آخر المشاركات
         :: Leprosy pearls (آخر رد :doomm007)      :: كتاب الـ General Pathology ... تلخيص لكل طلاب تالتة (آخر رد :عبود الخميسي)      :: التهاب البروستاتا (آخر رد :فهد أحمد)      :: مجلة سلا (آخر رد :ديجيتال)      :: Free Online Medical Certification(Expires end of May, 2020) (آخر رد :دكتور أشرف)      :: Nephrology pearals (آخر رد :doomm007)      :: Module: Basic Mechanical Ventilation (آخر رد :دكتور أشرف)      :: فيديوهات شرح منهج الجراحة كاملا للبكالوريوس و الماجيستير للدكتور على حسيب (آخر رد :dr_m_6000)      :: كيف استعد لعملية تكميم المعدة (آخر رد :dr.elsobky)      :: 10 مميزات لعملية شفط الدهون بالليزر (آخر رد :dr.elsobky)     


العودة   كل الطب أكبر منتديات طبية عربية 10 أعوام من العطاءAllteb 10 Years of Donation > التعليم الطبي الأساسي > الجامعات المصريـة > طب اسكندرية

إضافة رد
 
أدوات الموضوع انواع عرض الموضوع
قديم 08-24-2009, 11:17 PM   #1
د أحمد سمير
 
الصورة الرمزية د أحمد سمير
 
تاريخ التسجيل: Feb 2009
العمر: 34
المشاركات: 2,692
Red face مقدمة هامة لطلبة الفرقة الخامسة

بسم الله الرحمن الرحيم

الحمد لله رب العالمين
و الصلاة و السلام على أشرف المرسلين
سيدنا محمد صلى الله عليه و سلم
و من اتبعه بإحسان إلى يوم الدين
ثم أما بعد ,,

السلام عليكم و رحمة الله و بركاته

الأول مبااارك لكل طلبة سنة خامسة الجدد
على النجاح فى الفرقة الرابعة
و إن شاء الله سنة خامسة تكون أفضل و تكون سنة سعيدة عليكم

الموضوع ده بناء على طلبكم هنتكلم شوية عن سنة خامسة
و المواد بتاعتها و نظام الدراسة فيها
و أنا مكنتش حابب أعمل الموضوع لإن النظام اتغير شوية بعدنا
لكن طبعا الناس بتوع ستة مش فاضيين دلوقتى
ربنا يعينهم على اللى هما فيه

و آسف جداا على التأخر الشديد فى الموضوع بس أنا كنت مستنى
لما نتيجتكم تبان
عشان تعرفوا تقروا الموضوع بمزاج :)
نبدأ على بركة الله

الخصائص العامة للفرقة الخامسة
اللى بتميزها عن أى سنة تانية

1-الدراسة الإكلينكية
أكيد كلنا بنكون داخلين كلية الطب و فى ذهنك بقه
إنك خلاص هتبقه دكتور و تدرس الطب
تكشف على مرضى و تعرف تعالجهم
و أكيد اتفاجأت لما لقيت إن لسه فيه 3 سنين دراسة أكاديمية قبل ما تبدأ تدرس الكلينكال
و حتى فى رابعة لقيت الكوميونتى و الطب الشرعى بعيد عن الكلينكال و أقرب للمواد الأكاديمى و الأنف و الأذن بناخدها دراسة نظرية من غير حالات و المادة الوحيدة اللى كنا بنشوف فيها مرضى بجد و نكشف و كده كانت الرمد
دلوقتى من أول سنة خامسة و كذلك فى سادسة
خلاص جاتلك الفرصة
الدراسة كلها pure clinical
بمعنى إنك كل يوم هتشوف عيانين و تكشف عليهم
و تدرس أمراض مختلفة و علاجها
و الكلينكال ده و لا شك متعة كبيرة جداا
أولا لإنك بتدرس حاجة بتشوفها
ثانيا لإنك بتدرس حاجات موجودة حواليك
و الناس بتسألك عنها من أول ما دخلت الكلية
و بيكون إنتا أصلا نفسك تعرفها
شفت ازاى سنة خامسة سنة جميلة :)

2- سنة النفس الطويل
تختلف برده سنة خامسة عن السنين اللى قبلها إنها سنة طويييييييييلة حبتين
بمعنى إنك مش هتمتحن و تخلص و تاخد أجازة زى باقى الطلبة
إنما هتفضل تكمل و تروح الكلية لحد شهر 7 أو 8
و تعد طول أجازة الصيف تذاكر عشان تستعد للامتحانات
و ما أدراك بقه بالمذاكرة فى شهور الصيف ؟؟
بتكون خلاص حران و زهئان
و الناس كلها فى أجازة
و الدنيا دوشة و أفراح
و كل الناس خلصت حتى الثانوية العامة
و مفيش حد بيذاكر إلا إحنا
أنا فاكر لحد دلوقتى كنت كل ما أقابل حد من قرايبنا
يقولى ها يا ابنى عملت ايه فى النتيجة
أقوله احنا لسه بنذاكر مبدأناش امتحانات
يعد يقولى معلش يا ابنى ربنا يعينك
أنا عمرى ما انا مدخل عيالى طب
حتى أصحاب المكتبات لما كنت أروح أشترى ورق و أقلام كانوا يسألونى هوا انتا فى ايه
و عايز ليه الحاجات دى
عشان كده لازم يكون عندك صبر و توزع مجهودك على مدار السنة عشان متوصلش لمرحلة الملل
و إن شاء الله هتسمتعوا بالدراسة و مش هتحسوا بملل خاااالص

3- سنة مهمة ... بغض النظر عن تخصصك

سنة خامسة دى برده أكتر سنة هتطلع منها بمعلومات فى الكلية
و المعلومات دى هتفيدك و هيا تقريبا معظم شغلك
سواء و انتا امتياز أو فى التكليف
و حتى بعد كده فى أى تخصص هتلاقى نفسك محتاج تعرف الكلام ده
لإن الباطنة دى أم الطب
و داخلة فى كل حاجة
كما سأبين إن شاء الله لما أتكلم عنها
عشان كده لازم تكون حاطط فى دماغك إنها مش زى أى سنة هتحفظ كلمتين و تدخل تكتبهم فى الامتحان و خلاص
لازم تكون فاهم الكلام كويس و مستوعبه
و ده ميمنعش إنك تحفظ برده و تجيب درجات


4- عذاب الاختلاف
فى أول أسبوع لينا فى رواندات الباطنة كنت بحضر عادى و كأى طالب مجتهد بكتب ورا الدكتور
و بعدين روحت قريت الموضوع و لقيت فيه كلام الدكتور قالوا و مش مكتوب فى الكتاب قمت بكل حسن نية مزوده فى الكتاب و مذاكره
تانى يوم دخل دكتور تانى بيسأل قمت قلت كلام الدكتور الأولانى
و هنا اكتشفت الحقيقة المروعة
إن كل دكتور مسئول عن كلامه بس
و لو قلتله كلام دكتور تانى عادة مش هيعجبه
و هتتفاجأ برده
ايه يا ابنى انتا بتقرأ منين مين اللى قالك الكلام العبيط ده
دى من أهم صفات الكلينكال و الباطنة بالذات
و الجراحة أكتر منها كمان
و على مدار السنةهتقابلكم مواقف كتير ظريفة
دكتور مثلا بيعملكم ازاى تكشفوا على البطن فقالكم طريقة معينة و قعد يترىء على طريقة تانية
و يقول اللى يعملها يبقه مبيقهمش حاجة
و دى بقت obsolete و مش عارف ايه
و بعدين الدكتور يجيله موبايل يطلع يتكلم
يدخل دكتور تانى يكمل شرح
يقوم يعمل الطريقة التانية اللى كان الدكتور الأولانى بيترىء عليها
طبعا هوا أول ما يعمل كده الرواند كله بيضحك
و هوا مش فاهم هوا فيه ايه
المهم لازم تبقه مدرك للنقط دى و تحاول تعرف الآراء المختلفة
خاصة إن زى ما انتوا عارفين إحنا أساسا موجودين و بنروح الكلية من أجل إسعاد الأساتذة و الدكاترة الكبار فلازم نعمل كل ما فى وسعنا من أجل إسعادهم و إرضاءهم
و فى امتحان الكلينكال بالذات
تعمل مثلا للدكتور أول طريقة لقيته كشر كده
تخش عليه بالتانية
لقيته كشر برده خلاص بقه
ربنا يعوضك فى الامتحانات القادمة


5-مفيش كتب
فى أول 4 سنين كلنا متعودين إن الكلية زى المدرسة فيه كتاب الوزارة بتروح تشتريه و تذاكر منه
من أول خامسة بقه
مفيش كتب للباطنة
و دى مشكلة كبييييييييرة جدااااا
لإنك هتلاقى 100 دكتور منزلين كتب و مذكرات
و فيه دكاترة بيدوا محاضرات و ينزلوا ورق
و فيه أقسام بتنزل كتب
المشكلة دى عيبها إنها بضيع وقت كبييير جداا
إنتا مثلا اشتريت كتاب و خلاص بتذاكر منه
هتلاقى واحد قاعد جمبك فى المحاضرة
يقولك شوف الكتاب ده شايف الحتة دى
جات السنة اللى فاتت فى الامتحان و مكنتش موجودة إلا هنا
تقوم تقول ياااا رااااجل ده أنا اضحك عليا
تقوم ترمى الكتاب اللى عندك و تجيب التانى
و هكذا هتفضل فى الدوامة دى أول شهرين تلاتة
فى السنة لحد ما تستقر على الكتب اللى هتذاكر منها


نظام الدراسة فى الفرقة الخامسة

فى سنة خامسة مش هتدرس غير مادتين بس
شوفتوا ازاى سهلة خااالص
نتكلم بسرعة بطريقة إجمالية عنهم


الأمراض الباطنة
الباطنة هيا أم الطب
و شاملة فروع كتيرة جدااا
يعنى تقدر تقول الطب كله لو طلعت منه
الرمد و الأنف و الأذن و النسا
هيبقه باقى الجسم كله
أى مرض لو علاجه بالأدوية يبقه تبع الباطنة
و لو علاجه محتاج عمليات يبقه تبع الجراحة
و لو علاجه الاتنين يبقه مشترك بينهم
و هتاخدوه مرتين فى خامسة و فى سادسة
زى ال peptic ulcer مثلا


الأطفال
و دى نموذج صغير للأمراض الباطنة
و هتلاقى حاجات كتيرة مشتركة بينهم
هما بصفة عامة نفس البرانشات
إنما فى الأطفال بيهتموا و بيركزوا أكتر على الأمراض اللى بتيجى فى الأطفال


نظام الدراسة بقه بيكون كالتالى
السنة الدراسية 8 شهور تقريبا
منهم شهرين أطفال
دول هتاخدهم فى الشاطبى
هيبقه عندكم راوند الصبح و بعدين محاضرات الظهر
و إن شاء الله فى الشهرين دول هتخلصوا المنهج
و هتمتحنوا كمان امتحان الراوند اللى بيكون MCQ
كان أيامنا عليه 100 درجة
و بتمتحن كمان الكلينكال
و بيكون فاضلك فى آخر السنة
النظرى و الشفوى فقط

و شهرين باطنة خاصة
و 4 شهور باطنة عامة
هنتكلم عن فروعهم بعد كده إن شاء الله
المهم بتروح كل قسم بتعد فيه حوالى أسبوعين تلاتة كده
و المفروض ده اللى بتاخدوا فيه الكلينكال
و كان أيامنا الراوندات دى منفصلة عن المحاضرات
إنما سمعت إن فى الدفعة اللى بعدنا كانوا بيدوا
لكل مجموعة المحاضرات بتاعة القسم اللى هما فيه و ده أحسن طبعا بكتييير

و فى آخر الراوند بتمتحنوا امتحان بسيط كده
حسب نظام القسم
عادة بيكون فيه كلينكال و MCQ

و امتحانات الراوندات دى كلها على بعض عليها حوالى 180 درجة
من ال 900 بتوع الباطنة

و الأطفال عليها 500
سنة خامسة كلها 1400


و إن شاء الله المشاركة الجاية هتكلم باختصار عن فروع الباطنة و الأطفال
+ هقولكم أحسن مصادر المذاكرة ( من وجهة نظرى الشخصية )
و حضور المحاضرات و الشرايط و الكورسات و أى حاجة تانية افتكرها برده

__________________
نقرتين لعرض الصورة في صفحة مستقلة
د أحمد سمير غير متواجد حالياً   رد مع اقتباس
قديم 08-24-2009, 11:18 PM   #2
د أحمد سمير
 
الصورة الرمزية د أحمد سمير
 
تاريخ التسجيل: Feb 2009
العمر: 34
المشاركات: 2,692
افتراضي رد: مقدمة هامة لطلبة الفرقة الخامسة

السلام عليكم ورحمة الله وبركاته

النهارده قلت لازم أخلى عندى دم بقه بعد كل الردود دى
و أحاول أكمل الموضوع
أحسن كده السنة هتبدأ و احنا مقولناش حاجة

الباطنة

الأول عشان نتكلم عنها لازم نقسمها لإنها كبيرة حبتين
عندك باطنة عامة بأقسامها و دول 8
و باطنات خاصة بأقسامها و دول 5

و عندك ال clinical pathology اللى هوا التحاليل
و الأمراض الجلدية

هما تخصصات تانية بس بناخدهم تبع الباطنة

بالإضافة طبعا لكلينكال الباطنة

متهيألى كده مفيش حاجة نسيناها

و إن شاء الله النهارده هنتكلم عن أقسام الباطنة العامة الثمانية
الله المستعان

Diabetes Melitus
البول السكرى
نقرتين لعرض الصورة في صفحة مستقلة
بدأت بيه لإنه من البرانشات المهمة جداا
و حالاته كتييرة فى امتحانات الكلينكال فى الرواندات و فى آخر السنة
غير إنه من أمراض العصر
فأكيد كل واحد فينا عنده واحد قريبه أو جاره عنده السكر

بصفة عامة يعتبر برانش قصير
و مش معقد يعنى ممكن تفهمه لوحدك لو قريته
بيتاخد فى حوالى 6 محاضرات

هتدرس فيه من الأول ايه تعريف السكر
و ايه النظريات اللى بتفسر حدوثه
و بعدين الأعراض اللى ممكن تيجى للعيان
و طريق تشخيصه
و بعدين هتدرس العلاج سواء بالأقراص أو الإنسولين
نفس كلام الفارما بس باختصار
و بعدين المضاعفات
سواء المضاعفات الحادة اللى تشمل غيبوبات السكر بأنواعها
أو المضاعفات المزمنة زى التهاب الأعصاب

و الدكاترة بتوع القسم ده طيبين و كويسين
و بيشرحوا فى المحاضرات كويس
أنصحكم تحضرولهم

Hepatology
أمراض الكبد
نقرتين لعرض الصورة في صفحة مستقلة
برده حالات ال liver
من أكتر الحالات اللى بتخش امتحانات الكلينكال
غير إنها من الأمراض ال endemic فى مصر
فلازم تكون عارفها كويس

بصفة عامة برانش طويل شوية
بس سهل و مش معقد
و معظمه معلومات سمعت عنها قبل كده
فممكن تفهمه لوحدك باستثناء بعض الأجزاء

هتدرس فيه الأول مقدمة عن تحاليل وظائف الكبد
و ازاى تعرف تقراها
و بعدين هتدرس اللى بحب اسميه رحلة مريض الكبد المصرى
من اول ما بيصاب بالفايروس
و ايه انواع الفيروسات و ازاى بتنتقل و الوقاية و العلاج
شبه الكلام اللى اخدتوه فى الكوميونوتى
و بعدين لما تبقه الفيروسات نشطة و تعمل التهاب مزمن
و بعدين تليف الكبد
و بعدين فشل الكبد و الأعراض و العلاج
و ده أغلب الحالات اللى هتشوفوها
و طبعا هتدرسوا بالتفصيل
الاستسقاء ascites
و دوالى المرىء

و القسم عندنا الدكاترة بتوعه طيبين
بس المحاضرات بتاعتهم خيالية شوية
يعنى أغلب كلمهم إحصائيات و أبحاث و تفاصيل كبيرة
تحس إنك مينفعش تذاكر منها

GIT
أمراض الجهاز الهضمى
نقرتين لعرض الصورة في صفحة مستقلة
برانش ظريف و سهل
مفيش حالات كتير فيها هتشوفوها فى الكلينكال
إنما طبعا بيجى فى النظرى

هتدرس فيه الأول symptomaolgy
يعنى أعراض الجهاز الهضمى
و كل عرض ايه اسبابه و ازاى توصل للتشخيص
زى مثلا
abdominal pain diarrhea vomiting
و بعدين هتدرس بالدور من فوق لتحت
أمراض الفم زى القرح و تشققات اللسان
و بعدين صعوبة البلعم
و بعدين ارتجاع المرىء
و بعدين قرحة المعدة
و بعدين أمراض القولون زى
IBD

برانش كويس
سهل و مش طويل أوى
و الدكاترة بيشرحوا فى المحاضرات كويس
بس بيطولوا جداااا

Endocrine
أمراض الغدد الصماء
نقرتين لعرض الصورة في صفحة مستقلة
فيه شوية حالات كلينكال بس مش بتنزل كتير فى الامتحانات
يعتبر برانش مش ظريف أوى
و عايز حفظ كتير بالإضافة للفهم طبعا

هتدرسوا فيه كل هرمون و الأمراض اللى بتحصل لما يزيد أو يقل
زى مثلا
Acromegaly
Thyrotoxicosis
Addison disease
طبعا انتوا اخدتوا الكلام ده فى الفسيولوجى
إنما المرة دى هتاخدوه من الجانب الاكلينكى
فيه حفظ كتير زى ما قلت لان فى كل مرض
هتلاقى الأعراض بتاعته كتيرة جداا لإن الهرمون بيأثر
على كل system من الجسم

و الدكاترة بتوعه فيهم كام واحد Malignant
و الباقيين نص نص
و محاضراته حضرت أغلبها
بس معجبتنيش أوى

Nephrology
أمراض الكلى
نقرتين لعرض الصورة في صفحة مستقلة
أنا أجلت الكلام عنه لإنه كان صدمتى فى سنة خامسة
لإنى بدأت المحاضرات بيه و مكنتش بفهم أى حاجة من الدكاترة
و كنت حاسس إن عندى depression رهييييييب
و مش عارف هعمل ايه

برانش دقيق و عايز فهم جامد
لو مفهمتهوش مش هتعرف تذاكره و هتكره نفسك
لو فهمته هتسمتع بيه و هتحبه جداااا

و ده من البرانشات اللى بجد الدكتور أسامة أبدع فى شرحها
و بالمناسبة ده التخصص الدقيق بتاعه

هتدرس فيه الأول ال investigations
عن تحليل وظائف الكلى و ازاى تعرف تقراها
و أنواع الأشعات المختلفة بتاعة الكلى و كل واحدة بتبين ايه
و بعدين هتدرس ال glomerulonephritis
اللى اخدتوها فى الباثولوجى
Nephrotic Syn.
Nephritis syn.
و بعدين ال UTI
و بعدين الفشل الكلوى الحاد
و الفشل الكلوى المزمن
و هتاخد كلمتين عن الغسيل الكلوى
امتى يتعمل و بيتعمل ازاى و ايه انواعه
على فكرة ده أكتر قسم
الدكاترة بتوعه
sooooo malignant

Hematology
أمراض الدم
نقرتين لعرض الصورة في صفحة مستقلة
ده بالنسبالى أكتر برانش بحبه بعد ال nephrology
برده فيه فهم جااااامد

هتدرس فيه حاجات كتيير
من اول الانيميا بانواعها المختلفة
انيميا الحديد
انيميا البحر الابيض المتوسط
انيميا الخلايا المنجلية
و هتدرس الامراض اللى بتيجى فى صورة نزيف
زى الهيموفيليا و غيرها
و السرطانات
زى اللوكيميا و الليمفوما

و ميزة البرانش ده
ان معظم الكلام ده هتاخدوا برده فى التفصيل فى الأطفال
فهيبقه عندك فرصة لو مفهمتوش هنا تفهمه هنا

و ايام محاضراته كان عندى امتحان فى وحدة ال diabetus
فمحضرتهاش
و ممرتش على القسم ده فى الرواندات
و بالتالى معنديش فكرة أوى عن الدكاترة بتوعه
بس اسمع ان فيهم ناس malignant

Rheumatology
الأمراض الروماتيزمية
نقرتين لعرض الصورة في صفحة مستقلة
برانش ظريف و سهل
و حالاته بتدخل كتير فى امتحانات الكلينكال
هتدرسوا فيه أمراض مختلفة
زى Rheumaoid arthritis
Systemic lupus
Osteoarthrtitis
Ankylosing spondylitis
عيبه إن فيه حفظ شوية لإن أغلب الأمراض الروماتيزمية
بتأثر على الجسم كله مش المفاصل بس
فلازم تعد تحفظ system system
و ايه اللى بيحصل فيه
زى ال endocrine كده
بس بصفة عامة سهل و ظريف زى ما قلتلكم
و محاضراته معقولة
و مفيهاش تطويل أوى

Geriatrics
طب المسنين
نقرتين لعرض الصورة في صفحة مستقلة
ده برانش عجيب كده
متهيألى مش موجود فى باقى الجامعات
هوا كله على بعضه عبارة عن 3 أو 4 محاضرات
هتاخدوا فيهم مثلا السكر
بس يهتم أكتر فى المسنين
ايه المضاعفات اللى ممكن تحصل و ايه الادوية اللى تناسبهم
و الضغط نفس الكلام
و مثلا محاضرة ازاى تمنع الاصابات اللى ممكن تحصلهم فى البيت
تخلى البيت فيه نور
و كلام غريب كده زى كلام الكوميونتى
و الحاجة العجيبة ان بيجى عليه أسئلة فى امتحانات النظرى
زى باقى البرانشات
طبعا لازم تذاكرواه كويس
سهل تجاوب أسئلته و هتاخد درجات كبيرة على مذاكرة
كمية قليلة جداا
__________________
نقرتين لعرض الصورة في صفحة مستقلة

التعديل الأخير تم بواسطة محمد القاضي ; 09-10-2009 الساعة 08:24 PM سبب آخر: نقل الموضوع للمشاركة المحجوزة
د أحمد سمير غير متواجد حالياً   رد مع اقتباس
قديم 08-24-2009, 11:19 PM   #3
د أحمد سمير
 
الصورة الرمزية د أحمد سمير
 
تاريخ التسجيل: Feb 2009
العمر: 34
المشاركات: 2,692
افتراضي رد: مقدمة هامة لطلبة الفرقة الخامسة

الكتب

نقرتين لعرض الصورة في صفحة مستقلة

و متأسف جداا على التأخير
بس أنا عرفت إن دراستكم اتأخرت فقلت نمشى بالراحة بقه


الأول عايز أقولكم شوية نصايح
أولا
متشتتش نفسك
متفضلش طول السنة تلف بين الكتب
شوف أى كتاب حتى لو صغير و ذاكره
بس ذاكره كله مذاكرة كويسة
ثانيا
مش شرط تذاكر من مصادر كبيرة أوى
لإن غالبا هتفضل تجمع فى كلام كتييييييير
و هتيجى فى الآخر فى الامتحان الوقت محدود
و مهما كنت عارف معلومات هتضطر تختصرها
ثالثا
لو انتا جبت كتاب و بتذاكر منه و مرتاح فيه
لا تلفت لكلام أى حد تانى
سواء من زمايلك أو الناس اللى أكبر منك
رابعا
ذاكر مذاكرة تصاعدية
لو انتا عايز تجيب امتياز عالى و تعمل score
كويس فى الباطنة
هتذاكر من مصدر واحد كبداية
متذاكرش من كذا مصدر مع بعض لإن كده هتشتت نفسك
و بعد ما تتقن المعلومات اللى ذاكرتها من البرانش ده
ممكن تضيف فى الكتاب notes صغيرة
بأى كلام زيادة اتقال فى المحاضرات
أو قريته فى كتاب تانى
و هكذا


الكتب المتوفرة
لحد ما كنت أنا فى خامسة مكنش فيه حاجة اسمها كتاب قسم
إلا بعض الأقسام زى الكارديو و التروبيكال بيتنزل كتاب ليها
و متهيألى ده الوضع لحد دلوقتى عشان أنا بشوف الناس بتوع خامسة
داخلين يمتحنوا و ماسكين نفس الكتاب اللى كانت أيامنها

فيه طبعا دكاترة كتير بتعمل كتب أشهرها
كتب الدكتور نادر و ده دكتور فى معهد البحوث و بيدى كورسات
و ده بيتباع فى مكتبة دار العلم
و فيه كتب الدكتور صبحى ده تقريبا دكتور عناية أو كارديو
و ده بيتباع فى مكتبة الشروق
و فيه كمان ناس بتذاكر من كتب دكاترة فى جامعات تانية
زى الدكتور أسامة و الدكتور الفطاطرى
و دول بيجوا على فترات فى المكتبة الصغيرة اللى فى وش طب الأسنان

بالإضافة لكل ده فى دكاترة كتير بيتنزل الورق بتاع المحاضرات بتاعها
فى مكتبة الشروق

بصفة عامة أفضل كتب فى رأيى هيا كتب نادر لإنها شاملة و مفصلة
و فيها ميزة إن أسئلة التجميعات اللى جات فى السنيين االلى فاتت مثلا
و غالبا مش هتلاقيها فى أى كتاب بتلاقيه كاتبها مع إجاباتها
و أغلب صحابى اللى كانوابيرتبوا كانوا بيذاكروا من كتبه
بس بيقولوا إن هوا فى الكورسات بيحفظ بس مش بيفهم

و على فكرة أنا عمرى ما شفته و لا أعرف شكله بس ده رأيى

و الآن هقولكم رأيى عن أفضل كتاب فى كل برانش
من وجهة نظرى


cardiology
صبحى
chest

نادر
Neuro

نادر
Psych.

مفيش غير كتاب واحد
عامله واحد أكبر مننا عبارة عن المحاضرات اللى الدكاترة بتقولها
Tropical

كتاب القسم +
ورق المحاضرات اللى مش موجودة فى الكتاب

DM
ورق المحاضرات +
كتاب الدكتور فتحى السيوى
Nephrology

نادر
Endocrine

صبحى
Blood

مفيش كتاب معين عجبنى فيه
نادر + ورق المحاضرات + كتاب الأطفال
Liver

نادر
GIT

ورق المحاضرات
Rheumatology

نادر
Geriatrics

ورق المحاضرات
__________________
نقرتين لعرض الصورة في صفحة مستقلة

التعديل الأخير تم بواسطة محمد القاضي ; 09-15-2009 الساعة 11:07 PM
د أحمد سمير غير متواجد حالياً   رد مع اقتباس
قديم 08-24-2009, 11:30 PM   #4
محمد القاضي
هوالله قبلك حاسس بيك
Allteb
 
الصورة الرمزية محمد القاضي
 
تاريخ التسجيل: Apr 2009
العمر: 31
المشاركات: 1,396
افتراضي رد: مقدمة هامة لطلبة الفرقة الخامسة

ههههههههه

حلوة

ودفعت كام بقى في المحجوز دا

بس ايه النشاط اللي على غير ميعاد دا

كمل كمل متابعينك
__________________
نقرتين لعرض الصورة في صفحة مستقلة
محمد القاضي غير متواجد حالياً   رد مع اقتباس
قديم 08-24-2009, 11:50 PM   #5
"إيمان"
رحماك يا رب
Allteb
 
الصورة الرمزية "إيمان"
 
تاريخ التسجيل: Jan 2009
العمر: 31
المشاركات: 1,244
افتراضي رد: مقدمة هامة لطلبة الفرقة الخامسة


وعليكم السلام ورحمة الله وبركاته

جزاكم الله خيرا د.احمد

جميل اوى الموضوع

ربنا يجعله فى ميزان حسناتك

منتظرين الباقى ..وفقكم الله واعانكم




__________________


نقرتين لعرض الصورة في صفحة مستقلة

" ربنا إنك تعلم ما نخفى وما نعلن وما يخفى على الله من شئ فى الأرض ولا فى السماء "
""اللهم ارزقنا وأنت خير الرازقين ""

"إيمان" غير متواجد حالياً   رد مع اقتباس
قديم 08-25-2009, 02:08 AM   #6
mony
 
تاريخ التسجيل: Aug 2009
العمر: 31
المشاركات: 101
افتراضي رد: مقدمة هامة لطلبة الفرقة الخامسة

gazak allah 5yraaaaaa kml bgd klmk mofeeeedنقرتين لعرض الصورة في صفحة مستقلةنقرتين لعرض الصورة في صفحة مستقلةنقرتين لعرض الصورة في صفحة مستقلة
__________________
الحياة لو لعبة ... كنت شيلت الحجارة
mony غير متواجد حالياً   رد مع اقتباس
قديم 08-25-2009, 08:44 PM   #7
Kholoud
loda سابقا
 
الصورة الرمزية Kholoud
 
تاريخ التسجيل: Feb 2009
العمر: 32
المشاركات: 89
افتراضي Re: مقدمة هامة لطلبة الفرقة الخامسة

جزاك الله خيرا يا دكتور
وربنا يكرم حضرتك
كنا محتاجين الموضوع ده
__________________
الهي انت تعلم كيف حالي ...... فهل يا سيدي فرج قريب
Kholoud غير متواجد حالياً   رد مع اقتباس
قديم 08-26-2009, 03:57 PM   #8
بسمتي
كمااردت ان تراها
 
الصورة الرمزية بسمتي
 
تاريخ التسجيل: Feb 2009
العمر: 31
المشاركات: 61
افتراضي Re: مقدمة هامة لطلبة الفرقة الخامسة

جزاكم الله خيرا يا دكتور
ربنا يعينك ويكرمك
__________________


لا اله إلا الله ... محمد رسول الله

من فقد الله فماذا وجد؟؟؟

بسمتي غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن 03:14 AM.


Powered by vBulletin Version 3.8.12 by vBS
Copyright ©2000 - 2020, Jelsoft Enterprises Ltd
Translation by Support-ar