شوية استفسارات عن طب الفيوم...ممكن تساعدوني؟؟؟؟

[mo0on]

ازيكم يادكاترة

انا السنة الجاية ان شاء الله احتمال ادخل طب

فكنت عندي شوية استفسارات كده عن الكلية

ياريت تساعدوني فيها



يعني عايزة اعرف طب فعلا كلية صعبة وبتحتاج مجهود كبير؟

بالنسبة لطب الفيوم التعليم فيها كويس ولا القصر العيني احسن؟

والدروس في رايكم مهمة ولا ممكن الواحد يجيب تقديرات من غيرها؟

وفي التشريح هل في طب بشري بيشرحوا حيوانات ولا بني ادمين بس؟

وبتشرحوا بنفسكوا ولا بتتفرجوا بس؟ كمان التجارب العملي بتعملوها بنفسكوا ولا لأ؟؟

ايه تاني ايه تاني

اه افتكرت

عايزة اعرف يومكم في طب بيمشي ازاي يعني بتعدوا في الكلية كام ساعة بتذاكروا كام ساعة وكده يعني؟

وعندكم ايام اجازة غير الجمعة ولا لا؟

ولو عندكم اي معلومات تانية عن الكلية والمواد والامتحانات والكتب متبخلوش عليا بيها



انا عارفة ان اسالتي كتير بس معلش اتحملوني لاني بالرغم من اني حابة الكلية دي

بس خايفة منها جداااا

ياريت تساعدوني واللي يساعدني ربنا يوفقه ويجزيه كل خير

واخر طلب بقى تدعولي ربنا يوفقني لاختيار اللي فيه الخير ليا

[eshraka]

السلام عليكم
ازيك يا mo0on (http://www.alltebfamily.com/vb/member.php?u=51447)
منورة كل الطب

يعني عايزة اعرف طب فعلا كلية صعبة وبتحتاج مجهود كبير؟
أى كلية بتحتاج مجهود بداية من خدمة وتربية وكل الكليات
لكن الفرق انك تكونى بتتعبى وتكونى حاسة ان تعبك هييجى ع فايدة هتنفعى بيه مجتمعك وأهلك وأمتك
وانك تحسى انك بتعملى حاجة فعلا مفيدة وممتعة الى هيا دراسة الطب
ومعرفة أسرار ربنا فى خلقه
غير لما تدرسى حاجة متعرفيش اهميتها زى الادب الفرنسى والشعر ايه .......
طبعا كليتنا محتاجة مجهود زيادة لان دى أرواح ناااااااس
بالنسبة لطب الفيوم التعليم فيها كويس ولا القصر العيني احسن؟

ده ممكن تساالى فيه نااس تانيين
وبعدين كل حاجة معتمدة ع الشخص نفسه
ومستوى التعليم مش متقدم فكل الجامعات عموما
لكن طبعا القصر متميز بدكاترته
وتانى الى عايز يتعلم هيتعلم
ومستوى التقديراات فى الفيوم كويس
الموضوع مش يتقاس كدة
بيعتمد ع عوامل كتيرة
السفر والسن والشرح والدرجات وحجم الدفعة وبالطبع الاستخارة أولا
احنا فالفيوم لا نتعدى 160 انما القصر العينى الاف من الطلبة
والدروس في رايكم مهمة ولا ممكن الواحد يجيب تقديرات من غيرها؟
لا طبعا مش مهمة تماما
أنا الحمد لله بجيب امتيز الاربع سنين الى فاتوا ومش بحب الكورسات خالص
انا زهقت من دروس ثانوى
وبعدين شغل المدارس ده خلاص ولازم نعتمد ع نفسنا

وفي التشريح هل في طب بشري بيشرحوا حيوانات ولا بني ادمين بس؟

وبتشرحوا بنفسكوا ولا بتتفرجوا بس؟ كمان التجارب العملي بتعملوها بنفسكوا ولا لأ؟؟
لا احنا مش بنشرح ولا حاجة ولا حتى بنشوف حد بيشرح
انتى بتشوفى الى اتشرح
ومفيش حيوانات ولا حاجة
هتتعودى ع فكرة
الموضوع كان صعب علينا كلنا واتعودنا
والتجارب العملى فى حاجات وحاجات


عايزة اعرف يومكم في طب بيمشي ازاي يعني بتعدوا في الكلية كام ساعة بتذاكروا كام ساعة وكده يعني؟

ودى كمان ميزة
ان الفيوم مواعيد المحاضرات كويسة جدا
عندك القصر ممكن يخلصوا محاضرات 8 مساءا
اليوم بيبدأ حوالى 9 ص وبيخلص ع 1 أو 2 حسب يعنى
وعندكم ايام اجازة غير الجمعة ولا لا؟
اه السبت
وممكن يكون فى أيام تانية حسب كل دفعة
ولو عندكم اي معلومات تانية عن الكلية والمواد والامتحانات والكتب متبخلوش عليا بيها

باذن الله تدخلى بلاسلامة
وستجدى مايسرك من صحبة صالحة وناس هتفيدك
سواء فكليتنا المتواضعة والخلوقة جدا
او هنا فموقعنا الى بيقوم ع خدمتكم
انا عارفة ان اسالتي كتير بس معلش اتحملوني لاني بالرغم من اني حابة الكلية دي

بس خايفة منها جداااا

أى استفسارات اتفضلى بيها
واحنا نجاوبك ع طوووووول
ياريت تساعدوني واللي يساعدني ربنا يوفقه ويجزيه كل خير

واخر طلب بقى تدعولي ربنا يوفقني لاختيار اللي فيه الخير ليا


وفقك ربى لكل خير
وعليك بصلاة الاستخارة قبل كل شئ
وطبعا استشيرى من حولك من أهلك وأصحابك
ربنا يختار لك الخير ويسعدك بنتيجتك
وطمنينا عليك باستمرار

[mo0on]

مرسي اوي يا قمر على ردك
بجد فدتيني كتير

[eshraka]

متواجدون هنا لخدمتكم
وباذن الله تنورينا فطب الفيوم
وياريت تبقى تطمنينا ع نتيجتك

[mo0on]

انا عندي سؤال كمان عارفة انه ساذج شوية
بس معلش بقى لازم تتحملوني ده انا هبقى زميلة ليكم
انا عرفت ان اول تلات سنين بيكون في سكاشن وبعد كده بيكون في راوندات
فكنت عايزة اعرف ايه نظام السكشن والراوند وايه الفرق بينهم ؟
والسكاشن والراوندات بتكون مختلطة ولا البنات لوحدهم ؟

[eshraka]

طبطمنينا على النتيجة
عملتى ايه
وكتبتى الرغبات؟؟؟؟؟؟؟
وناوية تيجى عندنا فطب الفيوم ولا لأ؟؟؟؟؟؟؟؟؟

[mo0on]

بالنسبة للنتيجة انا اساسا مقيمة برة مصر وواخدة الثانوية من هناك
فلسة التتنسيق بتاعنا مش دلوقتي
وعموما انا مجموعي الحمدلله كويس ممكن يسمحلي بدخول طب

[RITAG]

انا عندي سؤال كمان عارفة انه ساذج شوية
بس معلش بقى لازم تتحملوني ده انا هبقى زميلة ليكم
انا عرفت ان اول تلات سنين بيكون في سكاشن وبعد كده بيكون في راوندات
فكنت عايزة اعرف ايه نظام السكشن والراوند وايه الفرق بينهم ؟
والسكاشن والراوندات بتكون مختلطة ولا البنات لوحدهم ؟








اهلا بيكي يا جميل نورتي كل الطب وهتنوري الفيوم ان شاء الله
زي ما اشراقة ربنا يجازيها خير وضحت لك كدة طب من احسن الكليات اللي ممكن تدخليها الحمد لله
هي صحيح مرهقة وصعبة بس حقيقي بفضل الله فيها فرصة انك تاخدي ثواب كبير اوي ان شاء الله
بالنسبة لسؤالك مش ساذج ولا حاجة بالعكس مهم
بصي يا ستي اول 3 سنين دول اكاديميك يعني بندرس حاجات عامة تركيب الجسم اللي هو التشريح
ووظايفه اللي هو فسيولوجي وكذا حاجة كدة خليها على جنب دلوقتي هابقى اقولهالك بعدين
المهم في ال 3 سنين دول نظام الدراسة عبارة عن محاضرات وسكاشن المحاضرات للدفعة كلها شرح نظري في المدرجات
والسكاشن الدفعة بتتقسم جروبات 5 او 6 جروبات حسب العدد كل جروب له جدول مختلف في السكاشن
السكشن بيتاخد في المعمل مع المعيدين كشرح للعملي اللي اخدتوا النظري بتاعه في المحاضرة وهكذا
السكاشن مختلطة بنات وولاد لان اصلا ترتيب الدفعة بيكون ابجدي مش مهم بنت ولا ولد للاسف وتقسيمة السكاشن
حسب ارقام الجلوس يعني انا مثلا ترتيبي بعده 4 اولاد وبعدين بنات وبعدين ولاد وهكذا فبالتالي السكاشن بتكون مشتركة
ونفس الفكرة بالنسبة للراوندات
الرواندات بقى دي زي السكاشن بس من اول ما تطلعي رابعة يعني اخر 3 سنين اللي هم كلينيكال يعني بتكون على مرضى في المستشفى
يفضل ما تشغليش دماغك بيها دلوقتي

اتمنى اكون افدتك نورتي القسم شوفي الموضوع ده هيفيديك اقرأيه واي تساؤل اكتبيه هناك او هنا احنا موجودين فيه بس بعض التعديلات محتاجة تتعمل على الموضوع لانه
فيه حاجات اتغيرت بس مش كتير ما تقلقيش
http://www.alltebfamily.com/vb/showthread.php?t=13672

اي حاجة تحتاجيها احنا معاكي بالمناسبة اشراقة طالعة ساتة ان شاء الله بعد النتيجة
وانا داخلة رابعة ان شاء الله برضوا
واي حاجة تحتاجي تعرفيها قولي لاي حد فينا على طول ابعتي في رسايل الزوار او هنا احنا موجودين
وفقكم الله ،،،،،،