا يوجد زعل من أى نوع
الحاجة التانية اعذرنى أنا آسف مش قادر أفهمك
يعنى ايه "دا كل دا كتب ما فتحتها قفلتها تانى "
"كنت متخيل يا دكتور هتقول ليا مصدر اللى هوا فى الباطنة ...مصدر يكون قمه ...مختلف فيه ابداع"
ممكن قصدك بالعبارة الأخيرة انك مش مقتنع بالكتب دى ولا ايه رجوك وضح أكتر
وجزاك الله خيرا
واقبلنى كصديق

[magnacarta]

بسم الله الرحمن الرحيم
أرجو أن يكون الجميع بخير وأسأل الله العلى الكبير أن يرزقنى وإياكم فى هذه الأيام حسن الطاعة وثواب العمل الصالح وأن يجعلنا من أهل الجنة وأهلا لها إنه ولى ذلك والقادر عليه آمين
أولا يا جماعة أنا عايز أوضح شوية نقط
أولا : أنا مش فاتح الموضوع ده عشان أأول ذكره منين ولا متذكروش منين أنا بس كل اللى عايز أوصله للناس هو ذاكره إزاى ده لأن ببساطة عمر الكتاب اللى هاتذاكر منه ماهيفرق الفرق الكبير اللى يخلينا نعمله موضوع ونعد نتناقش فيه لكن طريقة المذاكرة والأخطاء الفنية فيها هى فعلا كل القضية ولاحظه كويس أوائل الدفعات بيذاكره من الكتب اللى فى إدينا مش من كتب من كوكب تانى لكن اللى بيفرقهم عننا هو إزاى بيذاكره
ثانيا :ياجماعة أنا مش علامة ومش بكتب عشان ااول ألعاب سحرية تعملها فتحقق أهدافك فى ساعة زمن لا أنا راجل زيى زيكم وممكن أأقل كل الحكاية إنى خضت تجربة معينة فاحبب إنى وصل للناس تجربتى دى لأن اللى قابلى ماقلوش ليه حاجة فنفسى طلبة الطب فى كل السنين يحله ألغاز الكلية دى قبل فوات الأوان وللإسف نظام التعليم اللى عايز ناس تحل ألغازه ده نظام فاشل
ثالثا: لو حد عايز يعرف يذاكر منين أو ايه هى الكتب اللى كويسة أو من طب المنصورة أو غيره بالتأكيد يا جماعة أنا مش هافيدك إطلاقا
فيه ناس عاملة مواضيع بتتكلم فيها عن النقط دى وبتتكلم أحسن منى كمان لكن أرجع وأقول ده مش موضوعى أنا هنا بتبادل خبرة عملية مع زمايلى بس فنيات وتريكات فعلا محتاجين إننا نعرفها قبل مالسنة تفرك من إيدينا وتبص تلا قى نفسك شغال بنظام تقضية الواجب أى كلمتين يتكتبه فى الورقة وأى بقين يتقاله فى الشفوى وكأنك يابو زيد ماغزيت
ولا حظه ياجماعة ان السنة دى كلها حاجات تقديرية بمعنى إنك فى كل امتحان حتى لو مذاكر كويس برده درجتك بتخضع لتقدير الكتور فمبالك كمان لو مش منظم ومش مرتب أفكارك
رابعا الناس اللى مابتستفيدش أى حاجة كويس والله ان فى ناس أحسن منى وعقليتهم معديانى بمراحل الحمد لله نفسى أرفع راسى وسط الأمم وقولهم فى ناس زمايلى يطحنوكم
نتكلم بقى عن خطة مذاكرة الأطفال
الأطفال ياأحبابى يجب أن ننظر ليها على إنها شقين
شق عيالى بحت pure paediatrics وده بيضم حاجات أول مرة تسمعها ولا غنى عن ان انت تذاكرها كويس جدا من أول السنة وده يمثل 30% من الماده ويشمل : neonates-feeding-grows-development-genetics-diarrhea-ors--**
وقسم عيالى نص نص وهو الجزء المعتمد على الباطنة وده هاتحتاج بس انك تظبطه من الأطفال قراية كده على الماشى ومش مرهق أوى لإنك هتذاكره أو هاتذاكر أفكاره الأساسية من الباطنة وده يمثل 60%من الأطفال ,
ازاى أتعامل مع النص الأولانى
1-لازم يتذاكر أكتر من مره ويتقرى عشروميت مره طول السنة لأنى كله مواضيع تجيب الضغط خصوصا مواضيع زى الdevelopmental milestones لازم تحفظها صم المواضيع دى لا تقبل القسمة على اتنين
طيب ليه كل الإهتمام ده بيها أأولك
لأن الحاجات دى عمرك ماسسمعت عنها فى حياتك تماما
لأن الحاجات دى ماينفعش تتألوظ آخر السنة تشيتها تحفظ العناوين وتطنش التفاصيل ماينفعشى
لأن الحاجات دى تمثل 40%من عملى الأطفال ومش أقل من 60% من ورقة التحريرى
لأن كلها وعلى أسوأ الإحتملات مش هاتعدى 70 أو 80 صفحة يعنى ممكن تعتبرها برانش باطنه وتديلها شوية اهتمام
لو نجحت انك تكون مذاكرهم تمام يبقى مبروك عليك الأطفال فى آخر السنة المواضيع التانية مش هاتاخد منك 3أيام مذاكرة و3تراجع البرانشات اللى احا بنتكلم عنها وتخش الإمتحان وانت فى دماغك 95% من الأطفال بذمتك عمرها حصلتلك دى!!
وكخطة مبدأية ممكن تعملهم ساعتين فى الأسبوع وليكن يوم الجمعة وتواظب عليهم
أما الحاجات العيالى نص نص فدى ممكن تتعامل معهم بالطرق دى
جمد قلبك وذاكر باطنة كويس وسيب الأطفال النص نص دى لآخر السنة مش قضية خالص
أو بعد ماتخلص برانش باطنة تاخد معاه مايقابله من الأطفال يعنى CNSباطنة مع CNSأطفال "بصراحة ما شجعكش يفتح الله ياعم "
نصائح عامة للأطفال
1-الأطفال مادة تجميع درجات حرام عليك تنقص فيها أى درجة اهتم بيها زى ماقلتلك
2-لو كان حظك مش ظريف وبدأت أطفال من أول السنة فانت هاتكره نفسك هاتلقيهها مادة رخمة لأنك فى الحالة دى مطلوب منك إنك تفهم باطنة بالمشقلب بمعنى إن الباطنة هى الأصل والمفروض طبعا إن الإطفال هى مجرد تظبيطات من الباطنة بوجهة نظر عيالى يعنى :
درس ال CEREBRAL PALSYدرس مقدس فى الأطفال لو بدأت تذاكره من الأطفال أولا هاتحس إن هو موضوع مبتور يعنى هاتلا قى مصطلحات غريبة مش هاتقدر تفهمها زى SPASTICITY -DYSTONIA -RIGIDITY- ATAXIA وغيره لأن المواضيع دى أصلا باطنة لكن لو بدأت باطنة هاتلاقى المواضيع دى تافهة جدا
الخلاصة : لو بدأت أطفال أعمل ايه أو لو فى أول السنة أعمل ايه فى الأطفال
هاأولك ركز جدا على ال PURE PAEDIATRICS اللفظ ده من اختراعى وذاكرها كويس ولو العملية مزنقه معاك أوى اسمعهم من أبو الأسرار والباقى طنش وفرفش وعيش وفى آخر السنة أو حته على شهر 7 كده ممكن تفضيلهم يومين بس ساعتها يكون عودك نشف فى الباطنة والأمور تبقى أسهل كتير
مصادر مذاكرة الأطفال
بالنسبة لطب الزهر لازم تذاكر من كتاب القسم مافيش حل يابنى دول بيجيبه الأسئلة بالنص وكتبين كلام عجيب مش موجود إلا عندهم مافيش حل أعصر على نفسك لمونة وذاكر منه وفى المشاركات الجاية هاقولك تمشى فيه إزاى
باقى الجامعات بقه فأهل مكة أدرى بشعابها بس بصراحة مذكرة الدكتور مصطفى زكريا رائعة وكتاب BABY NILSON بتاع المنصورة ده أكثر من رائع
بالنسبة لعملى الأطفال فنفس التقسيمة برده تنطبق عليه فى حاجات برده أطفال بس وحاجات تشترك مع الباطنة
أفضل الكتب فيه بصراحة كتاب TOP بس اللى أحسن منه SHOTS واللى أحسن منهم كتب الدكتور ناصر جمال هو عامل كتابين واحد ع ال EXAMINATION بس والتانى عن الحالات المختلفة ازاى تاخد شيت وايه ال FINDING اللى فيها
ملحوظة على عملى الأطفال
1-هوه صغير ويتلم ومتقلقش منه خالص
2-فى حاجات مهمة لا زم تتدرب عليها كويس جدا زلى استخدام ال GROWTH CHARTS وزى ال IMCI مهم جدا بس برده ماقلقش منها
أرجو اننا دلوقتى يكون عندنا وجهة نظر وخلفية جيدة عن كل مادة والطريق يكون واضح ونقدر نعرف كويس احنا جايين منين وراحين فين وبنحط رجلنا فين
أنا كل قصدى من الموضوع هو اننا نفتح لبعض الطريق شوية وزى ماقلت قبل كده الكلام ده عرض وطلب يعنى كل واحد يعمل اللى يريحة
وما كان من صواب فمن الله وما كان من خطئ فمنى ومن الشيطان
والسلام
فى المشاركة الجاية :
على طريق الباطنة معا خطوة بخطوة

[any doctor and bye]

جزاك الله خيرا وفى انتظار المزيد

[حفيدة عائشة]

جزاكم الله خير

بس انا مش مع حضرتك فى ان الدرس مش مهم فى الباطنة

انا شايفة ان الدرس مهم جدا عشان افهم كل حاجة جاية منين ورايحة فين زى ماحضرتك قلت

والحاجة اللى بتكون مفهومة بتثبت اكتر وبتكون مراجعتها سهلة

وكمان عشان المتابعة والمواظبة

واللى مش هياخد درس يسمع

ماعتقدش ان الكتاب كافى اننا نعتمد عليه بتهيالى لازم شرح

شرح دكتور اسامة مايتعوضش وانا شايفة اللى مش هياخد عنده درس يسمعه(ده رايى)

وجزاكم الله خير مرة تانية الموضوع مفيد جدا

[magnacarta]

جزاكم الله خير

بس انا مش مع حضرتك فى ان الدرس مش مهم فى الباطنة

انا شايفة ان الدرس مهم جدا عشان افهم كل حاجة جاية منين ورايحة فين زى ماحضرتك قلت

والحاجة اللى بتكون مفهومة بتثبت اكتر وبتكون مراجعتها سهلة

وكمان عشان المتابعة والمواظبة

واللى مش هياخد درس يسمع

ماعتقدش ان الكتاب كافى اننا نعتمد عليه بتهيالى لازم شرح

شرح دكتور اسامة مايتعوضش وانا شايفة اللى مش هياخد عنده درس يسمعه(ده رايى)

وجزاكم الله خير مرة تانية الموضوع مفيد جدا
فيه معادلة جامدة جدا اللى يعرف يحققها يبقى أسد هى
1-إنك تروح درس أو تسمع شرايط..........فتفهم
2-وتحضر فى الكلية ............فتعرف المطلوب منك"ياسعدك لو دخلت فى شفوى أو عملى على دكتور كان بيشوفك وانت بتحضرله"
3-وتذاكر كويس جدا............فتحل كويس جدا
اللى يعرف يوزنها......................... يكسبها
واللى مايعرفش يبقى لازم يتخلى عن شىء وإلا هايخسر كل شىء
شكرا على مرورك

[king5]

بارك الله فيك

[makarona]

:gzak:

معادلة صعبة فعلا دروس ومحاضرات ومذاكرة .. حاجة تجيب الضغط
أنا في الفرقة الخامسة جامعة الأزهر فعلا بروح درس عند د/ أسامة هو بصراحة ممتـــــــــــاز
بس المشكلة إني حاسة إن اليوم بيضيع مني
وأنت عارف طبعا المستشفى والمدينة والدروس غير المذاكرة والامتحانات المفاجئة
غير الكتب فيه يقولي كتاب د/ سامح لبيب G.I.T هأقدر أذاكره منه وأجمعه يوم الامتحان
هو أسلوبه سهل وجميل جدا بس حاسة إن فيه معلومات غير مكتملة كمان اشتريت liver د/ أسامة هو كويس بس حاسة إن اللي بذاكره تاني يوم أنساه وفيه اللي قاللولي أذاكر من الفطاطري liver يعني معايا 3 كتب في برانش واحد ده غير البرنشات التانية كل برانش منه كتابين ومحتارة بس حاليا متابعة مع د/ أسامة
أنا بدأت باطنة وبحضر الروندات (بس) .
وبأخد عملي عند د/ علام وبذاكر من مذاكرته
ونظري عند د/ أسامة ومتابعة معاه
بس حاسة ان درس النظري بيضع لي وقتي
بس برده بيفدني طبعا بذاكر معاه وبفهم حاجات كتير
أنا عارفة طولت عليك بس اعذرني أنا تايه ومحتارة
ممكن مســــــــــاعدة لأن مش لاقية حد أسأله الكل بيقول متقلقيش السنة لسه طويلة
بس أنا مش عايزة أضيعها بجد
دبرنـــــــي يـــــا وزيـــــــــر
(بخصوص الكتب اللي بذاكر منها والدرس)

وجزاك الله خيرا عن طلبة الأزهر جميعا
أرجو الرد سريعا لو سمحت

[التائبة الى الله]

لو كان حظك مش ظريف وبدأت أطفال من أول السنة فانت هاتكره نفسك هاتلقيهها مادة رخمة لأنك فى الحالة دى مطلوب منك إنك تفهم باطنة بالمشقلب بمعنى إن الباطنة هى الأصل والمفروض طبعا إن الإطفال هى مجرد تظبيطات من الباطنة

دعواتكم بقى ما نتعقدش لاننا بادئين اطفال ....
وشكرا جدا ع الموضوع ...
جزاك الله خيرا

[MaDoOo]

اولا..جزاك الله كل خير على موضوعك ...ولو افدت واحد بس منه ربنا هيجزيك خير كبير جدااا ...اخوك من طب شبين ومتابع

بس هو سؤال واحد .....العملى فى الباطنه العامه...ايه نظامه...يتزاكر منين ؟؟؟؟؟؟؟؟!!!!!!!!!بجد حوسه عظيمه ...والامتحان الايند روند على الابواب!!!!!

[Aiman]

:mghoud:

بارك الله فيك ببس كنت عايز اسئل كام سؤال :
أولا انا فى طب المنيا وعندنا الجراحه مع الباطنه فى سنه واحده تفتكراقدر اوفق بينهم ازاي فى المذاكره مع العلم اني باخد درس جراحه بس وبسمع شرايط حسام موافى وفيديوهات الدكتوره نوران العملى بتاع القصر العينى .
ثانيا : ايه راى حضرتك غى كتاب الدكتور حسام موافى هل كافى وحديه ولا محتاج مصادر تانيه

[magnacarta]

:gzak:

معادلة صعبة فعلا دروس ومحاضرات ومذاكرة .. حاجة تجيب الضغط
أنا في الفرقة الخامسة جامعة الأزهر فعلا بروح درس عند د/ أسامة هو بصراحة ممتـــــــــــاز
بس المشكلة إني حاسة إن اليوم بيضيع مني
وأنت عارف طبعا المستشفى والمدينة والدروس غير المذاكرة والامتحانات المفاجئة
غير الكتب فيه يقولي كتاب د/ سامح لبيب G.I.T هأقدر أذاكره منه وأجمعه يوم الامتحان
هو أسلوبه سهل وجميل جدا بس حاسة إن فيه معلومات غير مكتملة كمان اشتريت liver د/ أسامة هو كويس بس حاسة إن اللي بذاكره تاني يوم أنساه وفيه اللي قاللولي أذاكر من الفطاطري liver يعني معايا 3 كتب في برانش واحد ده غير البرنشات التانية كل برانش منه كتابين ومحتارة بس حاليا متابعة مع د/ أسامة
أنا بدأت باطنة وبحضر الروندات (بس) .
وبأخد عملي عند د/ علام وبذاكر من مذاكرته
ونظري عند د/ أسامة ومتابعة معاه
بس حاسة ان درس النظري بيضع لي وقتي
بس برده بيفدني طبعا بذاكر معاه وبفهم حاجات كتير
أنا عارفة طولت عليك بس اعذرني أنا تايه ومحتارة
ممكن مســــــــــاعدة لأن مش لاقية حد أسأله الكل بيقول متقلقيش السنة لسه طويلة
بس أنا مش عايزة أضيعها بجد
دبرنـــــــي يـــــا وزيـــــــــر
(بخصوص الكتب اللي بذاكر منها والدرس)

وجزاك الله خيرا عن طلبة الأزهر جميعا
أرجو الرد سريعا لو سمحت

أختى فى الله makarona فتحتى نفسى والله:patch_rir:
أولا شكرا على مرورك الطيب وربنا يتولانا جميعا مظاليم طب الأزهر:5831.imgcache:
بالنسبة لأسئلتك :
عايز أقول حاجة مهمة جدا حطيها حلقة فى ودنك وابقى افتكرينى فى آخر السنة
كل اللى احنا بنعمله طول السنة بدافع من الرغبة فى العلم واحراز الدرجات من دروس وشرايط ووجع قلب ده كوم وامتحان آخر السنة كوم تانى خالص ممكن متقتنعيش بكلامى لأنك متأثرة بالتيار اللى حواليكى كل الناس بتروح دروس وكل الناس بتسمع اشمعنا أنا يعنى ......يعنى أنا هافهم أحسن منهم.......!
والحقيقة ان الناس اللى بيأثرو علينا هما نفسهم متأثرين بينا وكل واحد مش عايز يبقى هو أول واحد يكسر القاعدة
ما علينا أنا السنة اللى فاتت روحت عند الدكتور أسامة من أول السنة واستمريت معاه لحد شهر 1 مع العلم إنى كنت بادئ أطفال وكنت قمة فى الشحططة الصبح حضور فى الأطفال ويومين أسبوعيا ضايعين عند أسامة ويومين ضايعين عند علام كنت برده بروح عنده واستمريت بالطريقة دى 3 شهور احارب فى نفسى شوية وفى الكتب شويتين وفى المجهود البدنى الفظيع اللى الواحد بيعمله 3شويات لحد ماجه امتحان راوند الأطفال وإليك البيان الآتى:
دخلت امتحان الأطفال لامم top بالعافية ويدوبك ذاكرت الحالات نظرى بالعافية برده وقضيت ال3 أيام بتوع الإمتحان متنكد آخر نكد بس ربك ستر وعدت وجبت 93 بطلوع الروح طبعا ممكن تخدك الشفقة عليه وتقولليلى معقول كويس هاقولك لا مش معقول ولا كويس لأن أكتر من نص المجموعة كانو جايبين فوق ال 95 وكمان أكتر من تلتهم كان طالع مذاكر أكتر من 90 % من الأطفال
أما البيه بتاع الكفاح المسلح فطالع خالى الوفاض
ساعتها خدت أسبوع مصدووم ورجعت تانى عشان أقيم الوضع لايت الآتى:
3 شهور أطفال ومحصلتهم من الأطفال صفر
وكمان برانشات ال liver - chest - كنا بدأنا cardio فى الدرس وانا يدوبك كنت قرتهم ورى الدرس مش زى مابيقول الدكتور أسامة by the heart from the start
ولاقيت زمايلى اللى مابيروحوش دروس ركزو فى الأطفال كويس وبدأو يسمعه باطنة واللى مش هايسمع ابتدى يركز فى المذاكرة والأمور ماشيه زى الفل
ساعتها قررت إنى أسيب الدرس ضاربا عرض الحائط بكل الأعراف والمواثيق الدولية :patch_rir: ومستعوض ربنا فى اللى راح.......!!!!
ومسكت ال mp3 فى ايد والكتاب فى الإيد التانية :427515:
وبقيت أروح الكلية الصبح واسمع باقى اليوم واستمر الحال لحد شهر 7 وانا لسه ما خلصتش الباطنة مع العلم إنى برده مكنتش خلصت أطفال وابتدى الرعب يا معلم
يانهار اسود فاضل شهرين على الأمتحان والبيه اللى ههوه أنا طبعا يدوبك قرأ الباطنة ومفتحش أطفال وبدأت معركة تانية خالص
طنشت حضور راوندات شهر 8 وحضرت الأمتحانات بس واعتكفت فى البيت ولفيت شال كدة عندى ورثه عن جدى الكبير متعودين نلفه على دمغنا فى الملمات
ووالله العظيم يادكتوره شفت أيام أسود من قرن الخروب واجتمع على مع الرعب والقلق رمضان والصيام وتلال الباطنة والأطفال
وكنت ساعات عايز اهج بس سبحان المثبت وعلى آخر رمق كنت خلصت الباطنة مذاكرة محترمة وقريت الشباتر المهمة فى الأطفال ورجعت العملى وابتدى شهر 10
وابقى أكمل مرة تانية بقى..... يلا فكرتونا بالذى مضى
مش عارف إذا كنت قدرت أوصلك حاجة ولا لا بس أنا كنت عايز أعمل المشاركة دى لوحدها بس يلا جت فيكى انت بقى
أما بالنسبة لسؤالك
الدكتور أسامة ممتاز طبعا وعلى فكرة انا بسمعه دلوقتى وهاسمعه تانى ان شاء الله فى الإمتياز بس بلاش تتضحكى على نفسك الأمتحان عايز استعداد تانى خالص وساعة الأمتحان مابينفعكيش إلا الدرس اللى انت حفضاه بس القراية مابتنفعش وعلى فكرة لو هايمشه على النظام اللى جابولنا بيه الإمتحان السنة اللى لسه خلصانة دى يبقى مافيش شيت ولازم تذاكرى المادة كلها وزى ماقلت قبل كده الباطنة دى انشاء يعنى لازم تتقرى مرة واتنين وتلاته خلاف كده والله المهمة هاتبقى صعبة جدا وبكرة هاتخشى شهر 8 وتلاقى اسامة بيراجع باليوم وهاتبقى فى عرض ساعة تذاكريها بتركيز والحكايه هاتبقى بطاطس خالص أنا كنت بشوف زمايلى فى الوقت اللى المفروض يذاكره فيه بس فى شهر 8 كانو متشرودين عند أسامة والحصة ساعات بتوصل 4 ساعات
ونصيحتى ليكى
سيبى الدرس عند أسامة وركزى كويس جدا فى الباطنة وزاكريها على الأقل مرتين لحد شهر 6 وبعدين اسمعى مراجعة أسامة هاتبقى كويسة جدا فى شهر 7 وركزى 8 و9 فى الكتاب تانى والشيت والتدريب على الأمتحانات ودى نصيحة منى بإخلاص وربنا يوفقك على كل حال
وعلى فكرة برده نصيحة لازم تحضرى فى الكلية حرام تضيعى منك أى درجة فى الحضور ولازم تحضرى راونداتك كلها ماعدا شوية حاجات كده مش مهمة
ولاحظى اللعبة دى
30 درجة حضورباطنة +50 اسبشيالات +20 درجة أطفال =100 درجة لو خسرتى منهم 50 بس يبقى حرام عليكى لأنى ال 50 درجة فى آخر السنة بتخسرى قدهم مرتين فحرام عليكى تخسريهم من دلوقتى
وزى ما قلت الحضور مهم والمذاكرة مهمة والفهم مهم وارجعى للمشاركة اللى فاتت واوزنى معادلتك وربنا يوفقك
أما عن الكتب فمبروك انت كده حطيتى رجلك على أول سلم الفشل آسف على التعبير بس أنا خايف عليكى 3 كتب يادكتورة فى ال liver امال فى ال cardio هاتعملى ايه ......!
زى برده ماقلت انتى هاتمتحنى mcq وشفوى وتحريرى ودول مايسدش فيهم إلا حد زى مجدى اسحق أو أسامة أما الفطاطرى فانت بتغامرى وعموما ركزى فى أسامة هوه كويس وحكاية انك بتقرى ومش بتفتكرى فده عادى جدا انتى برده لسه فى أول السنة اصبرى وزى برده ماقلت ان السنة دى تراكمية يعنى كل ماتصبرى فى المذاكرة كل ماتحسى ان مستواكى بيعلى
وعلى فكرة أكذوبة ان السنة طويلة دى وهم السنة دى هاتعدى صاروخ ومش هاتحسى بيها
ومفيش وقت للأخطاء
والله المستعان
ادعيلى ربنا يكرمنى فى تقدير سنة خامسة

[magnacarta]

[/quote]

اولا..جزاك الله كل خير على موضوعك ...ولو افدت واحد بس منه ربنا هيجزيك خير كبير جدااا ...اخوك من طب شبين ومتابع

بس هو سؤال واحد .....العملى فى الباطنه العامه...ايه نظامه...يتزاكر منين ؟؟؟؟؟؟؟؟!!!!!!!!!بجد حوسه عظيمه ...والامتحان الايند روند على الابواب!!!!!


جزاك الله خيرا على شعورك الطيب
بالنسبة لعملى الباطنة لازم تبدأ تذاكر من مصدر محترم من أول السنة وتثبته وإذا كان عندك امتحان فده مش معناه انك مضطر انك تكروت أو تعمل أى حاجة استثنائية لأن السنة كلها كده ولو فتحت الباب ده مش هاتخلص وعلى فكرة الداكترة بتراعى الناس اللى بتمتحن أول السنة والأمتحانات بتبقى مش صعبة
أما بالنسبة ل الكتب فأنا بصراحة مش هاقدر أفيدك كتير أنا أصلا طب الأزهر بس عندنا ناس زى أشرف زكى ممتاز وعملى الدكتور أسامة أيضا معقول ومذكرات علام ربنا يحفظنا وفيه كتب الدكتور مجدى إسحق برده راجع مشاركاتى قبل كده فى نفس الموضوع
وربنا يوفقك
اقبلنى كصديق
وادعيلى ربنا يكرمنى فى تقدير سنة خامسة

[حفيدة عائشة]

انا شايفة ان حكاية الدرس دى بتختلف من شخص للتانى

يعنى لو شايف انه ممكن يسمع شرايط ويذاكر لوحده ويستمر طول السنة ويواظب من غير مايمل يبقى يسمع

لكن لو هيمل يبقى ياخد درس عشان يجبره على المتابعة بس ماينفعش فى الحالتين مايذاكرش لازم المذاكرة كويس

وبصراحة التلقى من الدكتورفى الدرس افضل كتير من السماع لنفس الدكتور

makarona انا ازهرية برضه وباخد عند د اسامة ياترى انتى مين؟؟؟

[makarona]

[
30 درجة حضورباطنة +50 اسبشيالات +20 درجة أطفال =100 درجة لو خسرتى منهم 50 بس يبقى حرام عليكى لأنى ال 50 درجة فى آخر السنة بتخسرى قدهم مرتين فحرام عليكى تخسريهم من دلوقتى
وزى ما قلت الحضور مهم والمذاكرة مهمة والفهم مهم وارجعى للمشاركة اللى فاتت واوزنى معادلتك وربنا يوفقك
أما عن الكتب فمبروك انت كده حطيتى رجلك على أول سلم الفشل آسف على التعبير بس أنا خايف عليكى 3 كتب يادكتورة فى ال liver امال فى ال cardio هاتعملى ايه ......!

السلام عليكم : ممن يا دكتور استفسار؟؟؟؟؟؟؟؟؟ (........)
درجات الحضور على ايه بالضبط ؟؟ الروندات ولا المحاضرات
أنا بحضر الروندات بس ولما أسمع ان فيه دكتورة شرحها كويس في المحاضرات بحضرلها وبحضر كمان امتحانات المحاضرات وكفاني هذا وبس ( مش عارفة ده صح ولا ايه ؟؟؟ ) ؟ (.......)
اما بالنسبة للدرس : لو سيبته هل أسمع شرايط لأنك يادكتور قلت انها بتضيع وقت برده بس اعذرني لأن ماينفعش أول لقاء لك مع الكتاب face to face من غير ما حد يفتتحلك حتى البداية وتعرف الدنيا ماشية ازاي ده غير اني مش بحضر محاضرات (..........)
اما عن الكتب : الله يبارك فيه ويبارك لك , أنا بجد فخورة بالمدح ده ومتشكرة جدااااا على الإطراء لأني أول واحدة طلعت السلم (سلم الفشل ) بس ده كان في الأول لما كانت الناس بتلعب لي في مخي كتير بس قلت لحضرتك أنا دلوقت متابعة مع كتب د/أسامة وهل أستمر معاه في الكتب برده
بس فيه ناس قاللولي مش كل الكتب يعني مثلا neuro للدكتور حسن علوان و blood د/ أسامة بينصحوني مذاكرش منه وقاللولي ان الفطاطري أحسن ؟؟؟؟؟!!!!!!(.......)
بس مش معنى كده ان لسه مذاكرتش الحمدلله بس حبيت أعمل ترتيبات من أول السنة عشان أعرف الطريق من اوله وما احتارش أو أتوه في المنتصف
اما العملي بذاكر من مذكرات د/ علام أظن يادكتور طبعا جربته (هل كملت معاه لأخر السنة مع العلم اني اللي بيشرحنا د/ محمود مش د/ محمد ) ؟؟؟ وهل أكمل منها ولا أتابع من كتاب د/ اسامة العملي
انا أسفة للتطويل وأكيد زهقت بس اعذرني اصل الغباء ده بيظهر فجأة
أفيدوني أفادكم الله وربنا يكرمك ويوفقك
((اللهم إني أسألك من الخير كله عاجله واّجله ما علمت منه ومالم أعلم , وأعوذ بك من الشر كله عاجله وأجله ما علمت منه ومالم اعلم))...

[د\ بيرو]

جزاك الله خرا يادكتور انا بذاكر من د\ الفطاطري هي كتب لذيذة جدا بس الاطفال ياريت اعرف اذاكرها منين لاني محتاااااااااااارة .مذكرات د\ علام رااااائعة جدا في العملي

[د\ بيرو]

انا الحمدلله ماشية كويس الي حد ماالسماع دة جميل جدا بشرط التركيزوبشرط كمان انك تذاكري بعد ماتسمعي مش زي اللي بيقولوا اسمعي وعلي الاقل اقري الدرس بعتبر دة غلط انتي لازم تسمعي وتذاكري الدجرس جامد لان اليوم اللي هايعدي مش هايرجع تاني.ان شاء الله ربنا يوفقنا كلنا في سنة خامسة .انا بجد والله والله حبيتها اوي السنة دي بس هيا مرهقة بس مش اكتر من كدة.اختكم في الله د\ بيرو

[drsapan2010]

السلام عليكم أنا معجب جدا بكلام حضرتك وأحب أضيف معلومه ان كتب د.مجدى مع أنى أعرف أنها كتب جامده من حيث المعلوما لكن صدقنى لا تستطيع أن تلمها حتى لو قلت كتاب ال summary فهو ليس مختصرا كما تظن بل هو تجميع لكل الكتب فى كتاب واحد ليس إلا
أم كتب د.الهوارى فكلامك صحيح خاصة معنا كطب أزهر لكن عند حل لهذه المشكله وهو إن اللى بيذاكر من كتب الهوارى يسمع معاها شرايط دكتور أسامه كفايه أو يشتلرى كتاب السمرى لد.مجدى
والله الموفق

[drlola]

جزاكم الله خيرا ممكن سؤال عن كتاب cardio؟:wfk:

[Dr_polaris]

جزاك الله خيرا على هذا المجهود
وفق الله الجميع لما فيه الخير

[زهراء2010]

جزاك الله خيرا
وياريت تكمل فيه ناس كتيرة تاهية وبالتوفيق لكل الناس

[أمير الشهداء]

وماذا عن الفطاطري
كتب وشرائط حيث اني ادمنت السماع والمذاكرة منه :)
هل هو جيد ؟
حيث لاحظت عدم ذكرك اياه على الاطلاق
وجزاكم الله خير

[د.احمد لطفى]

بصراحة انا معجب جداا جداا بكلام سيادتك وبصدق احسست انك انسان متميز وأصيل وربنا يزيدك ويحقق لك كل ما تتمنى وارجوا من حضرتك اكمال الموضوع

[amse_010]

رجاء من الأخوه المشاركين الأتزام بأدب الحوار وعدم الطعن أو التجريح فى أحد حتى لا يخرج الموضوع عن مضمونه

[د.احمد لطفى]

يا دكتور سيب الدكتور يقول تجربته وخبرته اذا ما كنت ها تستفيد غيرك ها يستفيد وعلى الاقل ها يستمتع بالاسلوب وها يرى تجارب الاخرين اهو انت كده جعلته ما يكملش الموضوع

[بيعو]

جزاااكم الله خيرا يادكتور وبجد كلامك رااااااااااااااائع واعتقد ان الجميع استفاد منه وانا اولهم وياريت تتكلم لنا عن الاطفال

[Dr..Romah]

سلام عليكم ورحمة الله وبركاته
‏
جزاك الله خيرا يادكتور علي مجهودك... و نيتك في إنك تفيد الناس.. جعله الله في ميزان حسناتك..
‏
انا للأسف اول مرة اقرأ الموضو ع ده دلوقتي وخلاص باقي علي الأمتحان أقل من شهر و نص.... اكيد استفادتي كانت هتبقي اكبر لو كنت قرايته من زمان...
‏
انا في جملة قريتها و عجبنتني جدا ... مافيش حاجه اسمها السنة لسه طويله... دي فعلا حقيقة... انت دلوقتي افتكرت لما كنا بنقول ان لسه بدري احنا لسة ف اول شهر ... ودلوقتي الكل مزنوق وعاوز أي حاجه تنجده...
‏
موضوع الكتب ده و نذاكر من فين و هكذا... اكيد بيختلف من جامعة ل تانية ... وبتأثرنا بالناس الي كانوا قبلنا ف السنوات السابقه..
يعني لو الي قابلينا كانوا بياخدوا مع دكتور أسامه وبيذاكروا منه ... هنلاقي تلت تربع الدفعة الي بعديهم بتعمل كذا و هكذا ... الموضوع شبيه بحاجه وراثية...

كنا ف أول سنة ولحد فتره قليله تايهين ف حوارات الكتب و نذاكر من فين .. و نسافر ناخد كورسات عملي و و و و و و .. كانت حوارات جامده بس الحمد لله قدرنا نستقر ع حال.. وربنا يوفقنا..

الدكتور الي بيسأل عن الهواري... الي انا بسمع منه و شفته ف كذا فرع.. أن الكتب ناقصه كتير ولازم نسمع شرايط معاه عشان نكمل نقص..
‏
انا عن نفسي بذاكر من كتب أسامة .. ماعدا النيرو حسن علواني ... والاندوكرين الموافي...
والعملي كتب دكتور إيهاب ...
‏
واما موضوع السمع ف انا بسمع لدكتور الموافي ‎
‏ الي ف أول كل برانش فعلا بتفيد ...
‎‏shceme

هي فعلا سنة تقيلة و مرهقة والي رتب نفسه ف الأول أكيد مش هيتعب ف الاخر ... وربنا المستعان و يوفقنا جميعا

أسفه طولت عليكوا..

[MSISM1988]

جزاك الله خيرا كثيرا يا دكتور

انا داخل خامسة طب اسكندرية ان شاء الله

وبجد بستفيد جدا من موضوعك الرائع

ياريت لو تقوللنا ايه افضل طرق المذاكرة من اول ما اتخبط بباب معين مثلا لحد ما امتحن فيه

وجزاك الله خيرا كثيرا

[habhoba boba]

بجد الموضوع مفيييييييييييييد جدا وخاصة انى داخلة لسة سنة خامسة طب ازهر
بصراحة اختلاف الرأى فى موضوع الدروس بجد يحير:C20ColdHands:
حاجة فعلا وحشة جدا انك تقرأ درس لاول مرة فى الكتاب وانت مسمعتش حد يشرحهولك طب حضرتك ازاى كنت بتزاكر الدرس :427515:ومفيش حد شرحهولك ولا كنت بتحضر محاضرات ؟
ارجوك متابعة كلامك عشان هو مفيد جدا:barak:

[sora]

ههل الكلام ده يطبق علي طب اسكندريه

[sora]

بصراحه يا دكتور انا اتلغبطت لاني لاني شويه يقولو السمع مهم وحضرتك بقول لا مش مهم دلوقتي انا بصراحه مش عارفه اعمل ايه خصوصا اني عارفه عيبي وهو توتري الشديد فمهما اكون مذاكره توتري بيضيعه ده غير الكلينكال بتاع رابعه كنت مذاكره كويس جداوفي ناس كانت مذاكره نص نص ويمكن مش مذاكره وجابو اعلي مني لا لشيء الا لان توتري ضيعني واسفه علي الاطاله

[Dr.Nouh]

السلام عليكم يا دكتور
بجد مش عارف أقولك الا جزاك الله عنا خيرا ومنتظرين منك كل جديد ومميز

[sun beam]

ياريت تكمل يا دكتور احنا محتاجين النصايح دي جدا

[MAICON]

شكرا يا حاج الحقيقه استفدت كتير
وشكرك واجب

[dr heba 1]

ليه يااخوانى مشفتوش كتب د تامر عبد الحميد من القصر العينى كتب منظمة جدا و ملونة و مصورة ومش ناقصة حاجة واسلوبها سهل .احنا بنذاكر منها فى القصر العينى . بصراحة كتب ممتازة .

[عزة]

جزاكم الله خيرا الموضوع مفيد جدا جعله الله فى ميزان حسناتكم جميعا

[زهـــ الاسلام ـــرة]

جزاكم الله خيرا ياريت حضرتك تكمل الموضوع لان بجد هيفيدنا كتيييير

:barak:

[عزة]

منورة يازهرة الاسلام ياريت فعلا حد يعرفنا كل حاجة من الاول كده عشان مانحتارش

[Talba 3afwak]

جزاك الله خيراً يا دكتور

ياريت تكمل احنا بستفيد من كلامك ده اوى

[sad smile]

جزاكم الله كل خير
احنا استفدنا فعلا بس ياريت تكملوا الموضوع

[momochronic]

يا دكتوره هبه صحيح كتب الهواري ناقصه اوي كده
ده محدش مدح فيها خالص
امال تامر عبدالحميد ده عامل ازاي؟؟؟؟؟؟

[دكتور مشرط]

جزاكم الله خيرا كثيرا

منتظرين البقية

[رينادة]

بجد جزاك الله كل خير ربنايكرمك أنااستفدت خالص من الكلام علي الرغم إني مش طب الأرهر وفي إنتظارالمزيد وفقك الله

[sara201026]

:barak:
جزاك الله خير علي هذا الموضوع الرائع
وعلي فكره يا دكاتره الموضوع فعلا مش حكاية دروس وشرايط وكتب مين الي هنذاكر منها الفكره ازاي نفهم صح لان دي الباطنه ام الطب الي هيفهمها كويس ويعرف الاساس بتاعها كويس هيستريح بعد كده ودي كلها وسائل وكل انسان له الطريقه المناسبه له وتعدد الكتب والشرايط دي مزايا فرأي ان كل واحد يشوف اي طريقه مناسبه له ويتبعها مش علشان كل الطلبه بتاخد درس يبقي لازم اخد درس الموضوع ابسط من كده بكتير
المهم التفاؤل والأمل والصبر
إذا كان الامس ضاع .......................... فبين يديك اليوم:427515:
وإذاكان اليوم سوف يجمع اوراقه ويرحل ......................... فلديك الغد:faces222:
لا تحزن علي الأمس فهو لن يعود ولا تأسف علي اليوم فهو راحل........... واحلم بشمس مضيئه في غد جميل:H18Heat::S20Sunny2:

[dr_open_heart]

الف الف شكر للدوكتور ماجنا على كل ماقدمه......بجد عاجز عن الشكر....يريت تكمل وباستفاضه اكتر واكتر كمن

[dr_alazhar]

ان شاء الله اعمل بنصيحتك يادكتور
جزاكم الله خيرا وربنا يكرمك بأعلى الدرجات ان شاء الله

[احمد عاطف]

الله يباركلك على الكلام اللى يتاقل بالدهب ده يا د magnacarta (http://www.alltebfamily.com/vb/u1256.html)

[medoo dadada]

بسم الله الرحمن الرحيم
طبعا واضح جدا يا زميلى العزيز أنك وصلت الى المعنى المعتبر من جملة(لولا الادراك لما وجد التغير)للشيخ محمد متولى الشعراوى
واضح أنك أخدت قرارات مهمة فى حياتك عرفت قبلها أنت ماشى على فين ورايح لفين بالضبط

[medoo dadada]

والله يادكتور أنت فتحت أبواب الجحيم ووضعت يدك على الجرح تماما

[الباشا ابو يوسف]

بجد يا دكتور انت انسان محترم

[Dr.ahmoda_for_ever]

والله يا دكتور مهما قلت
فلن اوفيك حقك

جزاك الله كل خير
ولا املك الا ان ادعو لك بظهر الغيب

دعواتكم ونحن على اعتاب تلك السنه الكبيسه

نسال الله خيرها ونعوذ بالله من شرها

[محمد الفاتح]

جزاكم الله خيرا يا دكتور
اسلوبك رائع فعلاً
انا لسه هبدأ سنه خامسه (جامعة الزقازيق)
صحيح كلامك فيه معلومات انا عارفها , بس برضه ما كانتش واضحه أوي
في ذهني , لكن دلوقتي بعد ما قرات كلامك انتبهت ليها اكتر

[magnacarta]

اللهم لك الحمد رغم أنفى ورغم كل مايدور فى قلبى ويعتمل فى نفسى من معانى الحزن على ما فات والخوف مما هو آت وبعض الندم وكثير اللوم والعتاب
ربما شئت بحكمة أعترف لك بها وعلم أقر لك به أن أشعر ببعض الألم فى حياتى فى أمور أحببتها ورجوتها منك وسألتك فيها التوفيق فجائت عقباها على غير ما أشتهى وتلونت ظواهرها بألون تحزن القلب وتدمع العين ولكنى بين يأس وأمل وبين قنوط ورجاء لا يفقد عقلى شعاعا من نورك العظيم يتردد على لسان يعقوب عليه السلام يا بني اذهبوا فتحسسوا من يوسف وأخيه ولا تيأسوا من روح الله إنه لا ييئس من روح الله إلا القوم الكافرون (http://www.islamweb.net/newlibrary/display_book.php?idfrom=2703&idto=2703&bk_no=50&ID=2718#docu)
وسأذهب يارب وسأتحسس من أمالى وطموحاتى ماتوكلت عليك فيه ورجوته منك ولو فقدت كل سبب وضاق بى كل طريق ولفظنى كل باب أفتراك وضعت الرحمة فى قلب نبيك حتى قال لمن آذوه وطردوه اذهبوا فأنتم الطلقاء وقالها الكريم بن الكريم بن الكريم لأخوته بعد أن ذاق بسببهم ألم العبودية وذل التهمة ومرارة الغربة:لا تثريب عليكم اليوم يغفر الله لكم
أتراهم قالوها من نفوسهم البشرية أم هى محض سنى من نور عظمتك وواسع رحمتك أجريتها يارب نهرا من حنان فى قلوب أقرب البشر إليك
أفترانى بعدها أيأس من رحمتك وأشككك فى حكمتك وأتهمك فى تدبيرك كلا ولله يارب بل ثقة فيك حتى تخرج روحى فى سبيلك وألقاك غير مبدل يارب
وبعد إخوتى فقد مرت على حديثى إليكم أيام وشهور استغرقتها منى الفرقة السادسه بكل ما فيها وقد كانت والله حبلى بالأحداث لم يشأ الله أن تضع حملها بعد
فالليالي من الزمان حبالى مثقلات يلدن كل عجيب
وقد قررت أن أكمل ما بدأته ولكن مع بعض تغيير فيه أرجوا أن تشاركونى فيه الإختيار
1. أن أغير العنوان وأبدأ فيه من حيث توقفت لأشمل معه السنة السادسه أيضا
2. أن أبدأ موضوعا جديدا عن تجربتى فى كلية الطب من أجازة الثانوية حتى أجازة سادسة
3. أن أسكت وأكفى خيرى شرى ورحم الله على أمير المؤمنين حين قال ُأفلح من نهض بجناح أو سكت فأراحُ
وأخيرا أسألكم الدعاء فما أشد حاجتى إليه فى هذه المرحلة من حياتى
والسلام علينا وعلى عباد الله الصالحين

[محمد ابراهيم عبدالله]

بسم الله الرحمن الرحيم
. أعترف انه هذه اول مره اكون مهتم بالرد على مشاركة أى أحد فى أى منتدى ...... لكن مما سبق ترسخ داخلى إيمان عميق بان الشكر المستحق للدكتور magnacarta هو دين فى العنق واجب السداد ..... أشكرك بحق وادعو الله ان يجعله فى ميزان حسناتك يوم القيامه ....
ان فهمت من كلامك حضرتك الأتى .....
باطنه ..... كتب دكتور مجدى إسحاق ثم دكتور أسامه
سماع لمن أراد دكتور أسامه
clinical .....أشرف زكى .. وشرايطه
الجلديه ... كتاب دكتور محمد عبدالراضى
clinical pathology .......دكتور محمد ناصف


الأطفال .... كتب .... بيبى نيلسون
سماع لمن أراد ... أبو الأسرار
عملى الأطفال ...ناصر جمال
مع التركيز المستمر على ال ... pure pediatric

[القران منهجى]

:5831.imgcache::pbuh-alltebانا فعلا كنت محتاجة لاحد يزكرنى
زكرنى

[زهرة مسلمة]

جزاك ربي كل الخير على المجهود الرائع المبذول في الموضوع ده وفعلا ناصئح مهمة جدا وقيمة جدا كانت غاية عني وانا داخلة السنة الجديدة دي

[دكتوره اسيل]

جزاك الله خيرا يادكتور علي المعلومات ونرجو التكمله للاطفال

[reham f]

الف شكر ليك يا دكتور كلامك بجد فادني جدا و انا لسه داخله خامسه
جزاك الله كل خير

[omnia ahmed omar]

:barak:شكرا جدا على الموضوع الرائع ده