عرض مشاركة واحدة
قديم 04-24-2013, 11:43 PM   #1
Muhammad Barakat
مدير المنتدي
Allteb
 
الصورة الرمزية Muhammad Barakat
 
تاريخ التسجيل: Jan 2009
المشاركات: 4,777
exclusive يوميات طبيب تكليف

السلام عليكم ورحمة الله وبركاته
كيفكم يا زملاء الكفاح في التكليف
أخبار الوحدات معاكم إيه والتطعيمات أخبارها إيه وجلسات الحوامل
وإداريات الوحدة

حقيقة كثرت الأقاويل قبل الاستلام وأخذنا جميع ذلك الانطباع السئ عن الوحدات
واصبح بداخلنا انطباع سئ وأن ما قادم سئ
هكذا هو الحال بنا
كما كنا في أيام الكلية
تجد من يقول لك قبل المحاضرة الدكتور ده شرحه مش كويس
فتاخد انطباع ميبق وبالتالي تدخل وانت غير منتبه ومش تركز

هذا هو طبعنا كمصريين
المهم
أحببت أن أكون مختلفا
قبل استلامي بيوم في الوحدة ذهبت إليها بعد معاناة بالطبع
فوجدتها وحدة منشئة حديثا من 2002
بها 3 غرف للكشف وسكن للأطباء
وبها جهاز سونار

المهم عرفت من الطبيبة السابقة لي إن الاقبال بيكون أيام ما يكون فيه دواء
وسألتها عن نظام الوحدة ونظام الاداريات اللي كله بيشتكي منها
انا طبيب ثاني واتفقنا نقسم الشغل كل واحد ليه 3 أيام
المهم جيت تاني يوم واستلمت
وبدأت ممارسة عملي طبيب
أقوم بالكشف علي الحالات لأن من حظي أنه يوجد دواء والناس تأتي
وأخبرت التمريض إني مدرب علي جهاز أشعة تليفزيونية وتقدر تحجز لأي حالة
وبيكون ب 5 جنيه
المهم
الحمد لله بدأت الناس تيجي علي سمعتي -بفضل الله وكرمه -
وعملت حتي الان من استلامي 5 حالات سونار
للعلم جهاز السونار من 2007 ولم يستعمل حتي اليوم وأنا لي الشرف غني أستعمله

ما أقصده وما يجب عليكم هو أن تثبتوا أنفسكم كأطباء عن طريق مهاراتكم وحسن تعاملكم مع المرضي وأهم شئ حسن التعامل
واذكروا قول النبي (( الدين المعاملة )) وقوله (( أقربكم مني مجلسي يوم القيامة أحسانكم أخلاقا ))

نيجي للإداريات
انا شايف إن الناس كبرت الموضوع وكمان خوفت نفسها وأخدت انطباع سئ
أنا في يومي بكون طبيب الوحدة وقائم مكان الطبيب الأول

عملت نظام
بأحضر في أيامي بانتظام وبأروح بدري علي قدر الإمكان

ببسأل مين موجود ومين مش موجود
حسيت من أول يوم إن فيه استهتار شوية والدكتور بمعني أصح مدلعاهم شويتين

فسبتهم يومين وبدأت ألمحلهم في الكلام
فين الدكتورة الصيدلانية .. دي مشيت يا دكتور .. طب مش كان المفرزوض الاستئذان يا جماعة ينفع كده

نسيت أقولكم عن كلام الدكتورة لي بخصوص الاداريات
-- أذونات العمال : لكل عامل إذنين في الشهر اسمه اذن ساعتين من الساعة 12 ظهر ل 2 ظهرا
ولازم يتسجل في الدفتر ..خلوا بالكم إن فيه ناس بتاخد الأذونات ومش بتسجلها فلو جه تفتيش يروحوا يسجلوها
فأنا عودتهم أي حد جاي ياخد اذن اقوله هاتلي الدفتر واشوف هل أخد اذونات سابقة ولا لا؟

-- الوفيات : أي حالة وفاة من عمر 40 يوم لعمر 40 سنة لازم تشوفها
فوق الأربعين غالبا هيكون هناك سبب واضح هتعرفه من المسئول عن الموضوع ده في الوحدة ومن تمريض الوحدة
أي حالة تشك فيها اطلب البوليس وكلم مدير الإدارة

-- قبل ما تمضي علي اي حاجة اقراها الأول واستفسر منهم عن كل حاجة لكن مش تظهر بمظهر إنك جاهل بالموضوع لا استفسر وافهم

يعني مثلا انا عملت 5 حالات سونار وهم بيبعتوا التقييم لقيتهم كاتبين في الورقة اللي المفروض امضي عليها ولا حالة سونار
انا قرأت الورقة وقلتلها امال فين حالات السونار بتاعتنا
فاتأسفت وعدلتها
يعني لازم تكون مصحصح
الموضوع بسيط بس احنا معقدينه ومكبرين الدنيا
اتعودوا تقراوا وتسألوا وخد تليفون مدير الإدارة واستفسر منه

شد عليهم في الحضور والانصراف لكن بذكاء
مثلا انا يومي الخميس .. بعد لما كشفت هاتولي دفتر الحضور والانصراف
جابوه سألت فين الدكتورة الصيدلانية
قالوا مش بتيجي الخميس؟؟؟؟
قلتل ازاي يعني
قالولي إنها متجوزة ومخلفة ووو
فقلت انا هعدي اليوم ده
لكن بلغوا الدكتورة تنتظم وطالما أنا باحضر فالكل لازم يحضر وشديت عليهم في الكلام
المهم الدكتور جات الأسبوع اللي بعدها وتقولي ينفع يادكتور محمد كنت عايز تشطب علي
فقلتلها يادكتورة انا مش أرضي أشطب
لكن طالما أنا موجود فلازم الكل يكون موجود
ودلوقتي لو حضرتك مش موجودة وايجه تفتيش مين هيتضر أكيد انتي
المهم تقبلت الموضوع وقالت إن شاء الله هأنتظم

وهكذا

بينلهم إنك فاهم كل حاجة ومسيطر

وشد عليهم لكن بأدب وتكون انت ملتزم مش بتحضر يوم بالعافية ومتأخر وفي الاخر تشد عليهم مانت غلطان

وإلي لقاء في يوميات أخري

د محمد بركات
__________________

الحمد لله الذي بنعمته تتم الصالحات
نقرتين لعرض الصورة في صفحة مستقلةنقرتين لعرض الصورة في صفحة مستقلة

we were learning Medicine under supervision of Doctors
Now we Are Doctors
it is hard to feel that a life of person related to your Decision
so , please don't hesitate to ask and learn
Muhammad Barakat غير متواجد حالياً   رد مع اقتباس