يوميات .. مستبعد

[ابن البنا]

اخواني واحبابي في منتدي كل الطب .. سلام الله عليكم ورحمته وبركاته ..
اياكوا تكونوا نسيتونا ياشباب ... ايوة ... افتكرت ؟؟ .... احنا اللي مستبعدين من المدينة .. ححاول اكتب بالعامية عشان بجد عاوز افضفض معاكوا ...
معلشي غبت عنكوا كتييييييييييير اصل كنا بندور علي شقة .. والحمد لله لقينا .. مقولكش بقي ، حاجة تفرح .. شقة جنب الكلية خمس غرف وحمامين وغسالة فول اتوماتيك ودي في دي ، وعليها حتة بالكونة خيالية بتفتح علي قسم التشريح علي طول .. مقولكش بقي علي الصالة : سيبك انت انتريه الماني وسفرة ايطالي ومجلس بلدي عماني ... باب الشقة ملوش مفتاح .. بيفتح بكرنية الكتروني ورسم ضربات القلب ومسح قرنية .. :faces705:
عشان كده كنت غرقان في النعيم ومفضتش اجي وافضفض وياكم .. بس انا شفت جدول مواعيدي ولقيت ان انا فاضي خمس دقايق ونص قلت اكتب فيهم المقال ..
نتكلم بجد بقي ... ايه الهزار اللي انا فيه ده .. احنا بنلعب هنا ولا ايه .. احنا جايين نهرج ..
كل اللي حضرتك قريته ده كان بس حلم جميل وانا نايم علي الكنبة اللي في الصالة اللي جنب الباب بتاعنا .. بجد بقي .. شقة لقطة .. ارضي .. لا يدخلها شمس ولا هواء .. اوضتين وصالة وحمام ومطبخ .. معقولة نسبيا .. تصلح كمرتع لاضحيات العيد _ كل عام وانتم بخير _ بالعكس الخروف مش هيرضي يبات فيها ليلة .. ده بقيلوا كام ليلة ويودع .. الحمد لله علي كل شيئ .. وبكام بقي .. 1300 جنية .. يابلاش
ومقولكش بقي علي الاكل وطريقة النوم وشكل الحمام والباب بتاع الشقة بيقتح بكرنيه الكلية _ عارف الطريقة دي _ ولا الجيران ولا........
والله ياجماعة انا بكتب وانا مش زعلان
بالعكس .. مبسوط خالص .. عشان ان شاء الله سيبدلنا الله سكنا خيرا من الشقة دي ومن المدينة الجامعية بالفردوس باذن الله _ قولوا امين _
وكمان العجيب ان الشقة لا تحتوي الا علي كرسي واحد بس .... بجد .... واللي يسبق بقي .. ده في ناس مبتروحش الكلية عشان تستمتع بقعدة الكرسي الرهيييييييب ... ... ان شاء الله ححاول اكتب ليكوا علي قد ما اقدر كل يوم حاجة وارجوا ان تستقبلوا كلامي بشكل طيب .. المرة الجاية ان شاء الله هكتب ليكوا عن مزرعة الحشرات اللي عندنا في الشقة .. وعن محاولة دخولي المدينة ؛وايه اللي حصل .. سنعود بعد قليل ..
تصبحوا علي طاعة الرحمن
:gzak:

[محمد رمضان ودن]

ربنا يسترها عليكم وييسر لكم الحال (ولمن صبر وغفر ان ذلك من عزم الامور )

[*محمد نصر*]

أعانكم الله وصبركم
فعلا والله الأمر صعب جدا اعانكم الله
وبإذن الله فرج قريب وتسكنوا في اقرب وقت ممكن
عارف والله وحاسس بمقدار البهدله اللي بيعانيها اي حد خارج المدينة الجامعية وبالتحديد لو ساكن في السادس
ما بالك انه في طب كمان؟
متابعين معاك يا دكتور وان شاء الله تبشرنا قريبا بموضوع يفرحنا كلنا إن أزمتكم انحلت وسكنتوا

في حفظ الله
.
.
.
تحياتي

[The ambitious Doc]

السلام عليكم ورحمــــــــة الله وبركاته

قال تعالى: { وَلَقَدْ كُذِّبَتْ رُسُلٌ مِنْ قَبْلِكَ فَصَبَرُوا عَلَى مَا كُذِّبُوا وَأُوذُوا حَتَّى أَتَاهُمْ نَصْرُنَا


فإن مع العسر يسرًا. إن مع العسر يسرًا


أعانكم الله وثبتكم وسدد على الحق خطاكم


,
,
,

[عبدالرحمن يوسف]

أنا كمان مستبعد ولكن طريقة كتابتك يا دكتور رائعة جدا

[ابن البنا]

السلام عليكم ورحمة الله وبركاته ..
الله اكبر الله اكبر الله اكبر ، لا اله الا الله ..... الله اكبر الله اكبر ولله الحمد ...
لبيك اللهم لبيك ، لبيك لا شريك لك لبيك ، ان الحمد والنعمة لك والملك، لا شريك لك...
اخواني واحبابي ، بجد وحشتوني ..
رسالة شكر وحب لكل من اسعدونا بمرورهم الكريم .. اكرمك الله دكتورنا محمد نصر والدكتور محمد ودن والدكتور عبد الرحمن وكل من قرا الموضوع ودعا لنا بظاهر الغيب ... .... ندخل بقي في الجد ......
علشان تدخل المدينة وانت اصلا مش ساكن مدينة مش قدامك الا 3 طرق بس ...
نمبر وان : تدخل بكرنيه ( مش بتاعك طبعا ) ومن ع البوابة الرئيسية ولها شروط ...
نمبر تو : تنط ( او تفط ) وفي رواية تقزح .. ولها بعض الشروط ...
نمبر ثري : تدخل من باب نادي اعضاء هيئة التدريس ...
واليكم التفصيل الموجز ...
لو خايف علي كرامتك ومظهرك ومش عايز تبوظ المكوي بتاعة القميص وتبهدل البنطلون وتعفر الجزمة ( او الشبشب ) .. يبقي مش قدامك الا الحل الاول .. ايوة ... من البوابة الرئيسية .. سهلة جدا .. تجيب كرنيه وحاول تجيب واحد يشبهلك .. وتدخل وانت عامل انك بتتكلم في الموبايل ( اوعي تنسي تقفله ؛ علشان لو حد رن عليك وانت حاطه علي ودنك هيبقي منظرك مش ولا بد ) .. طبعا امين الشرطة هيوقفك ويقوللك الكرنية يااستاااااااااذ .. انت بقي : خلاص ياعبده هكلمك بعدين ( اي كلام ياعبد السلام ) وتروح عامل انك مضايق والراجل قطع عليك المكالمة .. وتروح قايل : ياحول الله .. وتروح مطلع الكرنية علي مهلك خااااالص من جيبك اللي ورا وحطه قدام وشه علي طول بثقة متناهية .. اراهنك لو بص فيه .. هيقوللك اتفضل ياباشا .. ( وقال ايه تطلع الموبايل وتكلم عبده ) هو مين عبده ده ....

لو حضرتك من النوع المتردد والخايف نسبيا ؛ يبقي بلاش الحل الاول.. خليك في 2، 3 .. كل اللي عليك هو ان تنزل عند قسم تاني لو كنت راكب عربية .. او تتمشاها يااخي ووفر الخمسين قرش ؛ ايه الاسراف ده ... يااما تنط من علي السور او اعضاء هيئة التدريس ..
خلينا في النط .. اهم حاجة خد قرارك اركن كرامتك انسي مظهرك اعتبر نفسك في دبلون تجارة .. وميهمكش لو حد شافك ؛ محدش بيسال عن حد .. اول لما تنط اجري .. انا مش عارف ليه بس لازم تجري ( حاجة كده رفلكس ) بس خلي بالك من عبد الجبار العسكري حتلاقيه جاي وراك جري وبيقوللك .. : ياقابتن ، خد ياقابتن ( معندوش حرف الكاف) .. وفي هذا الموقف خد قرارك في 3 ثواني .. لو لقيت انك تقدر توصل الملاعب قبل ماهو يجيلك .. اذن اجري ومتبصش وراك .. ولو لقيت ان مينفعش .. اعمل دور العبيط واقف واعمل انك بتدور علي حاجة واقعة منك ... ( اسال مجرب : اخش النار ولا كتف من عبد الجبار ) .... :5831.imgcache:

لو سياتك مبتعرفش تجري او خايف علي كرامتك او خايف لتاخد كتف من عبد الجبار .. يبقي مش قدامك الا نادي اعضاء هيئة التدريس .. بس المشكلة ان الحركة دي اتعرفت ووقفوا واحد مخصوص عشان كده .. ونسبة نجاحها 50 في المية ... بس متخفش العسكري اللي هناك محترم هيكلمك بلسلنه مش بايده ..

ياجماعة انا عملت اللي علي وبلغتكوا العلم لان دي امانة توارثناها علي مدي الاجيال ... :427515:

احبابي وخلاني وزملائي .. كل عام وانتم الي الله اقرب وعلي طاعته ادوم ..
ادعو لنا ياشباب.. ولو مش هتدعي ( هات كرنيهك ندخل بيه وهتاخده تاني )
يلا تصبحوا علي طاعة الرحمن ...
سنعود بعد قليل باذن الله :gzak:

[ريحانة الرسول]

ماشاء الله يادكتور اسلوبك جميل جدا على فكره لو ما يدايقكش حضرتك تنفع كاتب روايات والله انا تخيلت كل اللى انت قلته وبعدين هو فعلا حضرتك عملت الحجات دى كلها لو كنت عملتها تبقى فعلا فعلا دكتور بجد عموما ربنا يصبركم ويجازيكم خير على اللى انتم شايفينوه :wfk:

[dr_A2_elsappah]

يارب يأجركم بهذا التعب ويكتبه فى ميزان حسناتكم وفى ميزان سيئات الظالمين
:alganna:

[عبد الرحمن عبد الملك]

ا والباب بتاع الشقة بيقتح بكرنيه الكلية _ عارف الطريقة دي _
هههههههههههههههه
فكرتني بالطريقة دي الله يرحم أيامها... الباب بتاعنا كان بيفتح بكرنيه الكلية والبطاقة الشخصية كمان.. بس مش بالبطاقة العائلية لأنه كان عارف إن احنا طلبة يعني عزاب... ربنا يعينك. انت طيب لقيت في السادس.. احنا بقى لقينا في العاشر.
:wfk:

[عبدالرحمن يوسف]

كاتب والله أكثر من رائع

[محمد العزب]

صباح الخير على الناس المرهقين من عناء الحياة والدايرين في الساقية اللي منصوبة لهم من سبع الاف سنة .. الناس اللي عايشة اليوم بيومه .
.كل أملها يعدي من غير اي خساير .. مابتفكرش في بكره عشان ماتتقهرش... مابتفكرش في النهارده علشان ماتتنقطش ..
صباح الخير على ضحكة عالية في قهوة شايها مايتشربش ..
على شاب بيقوم لست كبيرة في الاتوبيس.. على كوباية شاي باللبن وحتة بقسماط بعد صلاة الفجر جنب السيدة نفيسة ..
على قهوة في الحسين مبيعديش عليها حسن بشندي .. على سينما زحمة والضحك طالع من القلب للركب .. على سور الأزبكية وكتبه المعتقة ..
على عشاق فقرا مش لاقيين شقة فبيخطفوا الفرحة متداريين في صخور الكورنيش ورا شجر النيل ..
على صوت الشيخ السيد متولي وهو بيقرا سورة يوسف وبيخلينا نعيط على سيدنا يعقوب اللي ابيضت عيناه من الحزن ..





على عربيات الكبده والسجق لحمة الفقير وعربيات الدوم تفاح الفقير وعربيات السوبيا خمرة الفقير.. على طباق الكشري خالي العدس ورد زياده وغرقان في الدقة .
. على فطاطري الحسين اللي سمى نفسه بيتزا الحسين فباظ من ساعتها.. على العدوي بتاع ميدان الجيش يعني احلى رصة فول وطعمية بمستلزماتها وبرخص التراب ..
على أفران العيش .. على البلكونات اللي مافيهاش كراكيب ولا بصل ولا توم .. فيها كرسيين وكوبايتين شاي وبصة رضا واهة شوق ..
على كل صالة بتلم الناس اللي مش عارفة تتلم على نفسها .. على كل نكته قبيحة تتقال بصوت عالي .
. صباح الخير على الطاهرة رئيسة الديوان ودراويشها وسجاد جامعها .

. على روح سيدنا الحسين اللي مش مدفون هنا اساسا ..
صباح الخير على كل سطر كتبه نجيب محفوظ وكل شجرة سقاها علاء الديب وكل فيلم كان هيعمله احمد زكي وكل كرسي ماتضايقش لما صلاح جاهين قعد عليه ..
صباح الخير على الناس اللي واقفة في طابور حكومة رخم بتتخانق عشان تسلي بعضها .. على مدرجات الدرجه التالتة وناسها اللي مش هنا اساسا ..
على الاهلي لما يسكع الزمالك ستة وساعات اربعة وساعات اتنين .. صباح الخير على كل ايدين بتسلم عليك باهتمام بعد الصلاة..
وعلى كل امام ما بيطولش في الوقوف ويطول في السجود ..صباح الخير على سينمات الدرجه التالتة والفاكهة اللي مش مرشوشة مبيدات وسعاد حسني وهي بتغني انا ضاع مني حاجه كبيرة اكبر من اني اجيب لها سيرة ..
صباح الخير بالليل على فرشات جرايد الطبعة الاولى وحفلات الميدنايت والقهاوي المناوبة ..... على العيال وهي بتهز اكياس الكشري الصبح وهي رايحة المدرسة ...
. على بتوع الزلابية اللي واقفين قدام المدارس خايفين من البلدية ...
صباح الخير على اكشاك السمك ..
وعم نفنف بتاع الكبدة في المنشية وطعمية ابو احمد الاكتع في شارع عمر بن الخطاب ..
صباح الخير على وقفة النواصي والقمم والخناقات " البوق " اللي الناس بتفش فيها غلها وبتوفر مادة فرجه للواقفات في البلكونات ..




. صباح الخير على كل جميلة تغري باثم النظرة الثانية والتاسعة .. صباح الخير على الناس اللي بتكوي قمصانها وتبص على المراية قبل ماتنزل ..
على شوارع الزمالك وجاردن سيتي والمعادي اللي تشرف وتفتح النفس للحياة
وعلى كل اللي بيمشوا فيها وبيفرحوا للي ساكنين فيها ....
صباح الخير على حب الجامعة ومظاهرات الجامعة وكل افيه اتقال على اي معيد غتت في اي سكشن ...
صباح الخير على الاوض اللي فوق السطوح والشقق المفروشة والايجار اللي مابيتكسرش ..
على صينية الاكل اللي بتيجي لك من الجيران قبل ما يتفقوا معاك تدي ابنهم درس...
على قران الفجر وصوت النقشبندي وهو بيقول مولاي اني ببابك قد بسطت يدي ...
صباح الخير على الجمعيات اللي ساتره الشعب المصري .. على تمييلة الصاحب على صاحبه في ساعة الزنقة ..



صباح الخير على ام حمدي اللي بتحب جمال عبد الناصر وام ايمن اللي بتعمل رز مسكر وملوخية تضيع مستقبلك ,
وام على اللي ماشفتش البحر الا في عربية الاسعاف اللي خدتها على المستشفى ...صباح الخير على كل نجع وكفر مايكفرش من العيشة ..
,, على الاتوبيس النهري لما يكون نضيف.. على عم فاروق ونصبة الشاي بتاعة كوبري عباس ..
على كل زوجه مابتنكدش على جوزها ,وعلى كل ندهة لبابا وكل لعبة لبنوته ومسدس ميه لحماده ..
. صباح الخير على كراتين الجهاز المتعانة فوق الدواليب .. واحلام الجواز المتحاشة تحت البطاطين ..


صباح الخير على عامود السواري وستي اللي قالتلي
وانا رايح الجامعة اول مرة " يابني البلد بلدهم يعملوا فيها ما بدالهم !"
صباح الخير على لمة صحابي في القهوة وشتايمهم فيها علشان بطلت اجي ..
صباح الخير على دعوة ربنا يكفيك شر طريقك ..

صباح الخير على عبد الناصر قبل مايبقى فرعون
وعلى الشعراوي وهو بيقول اذا كنت قدرنا فليعنا الله عليك , وعلى عبد الحليم وهو بيعيد كوبليه حبيبي والله لسه حبيبي والله ,

وعلى أم كلثوم وهي بتقول تهون عليا الروح لو فارقت جنبي , وعلى محمد فوزي وهو بيقول اي حاجه يعوزها ..



. ونجيب الريحاني وهو بيغني
حتى الفيران اشتكت من قلة فرافيتي ... !

هذا تعبير بسيط عما بداخلى من الاسى والحزن
لاستبعاد زملائى واصدقائى وحرمانهم من ابسط حقوقهم
والله المستعان

[ابن البنا]

انا نفسي اعرف حاجة واحدة يادكتور عزب .. انت جبت الكلام ده كله منين .. ايه اللي عرفك المناطق والشوارع دي .. انت ياإما بتشتغل محافظ القاهرة .. او في المخابرات العامة .. او شكلك ساعي بريد ...
عموما تشكر علي المرور ياحبيبي .. وجزاك الله خيرا ...
جزاكي الله خيرا اختي الكريمة ريحانة الرسول علي هذا الثناء الطيب ونفع الله بكي ... شكرا (جزاكم الله خيرا ) ( ميرسي ) اخي وحبيبي الدكتور انس ونردهالك في المدونات .. ودائما وابدا النسمة الطيبة والعطر الفواح اخي عبد الرحمن جزاكم الله خيرا جميعا .....


سنعود بعد قليل باذن الله :gzak:

[os@ma]

السلام عليكم
لازم طبعاً يا أخي في سبيل العلم تضحي وتتعب
وخصوصاً يعني انك ابن البنا يعني قوة التحمل كلها
سابقيك لاقوا ما لاقوا في سبيل دعوة ربك
تقبل مروري

[ابن البنا]

السلام عليكم ورحمة الله وبركاته
اخواني واخواتي واحبابي وخلاني .... عاملين ايه .. تمام .. يارب يارب يارب تكونوا في افضل حال واعلي مزاج ...
شكلكوا كده ياجماعة معنتوش بتدعوا لينا .. علشان الامور بدات تشهيص مننا شوية _ تشهيص : في القاموس المحيط : اي تزلفط او تلخبط ، يقال شهيصتك الناقة : اذا اعطتك رفسا _ احنا بس عايزينكوا تاخدوا معانا ثواب ( ما هو الملك هيقولك : امين ولك مثلها )
.. .. خلينا بقي في موضوعنا .. ..
( عفوا : لا يجوز الدخول لاقل من 20سنة او اي حد عنده امتحانات قريب )

العادي جدا واحنا في الغرزة بتاعتنا _عفوا : الشقة _ انك تلقي صرصور ماشي بيعدي عليك وانت بتتغدي.. ده كمان ممكن يرمي عليك السلام ..
وعادي برده انك لما تكون قاعد في الحمام بتحاول تركز في اللي انت بتعمله تلقي ان فيه نملتين بيتخانقوا علي ورك خنفسة او ودان صرصور .. وبتقف تتفرج عليهم وانت في غاية السعادة ..
وعادي برده انك لما تيجي تنام تحس بالوغز في ضهرك والاحساس بالحك والهرش نتيجة الاتربة او لدغات الناموس او مناوشات الدبان ( اه والله ياجماعة دبان وناموس في الشتا ) ...
ده احنا بنخدم بعض بالهرش .. تلقي كده الواحد فينا في غاية السعادة واخوه اللي نايم جنبه علي السرير ( السراير زوجي اصلا .. عشان محدش يفهم غلط ) عمال شغال هرش في ضهر اللي جنبه في الحتت صعبة المنال في الهرش ..
لكن ماحصل اليوم هو اللي مش عادي ...
والله كنت هعيط النهارده ياجماعة ... خير اللهم اجعله خير .. صليت الفجر انا وزميلي وجيت نمت لكن سرعان ما فقت تاني علي لدغات .. عقلي الباطن قاللي ياد نام.. دي تلقاها الدبانة شحيبر او البت فلة الناموسة .. لكن الحك زاد .. قلت يمكن ده حساسية من التراب ( اصل الشقة كانت مكتومة ومتقفلة كويس ايام اجازة العيد ) .. لكن الموضوع شكله مش تراب ..
خير اللهم اجعله خير .. بحسس باصابعي علي ضهري لقيت كائن غريب بيتحرك في ضهري .. قمت زي ال...(تييييييييت) وجريت علي الصالة ونورت النور وقلعت هدومي وشفته او شفتها ... صعبت علي نفسي اوي .. لقيت متحف البارا عندي في الفانلة .. لقيت ( بق ) اوعي حد يرجع .. اه والله ياجماعة قعدت انفض الفانلة وانا هموت من الخوف او الرعب او الذهول .. مش عارف .. ربنا ما يوريكوا الاحساس ده .. وجريت علي السرير .. لاكتشف الفجيعة .. لقيت السرير مرشوش بالبق .. اللي ميعرفش البق ( اللي هو mite &tick ) ..
والله ياجماعة انا بعد لما كتبت المقال فكرت امسحه تاني واستبدله بموضوع تاني استحياء منكم .. لكن معرفش ليه اصريت انكوا تكونوا معانا في الامنا واحزاننا .. وان انقل لكم حياة المستبعدين دون حذف او مونتاج .. بس ياجماعة اوعي اي حد يسيح ويفضحنا .. خليه بس كده علي قد المنتدي بتاعنا ( حاسس اني هلقاها في اليو تيوب بكرة ) ربنا يستر ..:patch_rir:
ياجماعة انا برده مو زعلان لان الله _عز وجل _هو الذي ابتلانا.. وبدال منه هو مش من حد تاني، فنحن راضون راضون راضون بقضاء الله وقدره .. فالحمد لله رب العالمين
اللي يعرف بقي ياجماعة مبيد حلو للبق ده ياريت ميتاخرش علينا ( وصفة قليلة تمنع بقاية كبيرة ) واسف جدا احبابي اني قرفتكوا ..
اللهم اؤجرنا علي ابتلائك ياكرم الاكرمين ..
تصبحوا علي طاعة الرحمن ..
سنعود بعد قليل باذن الله :gzak:

[dr_A2_elsappah]

"واحنا في الغرزة بتاعتنا _عفوا : الشقة _ انك تلقي صرصور ماشي بيعدي عليك وانت بتتغدي.. ده كمان ممكن يرمي عليك السلام .."
دا فى الشقة برة ممكن يكون طبيعي بس اللى مش طبيعي ان المدينة وخاصة مبنى ا.د: أحمد عمر أصبح الطلبة ضيوف على أصحاب المبنى الأصليين اللى هما الصراصير طبعا
بس ليهم فايدة مهمة وهي غالباً ما تستيقظ لصلاة الفجر بسبب حب صرصور لك يأتي يداعب وجهك لتستيقظ غصب عن اللي "خلفوك"


أما عن البق هذه الحشرة المقززة فالله يعينكم عليها وأظن أن حلها فى صلاة ركعتين قيام لأن بق الشقق بقى Resistant لأي Anti Baq
وبعدين أخيراً شوفتها واتحقق حلمك ان تشوفها
أعانكم الله وكتبه فى ميزان حسناتكم
:la7aramak:

[dr/shimo]

!!!!!!!!!!!!!!!!!!!!!!!!!!!!!!!!!
ايه ده ربنا معاكم
بس شفتم فى مدينه البنات لقوا تعابين يعنى انتم فى نعمه جنبهم :patch_rir: واصحابى قاعدين يقولوا لى فيه فار وحشرات ربنا معاكم
الحمد لله انى من القاهره والا كنت هتعذب كده :427515:
:wfk:

[ابن البنا]

اخي وحبيبي دكتور انس .. جزاكم الله خيرا علي المرور الطيب .. وبجد نورت الموضوع .. سلامي الحار للصرصور بتاعك ..
متشكر جدا لحضرتك دكتور شيمو .. وشرفت المنتدي .. واسعدني جدا مروركم الكريم .. بس موضوع التعابين والفران ده صعب جدا .. ربنا يسترها ..
سنعود بعد قليل باذن الله ..
برجاء الدعاء لكل طلاب الفرقة الاولي والثانية والثالثة والرابعة .. عشان بجد هم محتاااااااااسين ومزنوووووووقين جدا .. والله المستعان

[عبد الرحمن عبد الملك]

يا سيدي حل البق سهل جدا... انت تجيب شوية سكر - إذا كان البق بيحب السكر - ونشوق وحتة رخام، وانت عارف الباقي بقى.
وبعدين دي كائنات تعيش وتتعايش مع الكائنات اللي زينا، وكمان دول بيساعدوك على المذاكرة بدل ما تروح المعمل وكده جابولك حشرات عندك.
ربنا يستر علينا بقى احنا لسة في 2 وما نلاقيش جثث عندنا في الشقة بدل ما نروح المشرحة

[محمد رمضان ودن]

جزاك الله خيرا

[محمد رمضان ودن]

المشكله كلها جوا المدينه

[التومى]

معلش يااخى اصبر واحتسب والاجر على الله

[ابن البنا]

السلام عليكم ورحمة الله وبركاته
اخواني واخواتي واحبابي اعضاء المنتدي الكريم .. بجد ياجماعة مروركم علي الموضوع وتعليقاتكم الجميلة ، ودعائكم المتواصل ؛ بيكونوا بمثابة يد العون التي تقدموها لنا ..
اسف ياجماعة علي الانقطاع ده كله .. انا كنت بتابع الموضوع من بعيد .. بس مكنش فيه وقت ولا روح اني اكتب ليكم .. كنت مشغول شوية في امتحان الباطنة العامة ، والبداية الشاقة في الاطفال .. انا فقت شوية وقلت افضفض واكتب ..
من منطلق المشاركة والتعاون والتضامن معنا .. اليكم اخر اخبارنا :
1_ انتقلنا من الشقة _اسف :الغرزة _ اللي كنا فيها ورحنا لشقة تانية ( احلي شوية ) .. نسميها فيما بيننا ( بالجزيرة ) ، عشان بيعدة عن السكان والمحلات والدنيا .. وفيها حتة تليفزيون ابيض واسود خطير بيشتغل باريال مكون من ثلاثة اجزاء : حتة المونيوم خارجة من التلفاز متعلقة علي ازازة شويبس ومفتاح الشقة عاملينوا زي تقل كده ( بتاع الصنارة ) وخارجة من فتحة الشباك ( بيجيب القناة التانية مية مية ) ..

2_ رفعنا قضية علي المدينة وعلي رئاسة الجامعة والحمد لله كسبناها ( تصفيق حار ) لكن لسه مسكناش ( توقف التصفيق ) الامور الروتينية العادية اللي بتحصل ان الجامعة بتستشكل في الحكم الصادر ضدها واحنا تاني بتستانف .. ويعني بمشيئة الله في الاخر هنكسبها .. ( تصفيق حار )

3_ ومن اخبارنا الكوميدية الحقيقية : وجد ( بضم الواو وكسر الجيم ) فأر حقير في الشقة الجديدة وكانت ليلة عصيبة لما عرفنا انه موجود ، محدش فينا عرف ينام وهو مطمن ، والكائن الان مستقر في الحمام ويرفض الخروج ، واحنا موكلين الموضوع ده لدبلوماسي الشقة ( جزرة ) الذي يجري مفاوضات معه علي الخروج مقابل 2كيلو جبنة رومي من الونش ..
اسعد الله اوقاتكم بكل خير
وسنعود بعد قليل باذن الجليل

[monir]

أنا نفسى اعرف انت بتجيب الكلام الده منين انا كذلك باسكن فى الشقة اللى جانبك انت عرفيها كويس وكل يوم تجى تبات عندنا نفسى اعرف انت مين:CryOutLoud:

[عبد الرحمن عبد الملك]

أنا بقى هقولك قصة تهون عليك اللي انت فيه: بس ياريت لو حد بطنه بتوجعه ما يقرأش
بعد أجازة نص السنة، رحت السكن ومعايا أكل كتير على أساس إن أنا هقعد حوالي شهر
وحطيت الأكل في الفريزر، وإذا بالثلاجة خربانة، ما بتسقعش
المهم قلت مش مهم آكل اللي أقدر عليه بقى وخلاص
رحت الجامعة تاني يوم، ورجعت، دخلت على الفريزر مباشرة علشان أطلع الفراخ بقى والخيرات............
لقيت حاجة بتبص لي من جوه الكيس اللي فيه الأكل، دققت النظر لقيت فار طالع من جوه الكيس
والكيس التاني في ذيل فار خارج
والكيس التالت فوقه فار باينه كان خلص وشبع، والثلاثة جريوا واختفوا داخل الثلاجة ولم أرهم من يومها.
طبعا ما كملتش الأسبوع وروحت.

[treatment]

السلام عليكم ورحمة الله وبركاته ..
اعانكم الله وثبتكم دكتورنا ابن البنا ، انت وكل زملائك المستبعدين .. انا اه في الزقازيق وبعيد عنكم كتير لكن حاسس بالمعانة اللي انتوا عايشينها .. ربنا معاكم ..
وبمنتهي الصراحة ، انا مختلف معاكم فكريا ، لكن بحبكم جدا وبحترمكم خالص ، وبجد الكلية والمدينة بيبقي ملهمش طعم ولا حس من غيركم .. بجد عجبني اوي موضوع ( محاولات دخول المدينة للي مش ساكن مدينة ) انا كنت هفطس من الضحك .. اصل الحاجات دي بتحصل معانا برده ، بس مع اختلاف بعض التفاصيل ...

ابقي دايما طمنا كده ، واشركنا معك في اخر الاخبار ..
ادام الله اوقاتكم في كل خير

[ابن البنا]

بسم الله الرحمن الرحيم
اخواني واحبابي اعضاء المنتدي المبارك
السلام عليكم ورحمة الله وبركاته
بجد وحشتوني .. وهتوحشوني خالص ؛ لأني اخشي ان تكون هذه الكلمات هي اخر مشاركة في هذا الموضوع .. لانه لم يعد هناك استبعاد .. خلاص ياجماعة .. سكنا .. ايوة .. سكنا المدينة .

الحمد لله رب العالمين .. الحمد لله الذي بنعمته تتم الصالحات .. كسبنا القضية اللي كنا رافعينها ع الجامعة ورئيس الجامعة .. وتم قبولها من قبل رئيس الجامعة الجديد .
بجد ياجماعة احنا فرحانين جدا .. وفرحتنا دي مش علشان المدينة في حد ذاتها او اكل المدينة او اي حاجة تانية
فرحتنا ياجماعة هي :
فرحة انتصار الحق علي الباطل
فرحة القضاء المصري النزيه البعيد عن ايدي الجبناء
فرحة لقاء الاحبة مع اخواننا بالمدينة
فرحة الانضمام الي اقراننا في دفعاتنا

خلاص ياجماعة
معدناش هندخل المدينة عبر الثلاث الطرق الغير شرعية
معدناش هنتعامل مع اصحاب الشقق او السماسرة اولاد الحلال !
هنطلق الفول والطعمية والكشري طلاقا بائنا لا رجعة فيه
هنعمل لقائتنا الرياضية في ملاعب المدينة مش ع الاسفلت
هنصلي فروضنا في جامع المدينة مش في زاوية المغفرة

لكن ياجماعة
اوعي حد يفتكر ان فرحتنا دي خلفت ورائها احزان واشجان وكدر وغم .. ابدا ياجماعة .. دي ايام الاستبعاد دي كانت ايام رائعة في مضمونه ؛ كفاية ان الواحد كان حاسس انه عايش عيشة المجاهدين وهذه هي سنة الله في كونه .. الابتلاء والمحن للعاملين لرفعة هذا الدين .

وفي نهاية كلماتي وفي ختام الموضوع، ابعث برقيات الشكر والعرفان لكل من :
1: لله عز وجل ، الذي اعاننا وصبرنا في الايام الخوالي
2: للقضاء المصري النزيه والاستاذ جمال المحامي
3: لجميع اخواننا الذين ما بخلوا علينا يوما بالزيارات او بالدعاء او بالتكافل المشروع
4: لجميع مشرفي هذا المنتدي الكريم الحر الذين سمحوا بوجود مثل هذه المواضيع واخص هنا بالذكر الدكتور محمد نصر الذي دائما ما وقف معنا وساند فكرتنا
5 : لجميع اعضاء المنتدي الذين اثلجوا صدورنا بالمشاركات الكتابية والدعاء المتواصل
6: لاحبابي ورفاق دربي اعضاء شقة الجزيرة ( ابو الشداشيد ، نور ، هوبة ، البركة ، العيسوي بيه ، عمي عوض ، ابو فتحي ، جزرة ، ابو صالح ) والاخ الغائب عن اعيننا الحاضر في قلوبنا السعيد
7: ولا ننسي ايضا ( العم ربيع ) بواب العمارة ، مع انه زعلنا شوية .. شكرا ياعمي ربيع
8 : العم حمادة ( نقيب العاملين بمطعم وكافيتريا نعمة ) .. وتشرب من ايده احلي كباية شاي
9 : كنت هنساه ( الكلب ) ده كلب ياجماعة مرابط تحت باب العمارة ، بيهوهو بس علي اهل العمارة ، وبيخاف جدا من الناس الغريبة .. كلب لطيف !!
10: الوجه البرئ والنسمة الفواحة ( انوس ) وقد اخرته ليكون مسك الختام ،الذي قدم لنا مالم يقدمه احد من زياراته المتواصله وكلماته الطيبة وابتساماته المريحة ، وكان بيجيب معاه حاجات حلوة وهو جاي .

اخواني واحبابي .. اراكم علي خير في موضوع اخر ، فرفشة كده مش زي ده .. ونكمل مسيرتنا

سبحانك اللهم وبحمدك ، نشهد ان لا اله الا انت ، نستغفرك ونتوب اليك

والسلام عليكم ورحمة الله وبركاته

محبكم في الله : ابو صالح ( ابن البنا )

[عبدالرحمن يوسف]

الحمد لله علي رجوع حقكم يا دكتور محمد وان شاء الله ربنا يعينكم ويوفقكم في دراستكم

[عبدالرحمن يوسف]

تكررت المأساه هذا العام ولكن بشكل مختلف
نرجو منكم ان تواسوا اخوانكم المستبعدين

[ابن البنا]

السلام عليكم ورحمة الله وبركاته
اخواني واخواتي اعضاء المنتدي المبارك
لا اكون مجاملا ان قلت اني قد افتقدتكم كثيرا .. فإني لم ادخل علي المنتدي واكتب منذ ستة شهور تقريبا بسبب انشغالنا بالامتحانات .. ولا اكون كاذبا ان قلت ان ما حدث لي في الامتحانات لهو افظع واشنع واشد ايام مرت علي في حياتي منذ ايام الام الولادة مرورا بالام عملية اللوز واللحمية مرورا بايام الثانوية مرورا بنتيجة سنة تانية ( احم احم ) .. بجد ياجماعة ايام الله لا يعودها .. والحمد لله علي كال حال ..
كل عام وانتم بخير وادام الله عليكم الايام بالخير واليمن والبركات ..
كنت اتمني ان اكتب كلماتي وتحياتي ونصائحي اليكم في موضوع مستقل .. لكن يااحبابي اثرت الكتابة هنا لأنه للأسف لم يجف الجرح .. جرحي انا قد شفي .. وبحمد الله سكنا المدينة وعايشين حالة من الاسترخاء الممل في جنبات مبني الباقوري ..
لكن جرح جديد وهم اخر لحق باخواني في كليتي .. لكن الفاجعة اعظم والمصيبة اشد ..
فأنا لا اعلم اي فرد من طلاب الاخوان في كليتي قد سكن المدينة .. بالإضافة الي طلاب اخرين لا حول لهم ولا قوة ..
وسنكمل هنا المعاناة .. وسنكتب الامنا .. ولن نسكت علي حقوقنا حتي ولو بنقر اصابعنا علي لوحات المفاتيح ..
لكن ستكون الكلمات والمواقف واليوميات من المستبعدين انفسهم وهم الذين سيروون الامهم ..
لذلك ارجو من كل المستبعدين المشاركة والكتابة .. وارجو من الزملاء المرور والتعليقات فهي حقا تثلج الصدور .. وارجو من المشرفين تثبيت الموضوع ولكم جزيل الشكر
وادام الله اوقاتكم بكل خير
سنعود بعد قليل باذن الجليل

[Elfaris]

:5817.imgcache::5817.imgcache::5817.imgcache::5817 .imgcache::5817.imgcache::5817.imgcache: